Eclesiastés 5 - La'qaatqa ñi qota'olec Qota'olec & Qota'olec Novita Na Qomyipi

Ná'maq ra'paqataxantac queda chaalataxac

⁸ 'Neeto' re'laqaita quiyim 'ue ca 'laua qaica ca qaỹauaaque na 'xoraic chaqai quiyim se qaỹa'maxata'gue dá'maq no'uen ñicyaxac, ma' ná'maq lodegaxat nashi qoshiilec cá'maq liỹa nashi paguec lecaic, chaqai ná'maq paguec lecaic qoshiilgoto nauá'maq liỹa' paguec sqa lote'.

⁹ Ca' ¡dajo qohinac nqo'neuec da lesallaxa ca 'laua qoyintalec, chaqai ca nashi paguec quelola na no'ueenaxa!

¹⁰ Cá'maq nqo'ta quiyim 'xoic aca lam, se neme da lishoxo; cá'maq nqo'ta quiyim nesallaxanec, se ỹauana quiyim nalootañi nqai'en aca lam. Ca' dajo qai'neeta qaica quet cá'maq 'neeta,

¹¹ ma' quiyim nqo'neuec aca lam, ca' nqo'neuec acá'maq igajten. Ca ¿negue' cá'maq laueguec quiyim 'ue aca hueeto'ot? Ta'ta'a quiyim chi ỹa'ajantac acá'maq hueeto'ot.

¹² Cá'maq ro'ueenataxan, 'eno'm cocho'qui' ca ỹa'ic loqo'm 'xoic, qam ỹaatqajam 'te'tegue ca lelaxac; qam ca nesallaxanec da lesallaxa sqai 'tegue nqai'en da lelaxac.

¹³ 'Ue dá'maq ỹaatqajam chalego le'xoric seuana quenajo 'laua: dá'maq quiyim qalapoontañi da nesallaxa na'axat ma'le cá'maq hueeto'ot,

¹⁴ ma' no'm ỹo'maqajnac ca nemeenaxac, ca' sqoue imeetaho cá'ogue ca lesallaxa, chaqai no'm 'ue ca llaalec, ca' qaca aca taalec ma'le ca'maxare.

¹⁵ Ca dá'maq 'neetari' na' novi' quena 'laua, ca chaqaida 'neetari' ma' eec. Ma' na' ne'qaañi neetauec, chaqai qaica cá'maq i'xat quená'maq chicqaugui da lo'ueenataxanaxac.

¹⁶ Ca' dajo dá'maq chalego le'xoric, ma' dá'maq 'neetari' na' novi' quena 'laua, ca chaqaida 'neetari' ma' eec. Ca ¿negue' cá'maq naqato' quedá'ogue da lo'ueenataxanaxac? Qaica.

¹⁷ Chaqai dá'maq liỹa paguec la'aaxa, quiyim dá'ogue da nachaalataxac hueetaugui na napalaxa, chaqai 'xoic da ledaxac, nqui'ic chaqai da lauelgaxanaxac.