Cantares 4 - La'qaatqa ñi qota'olec Qota'olec & Qota'olec Novita Na Qomyipi

¹ ¡Qami' iqo'itqate, ỹaatqajam chalego da royaaqui'! ¡Ỹaatqajam chalego da royaaqui'! Naua nqochichi' 'ec dos coviguiñigo' napoosañi quena napoxogui'i'; na qavi'i' 'ec quetaq llaalcoqui' rishiquitac cada qa' quiyi Galaad.

² Ná'ogue ana rovi'i' naloochiguiñi, 'ec ana nelo qagreta chita'gue chicqa'ñigui ca nachilaxaqui, chaqai ỹa'maqatañi quiyim qanepetec.

³ Naua qadapchi' togue' 'ec ca qo'laaxaic toc chaqai lo'daxaraqa naua ra'qaataxahi'. Naua rashilqui' 'ec caua granada lahil richiitau'alo quena napoxogui'i'.

⁴ Na rqosochi' lo'yaxanec, 'ec ada na'ajnaxanaxalate lo'ueenata na'le so nashi David, qaỹo'uet qaỹahotaque no'goxonaxat lahi'. No'xatetañi nqohin ana mil nquepaqataxanqate, lquepaqataxanqate na 'ñaaxaiquipi.

⁵ Naua ro'viichi' 'ec caua dos qagreta huaaya', que'eeta'pe quena 'uaqapi neesañigui ana qo'paq 'ue ana lenoỹaxai.

⁶ Toco' ma' sham richiguiñi, ca' eec na la'al, ca' shicpegue' ada qa' huaalec na qo'paq louaq mirra, cada quemaralec huaalec na nichiinaxanaxat lo'daxaraic lahita.

⁷ ¡Ỹaatqajam qami' lo'yaxana, qami' iqo'itqate; ỹaatqajam ỹovirañi da royaaqui'! ¡Ỹaatqajam qaica ca ra'aqshichi'!

⁹ Mashic cuachita añi i'taxanata, qami' lo'yaxana ñapiitaxaua; mashic cuachita añi i'taxanata, ca na'chaqai 'oonoqui' ra'ira'a aỹim, queso 'oonoqui' lequet ana rqola'e'.

¹⁰ ¡Chalego lo'daxa da neneequesenaxaqui', qami' ñapiitaxauo'lli'! ¡Da neneequesenaxaqui' paguec lo'daxa quena lataxa; chalego lo'daxa lahita na nocoraxachi' quená'ogue na liỹa lo'daxaraic lahita!

¹¹ Qami' ỹalamaxarete ñapiitaxaua, quena qadapi' 'ec rapic li'i na chicqotapougui. ¡'Ec rapic li'i chaqai naua no'i' hueeto'ot na ro'legaxanaxachi'! ¡'Ec na lahita quiyi Líbano na lahita ana neloxogui'i'!

¹² Qami' ñapiitaxauo'lli', qami' nanaxanqa' napoota'a, huaxaỹaq lahi' napootau'a, huaxaỹaq ne'paxantashiguim 'ue añi qaỹotocqotalec;

¹³ nanaxanqa' hua'ñi ñaxashiguim ana granada lo'daxarai ana la; nanaxanqa' 'ue ana lenoỹaxai ana alheña,

¹⁴ ana nardo chaqai azafrán, chaqai ana noqola late'e lo'daxaraic lahita chaqai ana canela, chaqai ná'ogue ana liỹa qo'paq nichiinaxanqate, mirra, áloes; ¡chaqai ná'ogue ná'maq liỹa lo'daxaraic lahita!

¹⁵ Añi huaxaỹaq lahi' quiyi nanaxanqa', añi'maxare ni'ỹa, ca na la'uaxac chicqotape'oga yi Líbano.

¹⁶ Nonot huaquiaxaic, ¡nelo'irec! Nonot chicqa'gue da 'guiñi, ¡nanaqui'! Pi'chiilec na ỹanaxanqa', qaiyi huaguec na lo'daxa na lahita. Qami' iqo'itaxat, nanaquirepegue' na qadanaxanqachi', ca 'qui' ná'maq lo'daxaraic la.