Daniel 7 - La'qaatqa ñi qota'olec Qota'olec & Qota'olec Novita Na Qomyipi

Da neuanaxanaxac quesaua cuatro ise' leta'al

¹ 'Ue so pe queso 'auaxaic ñaaxa queda lo'ueenataxanaxac so nashi Belsasar quiyi Babilonia, ca' so Daniel 'ue so le'guemataxac chaqai leuanaxanaxac. Qam na' nelouec, ca' ỹichiñi sauá'maq paguec lecaigue' le'guemataxaco. Ca só'maq ỹiriñi 'neetasa':

² Ỹim queso i'guemataxac, ca' seuana na nonot chicqo'teguelo naua cuatro llico quiyim npe'taxanshiguim, ca' idaxan na huaxaỹaq caso huaaxai late'ogue'.

³ Ca na'le, ca' chi ne'laqataxanchirishiguim saua cuatro ise' chalego lecaigue', ỹoreta'oguita da no'ueenataxague', nenoxoñishiguim caso huaaxai.

⁴ Só'maq 'auaxaic 'ec na sauaxaic leta'a, qam 'vii laua' 'ec o'ic laua'. Ca na' ñaq sa'ajantac, ca' qano'teguerec saua laua', ca qane'laxataxanaxanshiguim quiyi 'laua, ca' co'viiñi nqohin quesaua lichil, ca na' qanachaalataxanñi 'ec nqohin na qom. Ca' so lapio'xo qaishichigui na qom la'deenataxanaxac.

⁵ Ca' so liỹa 'ec ana layoraxai late'e, ỹapacashiguim da liỹa lahi, ca so'maxare ỹa'queeta'alo saua tres nemeenqa. Ca 'ue so na'qaatec sa'xaỹaque qohintapega: ¡Mo'e', a'qui' na la'at canchaqai taachi'ñi nqai'ñi' cá'maq 'qui'!

⁶ Ca' so liỹa 'ec na regat ramoqogui, qam 'vii saua cuatro laua' quena lelaq; qai'neeta seuane'talo saua cuatro lqahigo' chaqai qoỹaanem da lquesaxanaxa.

⁷ Ca só'maq liỹa isecỹac lodegaxat seuana queso iuanaxanaxac, chalego da lichic, ỹo'uet da nqolonaxa chaqai chalego da lquesaxanaxa. Naua louee late'el nodaachiriñi fierro; ná'ogue ỹalauateta'oguit, ỹopoxoỹaxachigui, chaqai ná'maq no'ueenauec, ca' co'vigui. Sojo isecỹac ỹaatqajam ỹoqa'am queso liỹaripi seuana queso ilaxac, ma' mashic diez aso lasote quena lqahic.

⁸ Ca na' ñaqai sa'ajanta'pe saua lasote, ca seuane'ta aso liỹa lasote chicqochiguiñiguilo saua'maxare, qam paguec cocho'lli'. Ca na'le, ca' qano'chiquishiguim saua tres lasote, qaiyi qaỹa'ue loma' só'maq co'uaataxanaxaic nenoxonshiguim. So'maxare 'vii nqote' 'ec na qom, ca 'ue so lap retaqatac, chalego lque'gue' naua la'qaatqa.

Da louaxanaxanaxac ñi qota'olec

⁹ Ca' ñaqai queeta sa'ajantac, ca vire'ta qoỹande'oguiyi saua nashi nqa'xanaxaqui, ca' 'ue so qo'xoicoqui' nqa'xanñi. Saua loho lalagaxaqa 'ec ana loñi nacañi, na lqahic laue 'ec na qagreta laue co'teeta. So nqa'xanaxaqui chaqai saua laviol ỹaatqajam norec lauaq,

¹⁰ chaqai aso lachiugue, qam norec chicqotacot so'maxare. Ỹaatqajam 'xoic ná'maq ro'ueenataxantacot so'maxare chaqai tot qaica naloqochin só'maq reloqoto'ot so'maxare. Taañi so nimiitaxanaxac quiyi'maxare, ca' qaỹauachiguilo saua lerel.

¹¹ Ca' ỹim sa'ajantac paguec da i'laxa quenauá'maq la'aaqa' saua la'qaatqa só'maq lasote hueetañigui na lavinñi; chaqai na' ñaq sa'ajantac, ca' qaỹalauat só'maq isecỹac lodegaxat, ca qaichaqatajlec. Ime, ca' qainaxañigui yi norec, qaiyi ỹavic.

¹² Ca qai'neeta saua liỹa' ise' leta'al qarouootaxana'gue da lquesaxanqa', qam ñaqai queeta nca'leetauec nqohin, toco' ma' ỹovita ca laloqo'.

¹³ Ca' ỹim ñaqai shiquetalec da ỹa'ajnaxanaxac queso pe. Ca na' ncopa: Ca' 'ue so seuañi'chiguit naquetaugui so naueguelec ỹaatqajam 'nejem so ỹale llaalec, ca so'maxare quepegue' yí'maq neeta'ñi só'maq qo'xoic ỹale; ca qaỹo'uet quiyim nqo'neu'a so'maxare.

¹⁴ Ca' qoỹaanem da lquesaxanaxa, da lauaq chaqai da no'ueenataxanaxac quiyim nashi, ca' na ỹoreta'oguit qomyipi chaqai la'qaatec ro'ueenataxanot. Da lquesaxanaxa se neme, chaqaidaata 'neetari', chaqai qaica ỹosogui da lelaataxanaxac quiyim nashi.

