Éxodo 21 - La'qaatqa ñi qota'olec Qota'olec & Qota'olec Novita Na Qomyipi

Da napaxaguinataxac quecá'maq se ỹa'paqachin ca liỹa

¹⁸ Ca' ñi qota'olec 'naaco': —No'm 'ue ca co'uaq, ca no'm 'ue ca ỹale coñirqachit ca liỹa, ỹoda'a ca qa', loqo'm ỹahote'e nashitaxañi, ca' 'vii caua na'xata' illaañi, qam se ileu,

¹⁹ ca cá'maq coñirqachit, ca' qaica nqohin ca lasauaxaset. Ta'ta'a no'm cá'maq coñiraxaic nenoxonec, qam ỹahote'e aca lashilete, ca cá'maq coñirqataxan ishiueten cá'maq natarenataxac chaqai cauá'maq na'xata' na'laxaterañi.

²⁰ Chaqai no'm 'ue ca ỹouaxan ca la'ac loqo'm aca la'a, ỹodoota'a ca qo'paq, ca' ỹalauat, ca' qaỹa'ue ca nouaxanaxaset.

²¹ Qam no'm queugui ca na'xa'a loqo'm 'vii caua na'xata' nca'leetauec, ca' sqaica ca lasauaxaset, ma' lalamaxaret cá'maq la'ac.

²² Ca no'm nco'ỹata' caua ỹale', ca no'm ilamqara'a aca 'aalo 'manaxai, ca nachi'ñigui, qam sqaica nqai'negue da nachaalataxac, ca cá'maq lasauaxaset, ca' ishiueten acá'maq roỹaxanaque cá'maq loua, quecá'maq 'neeta'gue cá'maq ỹoiquenac na leloxoỹaxac na nasauaxaset.

²³ Qam no'm acá'maq 'aalo sham tot qaica ca la'maqa' ileuetac, ca' qaỹalauat cá'maq rasauaqataxan.

²⁴ Ca cá'maq ỹachipiaxachigui aca nqote ca liỹa, ca ca'maxare qanaqat aca nqote, loqo'm aca loue, loqo'm ca lqai'laxat, loqo'm ca lapia',

²⁵ loqo'm ca ỹavigaxat ca liỹa, loqo'm ca coñirqachit ca liỹa, loqo'm ca ỹouaxan ca liỹa, ca cá'maq 'ne'tegue ca liỹa, ca' chaqaida qohine'tegue.

²⁶ Chaqai no'm 'ue ca ỹouaxañigui aca nqote ca la'ac loqo'm aca la'a, ca' qotesaq nqai'en, ca ca'maxare ỹaxanec ca'maxare ñiguit quiyim qotesaq nqai'en.

²⁷ Chaqai no'm nac nqai'en aca loue, ca' qai'neeta ỹaxanec, ca' chi laseue' quiyim nac aca loue nqai'en. (21.28-32 Dá'maq 'neeta'gue quiyim cochiỹa cá'maq 'ue ca lalamaxaret louenec.)

Dá'maq 'neeta ca ỹasauaxat ca liỹa

³³ Chaqai no'm 'ue ca 'ue aca li'ỹa loqo'm ỹo'uet aca li'ỹa, qam se ỹapo'ñigui, ca no'm 'ue ca ilamqa'ñigui ñii'lola loqo'm ca 'ashin,

³⁴ ca cá'maq lo'ueenata cajo ni'ỹa, ca ca'maxare ishiueten cá'maq lalo cajo isecỹac quiyim ỹasauaxat. Qam no'ueeno'ot ca'maxare cá'maq isecỹac ileu.

³⁵ Chaqai no'm 'ue ca ñii'lola ỹotogoq ca liỹa nauegaxanaxala', ca' ileu, ca' qaimen cá'maq ralauataxan. Ca acá'maq laseuete, ca qaneuagaxachigui chaqai ná'maq la'at cá'maq ileu ñii'lola.

³⁶ Qam no'm qaỹa'den quiyim cá'maq ñii'lola chaqai'en lanatec togoxosoxonaxai, qam cá'maq na'co' chaqai ỹaxantac, ca cá'maq ileu ỹa'ue cá'maq laseue' quecá'maq chi lalo nca'leetauec. Ca cá'maq ileu, ca' chaqa taỹot.