Deuteronomio 25 - La'qaatqa ñi qota'olec Qota'olec & Qota'olec Novita Na Qomyipi

Da naqataxac quiyim ca ỹale o'ñiguit aca li'ỹoxoua

⁵ Ca no'm 'vii caua dos nqaỹa' quiyim cá'ogue ca la'aate', ca' quiyim 'óna ca ileu quecaua'maxare, qam saqa'leca llaalec, ca' acá'maq pa'ỹe sqai ỹoqa'a ca loua quiyim 'on. Ta'ta'a quiyim chi reloqo'chiguit cá'maq lqaỹa cá'maq loua sou, ca' ipaquichigui nqai'en dá'maq leloxoỹaxac ca ni'ỹoxoua.

⁶ Ca cá'maq 'auaxaic llaalec ne'qaañi, ca ỹanegue da leenaxat cá'maq lqaỹa sou, qaiyi sqai pal ca leenaxat quena Israel.

⁷ Qam no'm cá'maq ỹale ỹahotaque quiyim se ipaguiguit aca li'ỹoxoua, ca aca'maxare quepegue' ca letaxaỹaqa' na qo'xoiquipi. Ca' 'naac: Ñi i'ỹoxoua se ipaca'guit aỹim quiyim so'ñiguit, ma' se nqo'ta quiyim queeta sqa pal da leenaxat ca lqaỹa sou quena Israel. Ca ñi'maxare se ipaguiguit aỹim quiyim ỹoua.

⁸ Ca ma'le, ca' so qo'xoiquipi quiyi na'a' roỹaxane'oga so'maxare, ca retaxaỹa'pegue'. Ca no'm ca'maxare ipacalec quiyim se loua aca'maxare,

⁹ ca ma'le, ca só'maq li'ỹoxoua nqo'neu'a so'maxare, ca' naqat so lapela' so li'ỹoxoua, iuanchigui nqai'en so qo'xoiquipi. Ime, ca' natoxogui na lashic, ca' 'naapega so'maxare: ¡'Eda qohine'tegue cá'maq ỹale quiyim se ỹa'maxaren quiyim queeta ca llaalquenaxanaxac ca lqaỹa!

¹⁰ Ca' ca llaalqaipi ca'maxare qaỹamata'gue quena Israel: llaalqaipi ca qanaqat ca lapela'. (25.11-19 Liỹa' naqataxaco, chaqai qaramaxasoxonlec quiyim qanomachichiguiñi so llaalqaipi so Amalec.)