Colosenses 3 - La'qaatqa ñi qota'olec Qota'olec & Qota'olec Novita Na Qomyipi

¹ Ca' qamiri, ma' mashic shi'gue rca'laxauahi so Cristo, ca' daañiỹaque cá'maq hueeta'gue da piguim dá'maq neeta'gue so Cristo, nqa'xantañi, pa'aata'gue da loic ñi qota'a.

² 'Yiiñitapegalo nauá'maq hueesa'gue da piguim; mesqai 'yiiñitapegalo naua hueesalec na 'laua.

³ Ma' qamiri mashic relauaxauahi so Cristo, ca' nagui, ca dá'maq ỹaatqajam rca'laxahi queso'maxare nañoxoteso'ot ñi qota'a.

⁴ Ma' chaqaiso so Cristo só'maq ỹaatqajam qarca'laxa. Ca ma' liỹa novi' nachaxan, ca' qamiri qai'neeta re'xoi' ma'le queso'maxare, ca' nouañiỹau'a da lauaq so'maxare.

Dá'maq ñauapec chaalataxac chaqai dá'maq dalaxaic

⁵ Ca' vichiguiño' qamiri ỹaatqajam 'ec ileu nqai'ñii ná'ogue ná'maq no'ueenataxaguii hueetalec na 'laua: Ca' qaica quet cá'maq hueeta'piguit quet aca se loua, chaqai sqo 'viichii cá'maq rapio'qotaxan, chaqai sqai quiita'pegue' na rqo'itaxanqachiguii chaqai quená'maq se no'uen, chaqai se qo'itaxanqachaqaqa qamiri, ma' dajo 'ec quiyim qanqouagaxainot ca nashiilec nqolac.

⁶ Ma' chaqainaua nauá'maq chicqochigui dá'maq chalego lecaic louaxanaxanaxac ñi qota'a quená'maq se na'xaỹaxana ñi'maxare.

⁷ Chaqai qamiri 'viichitac quen ná'ogue najo quesó'maq 'auaxaic no'ueenataxaguii.

⁸ Qam nagui 'xañiñi ná'ogue najo: nonogoxonaxac, nayiloxoc, ná'ogue na se no'uen, no'ooqotaxanaxac, chaqai naua na'qaatqa la'axaqa.

⁹ Se na'majñiỹot ca liỹa, ma' shi'gue ỹochihe'oga dá'maq 'auaxaic no'ueenataxaguii chaqai quená'maq shi'gue quen 'viichitac.

¹⁰ Chaqai mashic ñiiñi dá'maq dalaxaic 'ueenataxac, ca noquiiquetashiguim da nadalqataxac, chi ỹovireta'a quiyim 'nejem da no'ueenataxac ñi qota'a ma' chaqaiñi ñí'maq ỹo'uet, chi ỹovireta'a quiyim ỹaatqajam qaỹa'deenta ñi'maxare.

¹¹ Qam dajo mesqaida quet quiyim judío le'ec ca qom loqo'm quiyim mesqai judío, loqo'm quiyim 'ue ca netanec na loshicmaxa loqo'm ca sqaica ca netanec, chaqai ca ỹoqa'a ca chicqa'gue loqo'm ca se na'maxat, loqo'm ca na'ac loqo'm se na'ac. Ma' chaqaiso so Cristo qaisoota, ca' hueetaugui ná'ogue na qomyipi.

¹² Ma' ñi qota'a i'xorene' qamiri, ca nca'au'alo qamiri ma' quiyim qamiri lalamaxarete'. Ca no'uen quiyim qamiri qouagaxanqachaqaqa, 'naxanaxaraqa, sqai qamiri nemaqajnaxaqa, nemanataxaiqa chaqai hualaqhuaqa.

¹³ Chaqai ỹaatqajam 'ue da reualaxaviguii queca riỹahi, chaqai sqai caapeguem no'm 'ue ca se no'uen qohine'tegue queca liỹa. Ca dá'maq 'ne'tegue so Cristo quiyim i'xorene' qamiri, ca' chaqaida 'ñii'tegue qamiri qai'neeta.