¹⁵ Ca' ỹim Daniel ñauata'guit mashic paguec so iqolonaxa chaqai 'xoic da ỹachitachic quesá'ogue só'maq seuanchigui,

¹⁶ ca 'ue so ñqo'neu'a quesauá'maq nachaatesañi, ca' sashiila quiyim ichoxochim dá'ogue. Ca so'maxare saachiguit, ca 'naac caỹim:

¹⁷ Sauajo cuatro ise' leta'al, chaqaisaua saua cuatro nashil ỹoiquensac ma'le ná'ogue na 'laua.

¹⁸ Qam ma' ime, ca' dajo no'ueenataxanaxac qoỹaanougui na lalamaxareteripi ñi qota'olec qaica ca 'nejem, ca' qaica lqodoc quiyim ỹoiquentac na'maxare.

¹⁹ Ca' ỹim 'ue da ipagaxallic quiyim ỹaatqajam sa'deenta cá'maq 'neeta so co'uaataxanaxaic isecỹac lodegaxat, ma' ỹoqa'a da no'ueenataxac quesaua liỹa', ma' da no'ueenataxac ỹaatqajam chaqaic. Naua louee imerañi fierro chaqai naua lenachi' bronce; chaqai ná'ogue ỹalauat, ỹopoxoỹaxatañi chaqai co'vigui ná'maq no'ueenauec.

²⁰ Chaqai qai'neeta sahotaque paguec sa'deenta cá'maq 'neete' saua diez lasote chaqai cá'maq 'neeta aso lasote paguec cocho'lli', só'maq 'vii naua nqote' chaqai 'ue lap, chaqai chalego lquesaxanqa' naua la'qaatqa, ca vire'ta 'ec paguec lecaic queso liỹa lasotellipi, chaqai saua tres lasotel qanaqate' quiyim qaỹa'ue loma'.

²¹ Ca na'le, ca' seuane'ta só'maq lasote cocho'lli' reloquita'pegue' na lalamaxaret ñi qota'olec, ca loxonec quen,

²² ca vire'ta na' novi' so nqo'xonec, ca' qoshiilec so lalamaxareteripi lauo' ñí'maq qota'olec qaica ca 'nejem, ma' ỹovirelec ca laloqo' quiyim na lalamaxaret lauo' ñi qota'olec icoñiguit da no'ueenataxanaxac quiyim ỹoiquentac ná'ogue nanchaqaina.

²³ Ca so nqo'xonec 'naac: So co'uaataxanaxaic isecỹac lodegaxat chaqaiso só'maq co'uaataxanaxaic nashi neetalec ma'le na 'laua, ỹoqa'a da no'ueenataxac quená'ogue na liỹaripi. So'maxare ỹalauat ma'le ná'ogue na neetalec na 'laua, co'vigui chaqai ỹopoxoỹaxatañi.

²⁴ Saua diez lasote, saua'maxare diez nashillipi ro'ueenataxane' ma'le quiyim qoỹoiquentac ná'ogue nanchaqaina. Ma' ime'uegue da lo'ueenataxanaxague' saua'maxare, ca lotqai 'ue ca liỹa renojshiguim quiyim nashi, ca da lo'ueenataxanaxac ỹoqa'a ma'le quesaua 'auaxaqa, ca so'maxare ỹamaxarec saua liỹa' tres nashil.

²⁵ So'maxare queu'a ma'le ñi qota'olec qaica nqai 'nejem, chi ỹovireta'a ma'le quiyim ỹa'llaxat na lalamaxareteripi ñi'maxare; ỹahotaque ỹadalaxat ma'le da lelaataxanaxac ñi qota'olec chaqai naua lemaqachico quiyim qaimaqachin ñi'maxare, chaqai ná'maq lalamaxareteripi ñi qota'olec qoỹoiquentac ma'le queso'maxare quesaua tres ñaxari chaqai seis shiriguiri.

²⁶ Qam so nimiitaxanyipi quena nasauaxaset chaqa'ma' ỹa'ue da nouaxanaxaset nqai'en chaqai qarouootaxana'gue ma'le da lquesaxanaxa, ca chaqa'ma' qailliita'anyi, qaỹopoxoỹaxateta.

²⁷ Chaqai da no'ueenataxanaxac quiyim qoỹoiquentac nanchaqaina, da nquesaxanaxa chaqai da lauaq ná'ogue na nashillipi quena 'laua, qoỹaanem ma'le na lalamaxaret lauo' ñi qota'olec qaica ca 'nejemalam. Da lo'ueenataxanaxac chaqaidaata 'neetari', sqaica lqodoc, chaqai ná'ogue na ỹoreta'oguit qomyipi quena 'laua ro'ueenataxanot, chaqai cá'maq 'naac, ca' na'xaỹaxane'ta.

²⁸ Ca' chaqaiyi lqodoc da ỹa'qaataxanaxac. Ca' ỹim Daniel ỹaatqajam 'xoic da ỹachitachic na'le chaqai mashic ñalacqatec; qam qaica ca sa'xatem quecá'maq 'neeta dajo. (8.1—12.13 So Daniel 'ue da leuanaxanaxac, ca so nelaatec piguim le'ec ichoxot da leloxoỹaxac.)