Deuteronomio 20 - La'qaatqa ñi qota'olec Qota'olec & Qota'olec Novita Na Qomyipi

Da leloxoỹaxac ca lauataq

¹ No'm qamiri quiiguit quiyim nalauachii'e' ca npa'guenaxauahi quiyim daañiỹa'guit ca'maxare neetalec na laloipi shipiguiripi chaqai ana nahoglena lauataxaqui chaqai paguec 'xoic ca nalliripi caqamiri, qam totaxan ro'chiỹa, ma' qamiri ỹalequetauguilo ñi qara'gaxala' qota'olec caqamiri, ñí'maq naqata'alo qamiri na'le quiyi Egipto.

² Ca ma' ỹovita ca laloqo' quiyim nalauachii, ca cá'maq netaxaỹaxanqajnec quiyim retaxaỹa'pegue' ñi qota'a, ca' retaqa quena nalauataxairipi.

³ Ca 'naac ma'le: Ñaq na'xaỹaxañii qamiri Israel llaalqaipi. Nagui, ca' nalauachii'e' na npa'guenaxauahi. 'Neeto' rolaavitegueñi, chaqai se ro'chiitac, se re'loxollii chaqai se ro'daxachiuec.

⁴ Ma' ñi qara'gaxala' qota'olec neetauguilo qamiri. Ca ñi'maxare pa'a'guit quiyim reloguie'e' ca npa'guenaxauahi, ca ñi'maxare ỹo'uet quiyim qadoxoñiguii ma'le.

⁵ Ca ma'le, ca' retaqa na nashillipi, ca 'naac caqamiri: No'm 'ue ca chita'gue ỹomat ca lauo', ca no'm saqa' huaugui, ca' pil quepegue' naugui ca la'a'. 'Neeto' ileuaugui na lauataq, ca lotqai ỹoqa'a ca 'au naugui.

⁶ Chaqai no'm 'ue caqamiri ca chita'gue danaxan cana 'uva, ca' quiyim saqa' ỹa'ic ana la ca'maxare, ca' pilo queca la'a', 'neeto' quiyim ileuaugui na lauataq, ca' ỹoqa'a ca naqat aca lanecse 'uva.

⁷ Chaqai no'm 'ue caqamiri ca shim 'on, qam saqa' 'on, ca ca'maxare 'maxaraic quiyim pila'a ca la'a'. 'Ase' no'm ileuaugui na lauataq, ca' ỹoqa'a ca o'ñiguit acá'maq ỹahotaque quiyim loua.

⁸ Ime, ca' na nashillipi, ca lotqai liỹa retaqaugui na nalliripi. Ca 'naacsa': No'm 'ue ca 'ue ca lqolonaxa caqamiri chaqai se ra'ñiigui na lauel, ca 'maxaraic quiyim queuo queca la'a'. 'Ase' no'm no'chi nqai'en na liỹaripi.

⁹ Ca ma' ca nashillipi ime ca letaxaỹaxac, ca cá'maq nashillipi naloqojñi 'auetauec, ca qaỹa'queetalec quecá'maq nalliripi.

¹⁰ Ca ma' palaitau'a ca na'a' lodegaxat quiyim viitaque nalauachii'e', qam 'au taxaỹa'pegue' quiyim neman nqai'ñii.

¹¹ Ca no'm cá'maq qomyipi na'ñi cajo na'a' nemanachiguita qamiri, ca' ỹaxanta'pe qamiri noxoñiugui, ca ca'maxare ro'ueenataxanoto qamiri chi ra'aquiipi, ca' lari quiyim ro'ueenataxan.

¹² Qam no'm se nemañiguita qamiri, ta'ta'a quiyim ỹahotaque nalauajto qamiri, ca' qamiri nahiquiñiñi cajo na'a', ca' nalauachii'e'.

¹³ Ca' ñi qara'gaxala' qota'olec ỹo'uet quiyim qadoxoñiguii, ca' qamiri nalauachiñi cá'ogue cá'maq na'ñi cajo na'a', dohita'a na lecat.

¹⁴ Na 'aallipi chaqai na ñaaqaipioqui', na neloipi chaqai ná'ogue ná'maq hueetaugui cajo na'a', ca' chi qatooỹaguii. Ca qamiri shichii viñii ná'ogue ná'maq ỹa'maxarenta coñiỹa ñi qara'gaxala' qota'olec queca npa'guenaxauahi.

¹⁵ Ca' chaqaida 'ñii'tegue qamiri quená'ogue na na'aateripi qoỹoqote'oga caqamiri quecá'maq ñiita'ñi ma'le, chaqai sqai lliguita'piguit ná'ogue ná'maq ỹoreta'oguit qomyipi.

¹⁶ Qam quená'maq la'aateripi na ỹoreta'oguit qomyipi quená'maq ñi qara'gaxala' qota'olec ỹaanema qamiri quiyim ñiỹalec, ca' qaica ca no'ueenauec nqai'ñii, ná'ogue nomachichiguiñi.

¹⁷ Ta'ta'a quiyim ná'ogue nimiichiguiñi nqai'ñii. 'Ec nqai'ñii aca rachitaxanataxanqachii quiñi qara'gaxala' na hititaipi, amorreoipi, cananeoipi, ferezeoipi, heveoipi chaqai na jebuseoipi, ma' chaqaida dá'maq 'naac ñi qara'gaxala'.

¹⁸ Qaiyi se qaỹapaxaguineguelo qamiri quiyim 'viichii dá'maq ỹo'ueetetac chalego la'aaxa dá'maq ỹo'ueetetac quena' imaqachintac na lashiilqaipi nadenqatqaipi, ca' chicqochigui quiyim ỹo'uet ca rasauaxashichii quiñi qara'gaxala' qota'olec.

¹⁹ Ca no'm sham nalauachii'e' ca na'a' lodegaxat, qam ỹouen quiyim 'xoic ca na'xataripi nahiquinchiguiñi, qam sqai huaxañilec ana qo'paq, viite'e ana qai'pe. Ma' qamiri viñii ma'le quiyim a'guii aca la, chaqai ana'maxare chi qo'paq, sqai 'neete'm qamiri. Ma' qamiri qomi', ca na'maxare se ishit nalauajto qamiri.

²⁰ Qam qanaata ana qo'paq se qaỹa'ic ca la, qanaata shichii huaxañilec quiyim rouenahi ma' nahiquiñiñi cajo na'a', chi ỹovireta'a quiyim qadoxoñiguii ca'maxare.