Apocalipsis 12 - La'qaatqa ñi qota'olec Qota'olec & Qota'olec Novita Na Qomyipi

Aso 'aalo chaqai so isecỹac 'ec naanoc

¹ Na'le, ca' lotqai re'oq so chalego lecaic netanec hueeto'ot na piguim, 'neetasa': 'Ue aso 'aalo 'ec neloxoqui añi ra'aasa lepatetagui, chaqai co'ueetalec ñi shiraigo. Chaqai aso'maxare ỹantañi aso nashi nado'o neesagui saua doce huaqajñi ana roto.

² Qam asojo 'aalo 'manaxai, chaqai ỹaatqajam rachitata, ỹaualqatac queda nqui'ic, ma' sham co'o.

³ Na' ime, ca' lotqai re'oq so liỹa netanec quena piguim, 'neetasa': 'Ue so chalego lecaic isecỹac, da no'ueenataxac 'ec na naanoc, toc, siete saua lqahigo', diez aso lasote. Chaqai quiñi 'óna quesaua lqahigo' neetagui ana nashi nado'o.

⁴ Ỹahote'e so lqai'it, ca' ỹauogolenta ana huaqajñi quena piguim, ca' najñi nqai'en añi 'óna quecaua tres, taalec nqai'en na 'laua. Ca' sojo isecỹac nachajñi, reloqoto'ot aso 'aalo sham co'o, ma' ỹahotaque quiyim ma' ne'qaañi so noctoqui', ca' chaqa'ma' ỹa'ic.

⁵ Ca' aso 'aalo ne'qaañi so llaalec ỹale, só'maq qaỹahotaque nashi ma'le, ca' ỹoiquentac ná'ogue na ỹoreta'oguit qomyipi, 'ec ỹahote'e aca lelaataxanqate fierro lo'qoota'a. Qam na'le, ca' qarouootaxana'gue so llaalec aso 'aalo, ca' qaỹodo'ñi yi nqa'xanqa' ñi qota'a.

⁶ Ca' asó'maq 'aalo 'eet, quepegue' yi 'laua qaica qom, yí'maq hua'ño' ca loma' qaỹa'maxatetañi quiñi qota'a. Ca' chi qaiqui'ỹaxantac quecaua mil doscientos sesenta na'xata'.

⁷ Ca na' ime, ca' 'ue so chalego lecaic neloquiaxac queda piguim, ma' so la'gaxala' na nelaatqaipi piguim laseripi, leenaxat Miguel, chaqai ná'ogue na lelaatqaipi reloquita'pegue' so isecỹac 'ec naanoc. Ca' so isecỹac chaqai so lelaatqaipi qai'neeta reloquitac,

⁸ qam so'maxare qaica lovi'. Ca so'maxare qaica ca loma' queda piguim.

⁹ Ca' chaqaida dá'maq 'neeto' na'le na' qaỹo'daauec so isecỹac chalego lecaic. Ca so'maxare chaqaiso' só'maq ñaauapec 'ec nanaic leenaxat Satanás chaqai na'ỹaapec, só'maq ỹayintaco' quen ná'ogue na ỹoreta'oguit qomyipi hueetalec ana 'laua. Ca so na'ỹaapec chaqai so lelaatqaipi qaỹo'daauec, taalec nqohin na 'laua.

¹⁰ Ca na'le, ca' sa'xaỹaque so chalego lelamaxa na'qaatec 'maqot na piguim, 'naacsa': —Mashic novi' da nca'laxa, chaqai da nquesaxanaxa quiyim ỹoiquentac ná'ogue najo ñi qota'olec, chaqai da lelaataxanaxac só'maq nela' nashi nca'laxaqui. Ma' mashic qaỹo'da'oguiyi só'maq inaqateguelec na lasauaxaset na qarqaỹaripi, só'maq naua'que naua na'xata' chaqai naua piri reloqoto'ot ñi qota'olec.

¹¹ Ma' na qarqaỹaripi loxonec so'maxare, qaỹachigoxochichiguilo saua leuo' so 'ec qagreta llaalec, chaqai quiyim saua'maxare ỹa'xatesac da na'qaatec. Ma' se no'chi' quiyim na'laañi da nachaalataxague', ta'ta'a quiyim qaica ca liỹa ỹahosaque, qaidaata quiyim ileueralec da na'qaatec.

¹² Vichiguiño' nagui netooñi' qami' piguim, chaqai ná'ogue ná'maq hueeto'ot. Qam ¡ỹaatqajam chalego le'xoric ma'le ná'maq hueetalec na 'laua chaqai ana huaaxai! Ma' so na'ỹaapec ta'ñalo qamiri ỹaatqajam 'ue da lonogoxonaxac, ma' ỹa'deentari' quiyim sqaỹaloq ỹovita ca lqodoc ca naloqojnec so'maxare.

¹³ Ca co'na' so isecỹac 'ec naanoc ỹa'den quiyim qanenaxañi quena 'laua, ca' ỹocanac asó'maq 'aalo 'uo' so llaalec.

¹⁴ Qam aso 'aalo qoỹaanema saua dos late'el laua' na ho'ic, qaiyi ishit ỹo, taỹa yi chi loma' quiyi 'laua qaica qom, ca qoỹoqo'ta so 'ec nanaic. Ca' yí hua'ñi, ca chi qaiqui'ỹaxantac quesaua tres ñaxari chaqai so lavinñi so liỹa ñaaxa.

¹⁵ Ca' so 'ec nanaic nesal, nahougui nqai'en na lap so huaxaỹaq ỹo'uet lachiugue, qaiyi ỹaỹoxonaxat aso 'aalo.

¹⁶ Qam na 'laua ỹotauan aso 'aalo. Ma' na 'laua ỹauachigui na lap, ca ỹaqanñi sá'ogue so huaxaỹaq caso lachiugue lo'ueenata so isecỹac na' nesalegue.

¹⁷ Ca' queda na'le, ca' so isecỹac ỹaatqajam ro'ỹa aso 'aalo. Ca so'maxare quepegue' nco'ỹa'e' ná'maq llaalqaipi no'ueenañi aso 'aalo, quená'maq na'xaỹaxane'talo naua lelaataxanaxaco ñi qota'a, chaqai ỹaatqajam quejlgoto nauá'maq ỹaatqajam lliquete' na'qaatqa ỹa'xate' na'le so Jesucristo.