Deuteronomio 27 - La'qaatqa ñi qota'olec Qota'olec & Qota'olec Novita Na Qomyipi

Na ỹoreta'oguit nouaxanaxaset cá'maq se no'uen ca ỹo'uet

¹² Ca qamiri ma' ime paguiỹa'ta aso lachiugue Jordán, ca' na llaalqaipi so Simeón, Leví, Judá, Isacar, José chaqai so Benjamín, ná'ogue na'maxare hueetalec ma'le añi quemaralec qa' ladocai leenaxat Gerizim, qaiyi chicqochigui ca nqouagaxa ná'ogue na qomyipi.

¹³ Ca' na llaalqaipi so Rubén, Gad, Aser, Zabulón, Dan chaqai so Neftalí, ca na'maxare hueetalec ma'le ada qa' ladocai Ebal, qaiyi taalec cá'maq qaỹa'xat nouaxanaxaset quiyim 'ue ca qaỹo'uet.

¹⁴ Ca' na llaalqaipi so Leví chaqaina ná'maq retaqaugui ma'le so lauo' laseripi liỹa llaalqaipi so Israel quiyim ỹaatqajam netenegue da la'qaatec, 'neetasa':

¹⁵ Ñi qota'olec ỹo'uet ca nouaxanaxaset cá'maq ỹo'uet ca lashiilec, icaxajta' ca lecat, ỹo'uet ca ladenqatec nqolac ca lecat lo'o, chaqai quiyim ỹa'ue ca illa'ñi qam ỹoxochichiguiñi, ca ñi qara'gaxala' ỹaatqajam se nqo'ta. Ca ná'ogue na qomyipi 'naac: Ca' chaqaida 'neeta dajo.

¹⁶ Ñi qota'olec ỹo'uet ca nouaxanaxaset cá'maq se nqo'ta ca leta'a chaqai aca late'e. Ca ná'ogue na qomyipi 'naac: Ajá'a, chaqaida 'neeta dajo.

¹⁷ Ñi qota'olec ỹa'ue ca nouaxanaxaset cá'maq nqo'naxatec ca lqodoc ca na'laua, ca nqo'naxajta' ca na'laua ca la'aayaxaua. Ca ná'ogue na qomyipi 'naac: Ajá'a, chaqaida 'neeta dajo.

¹⁸ Ñi qota'olec ỹa'ue ca nouaxanaxaset cá'maq ỹit nqai'en ca llic ca qai'laq. Ca ná'ogue na qomyipi 'naac: Ajá'a, chaqaida 'neeta dajo.

¹⁹ Ñi qota'olec ỹa'ue ca nouaxanaxaset cá'maq ỹo'uet ca se ỹa'maxañi queca ỹoqa'a ca chicqa'gue, loqo'm aca pa'ỹe, loqo'm ca na'peloq. Ca ná'ogue na qomyipi 'naac: Ajá'a, chaqaida 'neeta dajo.

²⁰ Ñi qota'olec ỹa'ue ca nouaxanaxaset cá'maq lapa'ñi' aca loua ca leta'a, ma' quedajo, ca i'naari' ca leta'a. Ca ná'ogue na qomyipi 'naac: Ajá'a, chaqaida 'neeta dajo.

²¹ Ñi qota'olec ỹa'ue ca nouaxanaxaset cá'maq nanoiquiñiguit ca isecỹac. Ca ná'ogue na qomyipi 'naac: Ajá'a, chaqaida 'neeta dajo.

²² Ñi qota'olec ỹa'ue ca nouaxanaxaset cá'maq lapa'ñi' aca lqaỹa, 'eno'm chi leta'añaxaua, loqo'm chi late'eñaxaua. Ca ná'ogue na qomyipi 'naac: Ajá'a, chaqaida 'neeta dajo.

²³ Ñi qota'olec ỹa'ue ca nouaxanaxaset cá'maq lapa'ñi' aca ni'ỹoqoro. Ca ná'ogue na qomyipi 'naac: Ajá'a, chaqaida 'neeta dajo.

²⁴ Ñi qota'olec ỹa'ue ca nouaxanaxaset cá'maq ỹalauat quiyim i'laxateta ca liỹa. Ca ná'ogue na qomyipi 'naac: Ajá'a, chaqaida 'neeta dajo.

²⁵ Ñi qota'olec ỹa'ue ca nouaxanaxaset cá'maq qaishiuetenta quiyim ỹalauat ca liỹa quiyim qaica ca lasauaxaset. Ca ná'ogue na qomyipi 'naac: Ajá'a, chaqaida 'neeta dajo.

²⁶ Ñi qota'olec ỹa'ue ca nouaxanaxaset cá'maq se na'xaỹaxanalo naua'que naua napaxaguinataxanaxaco quiyim ỹo'ueete'. Ca ná'ogue na qomyipi 'naac: Ajá'a, chaqaida 'neeta dajo.