Cantares 1 - La'qaatqa ñi qota'olec Qota'olec & Qota'olec Novita Na Qomyipi

¹ Najo ná'maq paguec loyac quena lo'ueenqaipi so Salomón.

'Naac aso 'aalo

² ¡Ñaq yqo'goqe'! Paguec lo'daxa quena lataxa quena' yiñiiquishiñi'sac,

³ lo'daxaqui'chiguit da lahita na nocoraxachi', da qadeenaxachi' coraxat corauec lo'daxaraic lahita. ¡Vichiguiño' qanqo'ta qami' quena 'aallipi!

⁴ ¡Qaỹaloq yi'xachi'! ¡Qami' ỹashi, yaviquira'alo caua qauotochi'! Ñitoonqatac ma' ñaqatqata'guit qami'; paguec so'leentaqataque ma'le da neneequesenaxaqui' quena lataxa. ¡Chaxaso' ma' nqo'ta qami' na 'aallipi!

'Naac so liỹa 'aallipi 'Naac aso 'aalo

⁵ Qamiri 'aallipi quena Jerusalén, ỹim huerai, qam ỹim lo'yaxana; huerai 'nejme' naua co'matqate' quiyi 'laua Cedar, lo'yaxana 'ec na no'ueetaxat ñi lauo' lasom so Salomón.

⁶ Totaxan ra'iigui dá'maq quiyim ỹim huerai, ma' yavigaxat añi ra'aasa. Na iqaỹaripi ro'iiua', ca' yilarelec quiyim seloqota'a yi 'uva loma', ¡ca' se squelola yí'maq ỹaatqajam ỹanaxanqa'!

⁷ Vite, ca 'ñirapiguiỹa' qami' lqo'itaxat da ñachaalataxac, ¿hua'gue ca reloxoiqachi' cana qalo'e' qagreta?, ¿hua'gue ca nco'matqa' nqai'ñi' quiyi na'xa'a lavinñi? Ma' ¿chi'negue queta' 'ec so'meetegueri' quena laloipi na nauegaxauachi'ipi?

'Naac so liỹa 'aallipi

⁸ Ma' qami' paguec lo'yaxana quena lo'yaxanaipi, no'm sqa 'yiiñi' ca hua'gue, ca' quiisa'pegue' ca taỹa'gue na qagretaipi, chaqai qui'ỹaxañi'sac na qalo'e' quetaq llaalqaipi quiyi leseeque'ta na lauo' na'daañi na neloxoỹaripi.