Apocalipsis 6 - La'qaatqa ñi qota'olec Qota'olec & Qota'olec Novita Na Qomyipi

Saua siete netanaxanqate

¹ Ca na'le, ca' seuanchigui na' só'maq qagreta llaalec ỹauachigui aso 'auaxai quesaua siete netanaxanqate, ca 'ue so sa'xaỹa quesaua cuatro ise' nca'leesauec retaqa, qam da lavillaxac 'ec ana soxonaxa: —¡'Antaso'o' ỹala'e', ñaqai 'ajñi'!

² Ca' ya'ỹa'a, ca seuane'ta so shipgaq lalagaxaic. Ca só'maq neetalec so'maxare no'qoota'a aso lo'xoshic. Ca so'maxare qoỹaanem aso nado'o na nashi. Ca' eec, qam chaqa'ma' rauegaxan, chaqai quiyim queeta da lauegaxanaxac.

³ Ca na' só'maq qagreta llaalec ỹauachigui aso liỹa netanaxanqate, ca sa'xaỹa so liỹa quesaua ise' nca'leesauec, 'naacsa': —¡'Antaso'o' ỹala'e', ñaqai 'ajñi'!

⁴ Ca nenoxonec so liỹa shipgaq letogaxaic. Ca só'maq neetalec so'maxare qoỹaanem da lquesaxanaxa quiyim rouootaxana'gue da neuagaxa quena 'laua, chaqai ỹo'uet quiyim na qomyipi nalauajta'. Ca so'maxare qoỹaanem so lecat lodegaxat.

⁵ Ca na' so qagreta llaalec ỹauachigui aso liỹa netanaxanqate, ca lotqai sa'xaỹaque so liỹa quesaua ise' nca'leesauec, 'naacsa': —¡'Antaso'o' ỹala'e', ñaqai 'ajñi'! Ca na' ya'ỹa'a, ca seuane'ta so shipgaq laueraxaic. Ca só'maq neetalec so'maxare lo'qoota'a aso lesallaqataxanaxaqui.

⁶ Ca' 'ue so sa'xaỹaque nivillaxac 'maxañigui na lavinñi' saua ise' nca'leesauec, 'naacsa': —Qaicaata ca un quiloqui' quena trigo na'chiguit nqohin ca lo'ueenataxanaxac ca qom quiyi 'óna na'xa'a, chaqai 'nejem ca lashivichaqa' ca tres kilos cana cebada. Qam se qana'laxatañi na aceite na'ic chaqai na lataxa.

⁷ Ca na' so qagreta llaalec ỹauachigui aso liỹa netanaxanqate, ca' sa'xaỹaque só'maq pa'aatec quesaua ise' nca'leesauec, 'naacsa': —¡'Antaso'o' ỹala'e', ñaqai 'ajñi'!

⁸ Ca na' ya'ỹa'a, ca seuane'ta so shipgaq qoñooxoic. Ca só'maq neetalec so'maxare leenaxat nelauaxa. Ca' so coỹaretaho queso'maxare chaqaiso só'maq lqui'i cá'maq lapooqo' na leuaxaiquipi. Ca' qoỹaanem da lquesaxanaxa quiyim ỹalauat quiñi 'óna quenaua cuatro qomyipi quená'maq hueetalec ana 'laua, ỹahote'e na lauataq, chaqai na nqopaaxa, chaqai na nalolaxa, chaqai ná'maq retoxonac quena 'laua.

⁹ Ca na' so qagreta llaalec ỹauachigui aso liỹa netanaxanqate, ca seuane'ta na lqui'illipi ná'maq qaỹalauato' na'le sauaxat quiyim ipaquichigui i'taxajñi nqai'en da la'qaatec ñi qota'a. So'maxare hueeta'ñi yi pa'aañi caso ncopatoxonaxalate.

¹⁰ Na'maxare ỹaatqajam nelamaxaren quena' 'naac: —Qami' qara'gaxala', ỹaatqajam qami' co'teeta chaqai quiyim pacqajñichirigui ná'maq chaxañi'sac, ¿tegue' chaqai laquio' ỹovita ca laloqo' nqai'ñi' quiyim michi' ca nasauaxaset, ca vite ca nouaxanaxaset ná'maq ỹo'uet na'le da qarelauaxa quená'maq hueetalec ana 'laua?

¹¹ Ca na'le, ca' qoỹaanem na looỹac lalagaxaic. Ca' qohinapega quiyim cocho'qui' liỹa nco'matauec, toco' ma' nalogoñi ỹovita cá'maq naloqojnec quená'maq lqaỹaripi ro'ueenataxantacot so Cristo ná'maq taata'a quiyim qaỹalauat ma'le, 'nejme' saua'maxare.

¹² Ca na' só'maq qagreta llaalec ỹauachigui aso liỹa netanaxanqate, ca ya'ỹa'a, ca' 'ue so nalataxa idaxanac na 'laua. Ca naue' añi ra'aasa 'ec na nooỹac laueraxaic. Ca ñá'ogue ñi shiraigo toc, 'ec leuoripi.

¹³ Chaqai ana huaqajñi najñi queda piguim, taalec na 'laua, 'nejem ana higo lashi najñi ana la ladala quena' qoyiquejlec queca nonot quesaxanaxaic.

¹⁴ Ca' na piguim palac, 'ec ana lere quena' qalepajta'. Chaqai ná'ogue aná'maq quemaralec ladocai chaqai ana delec qaidaxan quena loma'.

¹⁵ Chaqai na nashillipi quena 'laua nañoxojñi quenaua lauaco chaqai quena qa' quena quemaralec ladocai, liỹaatac ná'maq leta'allipi, na nesallaxanqaipi, na lashillipi na nouaataxanaq, ná'maq quesaxanaxaiquipi, chaqai ná'ogue ná'maq na'aquipi chaqai ná'maq se na'aquipi.

¹⁶ Ca 'naapega quena quemaralec ladocai chaqai ana qa': —'Irelgoto qomi', ca qarpataqairañi, 'xochiriñi qomi' quiñí'maq nqa'xantañigui añi nashi nqa'xanaxaqui, chaqai queda chalego lecaic nouaxanaxaset ná'ogue ỹo'uet ma'le ñi qagreta llaalec.

¹⁷ Ma' mashic novi'o' ná'maq chalego lecaic na'xa'a nouaxanaxaqui ná'ogue, ca ¿negue' queto' ca ishit na'ñaxachiguit?