Cantares 5 - La'qaatqa ñi qota'olec Qota'olec & Qota'olec Novita Na Qomyipi

'Naac so ỹale

¹ Mashic shi'gue seuetaugui na ỹanaxanqa', qami' ñapiitaxauo'lli'. Mashic secona ana ñimirra chaqai na ño'daxaraic lahita, shi'gue se'guentac na rapic li'i hueetagui ana lapa, shi'gue ñi'teetapigui na lataxa chaqai naua lo'i'. Qamiri qarqo'itqate' qanauochaxaua', qui'ii chaqai ni'chii, ¡canchi lecaata cá'maq ni'chiigui!

'Naac so liỹa 'aallipi 'Naac aso 'aalo

² Ỹim selaqata, qam añi i'taxanata nelootauec. Ca' sa'xaỹaque so iqo'itaxat noỹaxantapego quena lasom, 'naac: ¡Qami' iqo'itqate, huachirigui, ñapiitaxauo'lli', qami' iqo'itqate coviguinco'lli'! ¡Ma' mashic pi'guiloxolchigui na iqahic cana 'ỹa'! ¡Ana 'ỹa' quena pe qui'ñigui na iqahic laue!

³ Ca' shinac: Mashic shi'gue ñaqate' saua ỹoho; ¡ca lotqai liỹo' sañiñi! Shi'gue squiỹoota'pe naua ipiaate', ca lotqai liỹa no'xaguilo quena 'laua!

⁴ So iqo'itaxat ishito da lqai'laxat quiñi lauacoqui' ñi lasom. ¡Ca' na'le, ca ỹaatqajam yidaxanac!

^5-6 Ca na'le, ca' ñi'laxashiguim, sahotaque sauate'oga so iqo'itaxat. Quenaua iqai'laqate' chaqai naua ñapoquenal 'ue saua llitaxahi quena qo'paq louaq mirra tarelec ñi naconec ñi lasom. ¡Na' sa'xaỹaque retaqa, ca ñauate'e sham yileueta! Sauate'oga quiñi lasom so iqo'itaxat, qam so'maxare totqai hueete'e yi'maxare. Ca chaqa'ma' sedaantaque, qam se sanata, soỹaxantaque, qam sqai saachiguit.

⁷ Iuanterelec aỹim saua neloxoỹa' sauá'maq ỹouoxonsac quena' pe yi na'a' lodegaxat; youaxansac chaqai ycoñirqachite'; ¡só'maq neloxoỹaripi quiyi ñigo quiyi na'a' se yichirac no'teguec so ñapoxoqui!

⁸ Qamiri 'aallipi quena Jerusalén, no'm huañijlec ca iqo'itaxat, ca' 'ỹaañiuec ca ra'qaachiguii quiyim 'ñiỹapega mashic yileuetac queda iqo'iichi.