Ester 6 - La'qaatqa ñi qota'olec Qota'olec & Qota'olec Novita Na Qomyipi

Paguec qaimaqachin so Mardoqueo

¹ Ca' chaqaiso sojo pe so nashi sqaica ca lelaxac, ca vire'to' na' relaataxana'a quiyim qanodori' aso lere hueetalec ná'ogue ná'maq lodegaxat qaỹo'uet quiyí'maq qoyintalec 'laua, ca' qana'xaỹaxana quiyim qaretaqalec.

² Ca' qaiuanejlec hueetalec dá'maq 'neeto' na' so Mardoqueo ỹa'xat da la'xalenataxanaxague' saua Bigtán chaqai so Teres na' qaỹahotaque qaỹalauat so nashi Asuero. Saua'maxare nashil queso neloxoỹaripi queso nashi.

³ Ca co'na'le, ca renataxano' so nashi: —¿Negue' cá'maq 'neeto' na'le ca nishiuetenaxac chaqai quiyim qaimaqachin so Mardoqueo quedá'maq ỹo'ueeto' na'le? —Qaica, ỹaatqajam qaica —'neraco' saua lotaua' so nashi.

⁴ Ca queco'na'le, ca ỹoviro' so Amán quiyi nasoxoc quiyi novirqa' quiyi la'a' so nashi, ma' ỹahotaque quiyim rashiilaxan quiyim qaicoñirashiguim so Mardoqueo caso ỹaqatqajantari' lo'ueenata. Ca' so nashi renataxano' 'naaco': —¿Negue' dá'maq hueetalec na nasoxoc?

⁵ Ca' so lotauaripi 'naaco': —Amán da'taxare. Ca' so nashi 'naaco': —¡Ñaqai noxonaxachiuo da'maxare!

⁶ Ca co'na' inoxono so Amán, ca qainato' queso nashi: —¿Negue' ca qohinta'gue cá'maq ỹale cá'maq najo nashi ỹahotaque imaqachin? Ca' so Amán 'ñiichiquio' lauel: ¿Negue' queto' cá'maq sham imaqachin ñi nashi, ta'ta'a ỹim?

⁷ Ca 'naaco': —Cajo ỹale,

⁸ ca'maxare 'maxaraic quiyim ỹouen cá'maq chi napoxogui'i' chaqai ca shipgaq quenauá'maq qañaxalachichi', qami' qarashi, chaqai quiyim ỹantañi aca nashi nado'o quena lqahic.

⁹ Ca nepo' chaqai ca shipgaq qoỹaanema ca 'óna quená'maq paguec lecaic quena nashillipi quena rotauachi'ipi, qaiyi ỹañiguilo caua noho cá'maq vi'saque maqachiñi', qami' qarashi, chaqai ỹauequeta ca lañaxala' cañi qom louoxoqui quena na'a' lodegaxat, ca ỹaualqata'pegue' 'aueta 'neeta'guesa': ¡'Eda qohinta'gue cá'maq ỹale cá'maq ỹahotaque imaqachin ñi qarashi!

¹⁰ Ca' so nashi 'naaco' queso Amán: —Cha'regue chaqa'ma' qui', coñita ca ipo' chaqai ca iñaxala' shipgaq, ipaquichigui nqai'ñi' dá'maq 'ñirac. Ca' chaqaida 'ñitetegue queso judío le'ec Mardoqueo, só'maq nqa'xantañi quiñi lasom na iuo' lodegaxat. Ca' sqaica quet cá'maq se ipaguigui nqai'ñi' quenaua ra'qaataxahi'.

¹¹ Ca' so Amán icona so nashi lapo' chaqai so shipgaq, ca' ỹauequeta neetashiguim cañi qom louoxoqui quiyi na'a' lodegaxat, 'aueta ỹaualqata'pegue', 'naaco' quen: —¡Chaqaida qohinta'gue cá'maq ỹahotaque imaqachin ñi qarashi!

¹² Ca co'na' ime qaỹouoxontegueri' so Mardoqueo, ca' pila'a ñi lasom ñi nashi lauo' lodegaxat. Ca' so Amán chaqa'ma' pilec queca la'a', rachicota chaqai ỹapootagui na lashic.

¹³ Ca co'na' ỹovirec, ca' ra'qaataxana aso loua chaqai saua nauochaxaua' quedá'ogue dá'maq 'eeto' na'le, ca saua'maxare 'neraco': —No'm judío le'ec cajo Mardoqueo chicqochigui quiyim palac da nemaqajnataxaqui', ca' qami' sqai shichi' naqachiriñi, ta'ta'a quiyim qaica ca 'ñitegue ma'le.

¹⁴ Ca co'na' saqa' ime da ỹa'xatesac saua'maxare, ca' novirero saua lelaatqa so nashi qonague'oga so Amán quiyim qaỹauega so nqui'ỹaxac ỹa'maxatetañi aso nashi Ester.