Eclesiastés 1 - La'qaatqa ñi qota'olec Qota'olec & Qota'olec Novita Na Qomyipi

Ná'ogue ná'maq qaiuana qaica ca 'negue

^1-2 Nauajo nauá'maq la'qaatqa so netaxaỹaq, llaalec so David, nashi na'le quiyi Jerusalén. ¡Na qaiuana qaica ca 'negue, qaica ca 'negue! ¡Ná'ogue qaica ca 'negue!

³ ¿Nega'ỹo' cá'maq naqat ca ỹale quiyim paguelec ca lo'ueenataxanaxac quenajo 'laua?

⁴ 'Ue na ne'qaañi, chaqai na liỹa ileu, qam na 'laua qaica ma' nadalaxat quet.

⁵ Nenoxonshiguim añi ra'aasa chaqai inoxonñi, chita'gue lotqai pilli'ñi ca loma', ca lotqai liỹa nenoxonshiguim.

⁶ Na nonot taỹa'gue da 'guiñi, ime, ca naqalgoxoñi lotqai taigue da rapiguim. ¡Naqalgoxoñi, lotqai rapil na nonot, chaqai lotqai liỹa naqalgoxoñi!

⁷ Na huaxaỹaq cana lachiugue taỹaxaso'ma aso huaaxai, qam aso huaaxai se no'xa; ca' lotqai pilegue dá'maq chicqa'gue ana lachiugue, ca lotqai pile'tegue só'maq chaqai'en llic.

⁸ Ca' qaica quet cá'maq ishit ỹa'xat quiyim qaỹamaqa'que naua'que nauajo; chaqai qaica quet cá'maq qaiuana chaqai cá'maq qara'xaỹaque quiyim qaiyi ỹa'maxagui lauel ca qom.

⁹ Qaica quet cá'maq sqai shi'gue 'ue; qaica qaỹo'uet quiyim sqai shi'gue qaỹo'uet. ¡Qaica ca dalaxaic quenajo 'laua!

¹⁰ Sqoue quiyim 'ue ca 'naac: ¡Najo maxasa' dalaxaic! Qam so'maxare shi'co' quen 'ue quesaua ñaxari na' saqa'lecaua qomi'.

¹¹ Qaicoua'ahi sauá'maq shi'co' quen 'vii, chaqai qaicoua'ahi ma'le nauá'maq ñaqa naate' quená'maq co'uaataxanta qomyipi ma'le.

Dá'maq ỹovirau'a ỹa'den só'maq netaxaỹaq

¹² Ỹim ná'maq ỹim netaxaỹaq, ỹim nashi quena Israel, sena'ñi na Jerusalén.

¹³ Ca' ỹaatqajam ñomatalta' quiyim sa'ajan chaqai ñapaxaguina queda chi ỹa'deenaxanaxa ná'ogue ná'maq qaỹo'ueetetac quena 'laua. Ca' ¡chalego lecaic dá'maq ñi qota'olec illaalec na ỹalliripi, qaiyi nemanachit nqai'en na qomyipi!

¹⁴ Ca' yitan quiyim ná'ogue ná'maq qaỹo'ueetetac quena 'laua, qaica quet cá'maq 'negue, 'ec qaỹahotaque neconecsec na nonot.

¹⁵ ¡Chaqai se qaishit qaỹalamaxat cá'maq chaqai'en namaq, chaqai quiyim qanaloqochin cá'maq sqaica!

^16-17 Ca' na'le, ca' ñanecalta', ca' shinac: 'Ena seuete'e, 'ec ỹim chalego lecaic ỹale, paguec ỹa'deenaxanaxa quesá'ogue só'maq 'au nashillipi quena Jerusalén; ỹaatqajam ñomatalta' ñañaañiguit da na'deenec chaqai na'deenataxanaxac chaqai da hualoxonqaishic chaqai da mogollishic, qam qaidaata quiyim yitan quiyim dajo 'ec cá'maq ỹahotaque nollaañi ca nonot.

¹⁸ Dá'maq quiyim paguec da na'deenaxanaxa, ca' paguec ca nedaxac; chaqai no'm paguec na qaỹa'den, paguec ca ne'xoric.