Ester 4 - La'qaatqa ñi qota'olec Qota'olec & Qota'olec Novita Na Qomyipi

Rachicota nqai'en na judioipi so na'qaatec qaỹa'yiñi

¹ Ca co'na' so Mardoqueo ỹa'den dá'ogue dajo, ca nasectaqta'ahi saua loho queda nqui'ic, ca ỹañiñi saua noho nachicoxoqui', ca' imiichigui na lqahic quena lo. Ca' eec queguelo naua nayico yi na'a' lodegaxat ỹaualqata'pegue'.

² Ca chi ỹovireto'o' ñi lasom ñi 'imec lodegaxat lauo' so nashi, qam se inoxono, ma' se qaỹa'maxaren quiyim inoxono ca qom ỹansañi saua noho ỹansañi so'maxare.

³ Chaqai qai'neete' nauá'maq 'lauari quená'maq ỹovira'a da la'qaatec so nashi ỹaatqajam 'xoic da lachicoxo na judioipi. Ca na'maxare se que'e, noỹentagui, chaqai naualqategueñi, chaqai 'xoic quena'maxare nenantañigui na lo chaqai ỹañiñi naua noho nachicoxoqui'.

Aso Ester retaqa qoshiilec so lauo' laseripi

⁴ Ca' aso nelaatallipi qaỹauaaque lotauaripi aso nashi Ester, chaqai so ỹalliripi qaỹauaaque neloxoỹaq caso'maxare qaỹa'ue la'xaỹaxac aso'maxare quedá'maq qohinta'pegue. Ca co'na'le, ca' aso nashi 'xoic da lachicoxo, ca' ilarerec saua noho quiyim ỹañiñi so Mardoqueo, ca ỹadalaxate' saua loho ỹansañi. Qam so'maxare se icoñiguita.

⁵ Ca' aso Ester roỹaxane'oga so Hatac, so'maxare lashi so neloxoỹaripi queso nashi, ca 'naapega quiyim ra'ỹa'oga so Mardoqueo, chaqai quiyim inat negue' cá'maq 'neeta, chaqai negue' cá'maq 'neeta quiyim ỹo'uet dajo.

⁶ Ca' so Hatac quepegue' so Mardoqueo quiyim retaxaỹa'pegue', neetañigui añi nouoxoqui quiyi na'a' lodegaxat, naloote'oga ñi lasom ñi nashi lauo' lodegaxat.

⁷ Ca' so Mardoqueo ỹaatqajam ra'qaataxane'tem so'maxare quedá'maq qohinta'pegue, chaqai ỹa'xatem yí'maq ỹorete' ayi plata ỹachaxantac so Amán quiyim ỹaneu'a aso lam lahi' so nashi, quiyim laseuete nqai'en na judioipi quiyim nomachichiguiñi ỹalauat.

⁸ Chaqai qai'neeta ỹaanem so'maxare aso lomalate dajo na'qaatec quiyim qanomachichiguiñi na judioipi, dajo na'qaatec chicqochi'ñi yi Susa. Qaỹahotaque qoỹaanem aso Ester, qaiyi aso'maxare ỹa'deentari' dá'ogue. Chaqai qohinac caso Ester quiyim retaxaỹa'pegue' so nashi, qaiyi quepaqataxanlec so lauo' laseripi.

⁹ Ca' so Hatac pilo, ca' ỹa'xatem aso Ester dá'maq 'naaco' na'le so Mardoqueo.

¹⁰ Ca co'na'le, ca' aso Ester liỹa ilarec so Hatac, qam ỹo'uet da lopilaxaset da la'qaatec so Mardoqueo:

¹¹ —Ná'ogue ná'maq ro'ueenataxantacot ñi qarashi, chaqai ná'maq neetalgoto naua 'lauari quená'maq reloqota'a so'maxare, ỹa'deenta quiyim 'ue da naqataxac quiyim no'm 'ue ca inoxonau'a yi pa'aauo nasoxoc quiyim ra'ỹau'a so nashi, ca qaỹalauat, 'eno'm ỹale loqo'm 'aalo, quiyim so'maxare se roỹaxane'oga. Ta'ta'a quiyim so nashi ỹaane'oga so lashile' 'oro, ca' qaica ca qohinegue da nachaalataxac. Ca' ỹim nagui mashic ỹovi' treinta na'xata' quiyim se roỹaxañiua' ñi qarashi.

¹² Ca co'na' so Mardoqueo icoñiguit da lopilaxaset la'qaatec aso Ester,

¹³ ca' lotqai ilaro da la'qaatec: —'Neeto' 'neetapigui qavilli' quiyim mashic ñiisaugui na nashi lauo', ca qaqamite' chicqoiraugui na judioipi, ca' rca'llirec ma'le quiyim se qaralauachi'.

¹⁴ No'm re'maqaite' nagui qaica ca 'ñirac, ca' ca lca'laxa na judioipi ỹoqa'a ca chicqa'gue ma'le. Qam qami' chaqai naua chicqoirauguilo qata'alli' ileue' ma'le. Ca' ¡sqoue quiyim vichirau'a qami' nashi, ma' qaỹahotaque qarotauañi' quedajo!

¹⁵ Co'na'le, ca' aso Ester ila' da la'qaatec queso Mardoqueo, 'naaco':

¹⁶ —Mo'e', lapooñireta' ná'ogue na judioipi quena Susa, qaiyi nqopaaqachit caỹim. Ca' qaica ca ỹa'ic chaqai ca ni'chigui quenaua tres na'xata'. Naua ilaata chaqai ỹim qai'neeta shinqa'tegue. Ca ma' ime, ca' shicpegue' ya'ỹau'a ñi nashi, 'eno'm dajo se nachiñiguit da naqataxac. Ca no'm qayalauat, qam 'eno'chaqai.

¹⁷ Ca co'na'le, ca' so Mardoqueo eec ipacqajanchigui dá'maq 'naac aso Ester.