Deuteronomio 30 - La'qaatqa ñi qota'olec Qota'olec & Qota'olec Novita Na Qomyipi

Da 'neeta cá'maq icoñiguit ca dalaxaic nqouagaxa

¹¹ Ca' dajo nelaataxanaxac saanec nagui caqamiri ỹaatqajam mesqaica ca lqalaic caqamiri, qam da'maxare mesqaida quiyim sqai shichii quet 'viichii.

¹² Sqai hueeta'gue da piguim quiyim qohinac: ¿Negue' queto' cá'maq ishit taigue da piguim, ca' noda'alo qomi' chaqai qarapaxaguinegue quiyim so'ueetaq?

¹³ Chaqai sqai hueeta'gue da liỹa lahi ana huaaxai quiyim qohinac: ¿Negue' queto' ca ishit ỹapaca'ta ana huaaxai, ca' noda'alo qomi', ca ỹapaxaguineguelo qomi' quiyim so'ueetaq?

¹⁴ Ma' dajo nelaataxanaxac ỹaatqajam sqoỹoqaque caqamiri; ỹaatqajam hueetaugui na qadapi' quiyim taxahi', chaqai da ra'deenataxanaxaqui' quiyim shichi' 'viichi'.

¹⁵ Ca' nagui, ca spa'xano'oto qamiri, qaiyi nca'aiguilo naua dos: da nca'laxa chaqai dá'maq no'uen, loqo'm da nelauaxa chaqai da se no'uen.

¹⁶ No'm na'xaỹaxañii'ta dá'maq shinac nagui, chaqai rqo'chiỹa ñi qara'gaxala' qota'olec, chaqai quiitalec da llicyaxac, chaqai pacqajñichiguilo naua lelaataxanaxaco, laqataxaco, la'qaatqa, ca' rca'lliiuec chaqai 'xoic ma'le ca qachaalaxahipi. Ca' ñi qara'gaxala' qota'olec nqouagueguelo qamiri ma'le quecá'maq 'laua ñiỹalec ma'le.

¹⁷ Qam no'm se na'xaỹaxañiỹa dá'ogue dajo, ta'ta'a quiyim quii'uegue na nashiilec nqolaquipi chaqai 'yiitacoto naua re'cootallii,

¹⁸ ca' nagui chaqa'ma' saqatalo qamiri quiyim rillivii ma'le, sqaica ca nañitqari. Chaqai mesqai shi'gom ñiitalec ca 'laua qadoxoñiguii ma'le quiyim mashic ime paguiỹa'ta aso lachiugue Jordán.

¹⁹ Quenajo na'xa'a, ca spa'xano'ot na piguim chaqai na 'laua quiyim reloqota'alo qamiri quiyim mashic saanema qamiri quiyim nca'aiguilo daua dos: da nca'laxa loqo'm da nelauaxa, da no'uen loqo'm da se no'uen. Ca' no'uen quiyim nca'aiua'a ca nca'laxa, qaiyi rca'lliiuec chaqai na qachaalaxahipi.

²⁰ Ỹaatqajam rqo'chiỹa ñi qara'gaxala' qota'olec, na'xaỹaxañii'ta chaqai raqamaxaita, ma' chaqaida dá'maq hueetagui da nachaalataxaguii chaqai quiyim sqaua' rillivii, ca shi'gom ñiitalec na 'laua ná'maq ñi qara'gaxala' nallitalta' na' ỹachaxantac quiyim ỹaanem so Abraham, Isaac, chaqai so Jacob, sauá'maq 'auaxaqa qata'allii.