Cantares 2 - La'qaatqa ñi qota'olec Qota'olec & Qota'olec Novita Na Qomyipi

'Naac aso 'aalo

⁴ Yauegougui ñi lqui'ỹaxaqui lauo' so'maxare, re'qoota da lqo'iichi quena' ra'iitaỹot.

⁵ ¡Vii ca ỹa'ñaaqataxanaxat higo na'dec, yqui'ỹaxañigue aca manzana, ma' mashic yalolqachit da iqo'iichi!

⁶ ¡Sahotaque ca'maxare ña'xanta'a ma'le da nemaq, ca' queda loic, ca' qa'aaltahic!

'Naac so ỹale

⁷ 'Ỹaañiuec ca ra'qaachiguii, qamiri 'aallipi quena Jerusalén, quena naueenec chaqai quena peele quena no'ueenaxa, quiyim se ỹaqaguita'guit da lelaxac yí'maq iqo'itqate, chi ỹovireto'o' ma' chi neme ca lelaxac.

'Naac aso 'aalo

⁸ ¡Mashic naata na iqo'itaxat! ¡Mashic sa'qaata'guit da lavillaxac! Naquetalec renoteta'gue ana qa' ladocai, naqueta renoteta'gue ana quemaralec.

⁹ Na iqo'itaxat 'ec ca re'xone': 'ec ca re'xone' llaalec. ¡Mashic hueete'ena pa'aatauec quiñi lasom, huaqatau'a ana nqote, na'iitapego cañi nqote!

¹⁰ So iqo'itaxat 'naac caỹim: Qami' iqo'itqate, ne'laxachirishiguim; qami' iqo'itqate, ỹala'e', qolaq.

¹¹ ¡'Ajñi', mashic ỹoxe'uegue so no'oomaxa, chaqai so ỹaaqateripi mashic ỹoxe'uegue.

¹² Mashic renohi na no'ueenaxa, mashic novi' yi laloqo' da toonaxac, ma' quenajo qana'laua mashic qara'xaỹaque da noỹenaxac na coviguiñic.

¹³ Ana 'igo lashi mashic 'ue ana la, chaqai naua 'uva lomaate' mashic huaguec na lo'daxa lahita. Ne'laxachirishiguim, qami' iqo'itqate; qami' iqo'itqate, ỹala'e', qolaq.

¹⁴ Qami' coviguinco'lli' ỹalamaxarete, nañoxochirouguilo naua lauaco ana qa', quenaua qoỹoqoshi'meguelo nqañoqotqachichi', sahotaque seuañigui na qashiiqui', sahotaque sa'xaỹa ca qavillaxaqui'. Ma' ¡chalego loyac quena seuana qami'! Chaqai ¡chalego lo'daxa quena' sa'xaỹa qami'!