¹⁴ Qam dá'maq ỹapacauec quená'ogue, quiyim 'xoic ca re'xorenataxanaxahi, ma' chaqaida dá'maq lapoonta' qamiri, chaqai nalogoñi nqai'en ná'ogue nanchaqaina.

¹⁵ Ca' da na'maxa chicqo'ot ñi qota'a ỹoiquenta'pe nqai'ñii naua re'taxanatahi, ma' chaqaida dá'maq ỹahotaque ñi'maxare na' roỹaxanalo qamiri quiyim lliguiỹau'a so 'oonoqui' noshicmaxa. Ca' necoñitaque da na'aachicyaxaguii.

¹⁶ Chaqai da lapaxaguinataxanaxac so Cristo no'qaachiguilo nqai'ne' naua re'taxanatahi. Napaxaguiñita'ta' chaqai ỹaatqajam 'yiiñii quiyim na'ñaxachita'ta'. Chaqai no'm 'ueenaxañii, qam 'viiñii ná'ogue na ỹoreta'oguit no'ueenqaipi chicqo'ot so Espíritu Santo. Chaqai chicqochigui nqai'ñii añi re'taxanatahi quiyim 'ỹaañitacot da na'aachicyaxaguii ñi qota'a.

¹⁷ Chaqai quecá'maq canchaqaica 'viichii loqo'm quecá'maq 'xachii, ca ná'ogue 'viichii, qam quiichigui nqai'ñii da leenaxat so qara'gaxala' Jesús. Quiichigui nqai'ñii so'maxare quiyim 'ỹaañitacot da na'aachicyaxaguii ñi qota'olec.

Dá'maq no'ueenataxac ná'maq mashic icoñiguit da na'qaatec quiyim quelola ca liỹa

¹⁸ Qamiri 'aallipi ma' mashic o'ñii, ca ỹaatqajam na'xaỹaxañii'ta ca rouahi, ma' chaqaida dajo dá'maq no'ueenataxac cá'maq mashic huelec so qara'gaxala'.

¹⁹ Chaqai qamiri ỹalliripi mashic 'ue ana rouahi, ca' 'xoriñii aca rouahi, ma' se no'uen quiyim sqa 'maxachiỹa'gue.

²⁰ Chaqai qamiri ñaaqaipi, ỹaatqajam na'xaỹaxañii'talo naua qata'alli, ma' chaqaida dá'maq ỹa'maxarenta ñi qara'gaxala' qota'a.

²¹ Chaqai qamiri ma' qamiri neta'al, mesqai 'ooqochichii naua qachaalaxahi, qaiyi mesqai ỹolaugui lauel.

²² Chaqai qamiri ma' qamiri nelaatqaipi, ỹaatqajam na'xaỹaxañii'ta quecanchaqai 'naac ca na'coori quenajo 'laua. Mesqaidaata quiyim ỹa'ajanta'pe qamiri, ca' raqamaxaita, ma' viitaque nqo'talo qamiri. Ta'ta'a quiyim raqamaxaita, richilliỹañi quiñi qota'a.

²³ Ca' quecanchaqaica 'viichii, qam raqamaxaita, 'ec 'ueenataxañitacot so qara'gaxala', mesqai 'ec 'ueenataxañitacot cá'maq re'qoochigui qom.

²⁴ Ma' qamiri mashic shi'gue 'yiiñii quiyim ñi qara'gaxala' ỹaanema qamiri ma'le cá'maq ỹa'maxatetañi ỹahotaque ỹaanem ná'maq lalamaxareteripi. Ma' qamiri 'ueenataxañitacot so Cristo só'maq ỹaatqajam ra'gaxalari.

²⁵ Qam cá'maq ỹoueetetac ca se no'uen, ca' icoñiguit cá'maq se no'uen laseue' cá'maq ỹo'ueetetac. Ma' ñi qota'a qaica quet cá'maq ỹapacqajnauec quiyim nqo'ta ca qom queca liỹa.