Apocalipsis 11 - La'qaatqa ñi qota'olec Qota'olec & Qota'olec Novita Na Qomyipi

Saua dos la'qaataxanqajanqa ñi qota'a

¹ Ca na'le, ca' qanañaañim aso 'ec noqola late'e naloqojnaxanaxat. Ca' qohinapiguiỹa': —Ne'laxachirishiguim, ca naloqochiñi' da ladoqueta ñi lo'ueenaxanaxaqui ñi qota'a chaqai añi ncopatoxonaxalate. Chaqai naloqochiñi' ỹote' cá'maq hueetaugui imaqachintac ñi'maxare.

² Qam se naloqochiñi' yí'maq nasoxoc ñí'maq no'ueenaxanaxaqui, ma' qoỹaanem na ỹoqa'a na chicqa'gue. Ca na'maxare i'naari' ma'le yi chalego lecaic na'a' lalamaxaret ñi qota'a, ỹoviraqterauec saua cuarenta y dos shiriguiri.

³ Ca' ỹim selate' ma'le saua dos ỹa'qaataxanqajanqa quiyim ỹa'xatesac aỹim quecaua mil doscientos sesenta na'xata', ỹansañi caua noho ná'maq ỹañiñi ca qom quena' 'ue ca lasauaxanec.

⁴ Sauajo dos na'qaataxanqajanqa, chaqaisaua saua dos qo'pa' olivos chaqai chaqaisaua saua dos ncoỹeraxanaxaqui' sauá'maq qaillisa'ñi yi reloqota'ñi ñi qota'a ñí'maq la'gaxala' na 'laua.

⁵ Ca no'm 'ue cá'maq sham 'ue ca 'ne'tegue se no'uen, ca na'maxare chicqaugui na lap nqai'en na norec. Ca' ỹavicañi nqai'en ca npa'guenaxaua. Ca' chaqaida 'neeta nqohin ca lelauaxa cá'maq sham se no'uen cá'maq 'ne'tegue na'maxare.

⁶ Nauajo na'qaataxanqajanqa 'ue da lquesaxanaxa quiyim ỹapogui na piguim quiyim qaica ca ỹaxat quecá'ogue cá'maq na'xataripi quiyim ỹa'xatesac da la'qaatec ñi qota'a. Chaqai qai'neeta 'ue da lquesaxanaxa quiyim ñigui leuoripi nqai'en na huaxaỹaq, chaqai quiyim ỹo'uet le'xoric na 'laua queca nouaxanaxaset, canchaqai ỹorete' nqai'en cá'maq ta'ñi.

⁷ Ca noma' ỹomate' dá'maq ỹo'ueetesac, ca' nenoxonshiguim so isecỹac lodegaxat chicqa'ña yi lapooqo' na lqui'i na leuaxaiquipi. Ca reloquia'to saua dos, ca loxonqa ma'le, ca' ỹalauate'.

⁸ Ca ma' ileue', ca nichilnete', hueesa'ñigui nqohine' so nayic quiyí'maq lodegaxat na'a' Jerusalén, yí'maq hua'ño' na' qaipateno so qara'gaxala' Jesús, yí'maq chi qaỹamata'gue Sodoma, loqo'm Egipto.

⁹ Ca quesaua tres na'xata' chaqai so lahi so liỹa na'xa'a qaỹa'ajanta'pe saua loshicma' saua'maxare quená'ogue na ỹoreta'oguit qomyipi ỹoreta'oguit na la'qaatec, chaqai se qaỹasene' quiyim qaishiñiñi saua'maxare.

¹⁰ Ca ná'ogue na qomyipi quena 'laua netoonta'peguelo quiyim qaỹalauate' saua'maxare. Ỹaatqajam chalego da netoonaxac, vire'ta quiyim quiñi 'óna ỹa'ue ca lame ilata ca liỹa, ma' sauajo ỹale' ỹa'xatesac da la'qaatec ñi qota'a, ca' saua'maxare ỹaatqajam 'ue da nqui'ic nqai'ne' quena qom.

¹¹ Qam na' ime' saua tres na'xata' chaqai so lahi so liỹa na'xa'a, ca' ñi qota'a liỹa nca'laxaterec. Ca' lotqai liỹa ne'laxachishiguim. Ca ná'ogue ná'maq iuanchiguilo saua'maxare, ca' ỹaatqajam chalego da lqolonaxa.

¹² Ca na'le, ca' saua dos na'qaataxanqajanqa 'xairaque so ỹaatqajam lam nivillaxac 'maxashiguim quena piguim, 'naapegalo: —Nochishiguim quenajo pa'aashiguim. Ca' tarishiguim queda piguim queesaugui so naueguelec, ca' so npa'guenaxauaripi ra'iitashi'meguelo.

¹³ Ca na'le 'ue so ỹaatqajam quesaxanaxaic le'loxolaxa na 'laua, ca' quecaua diez 'imqa, 'óna ca 'guiñi quiyi 'imqaipi quiyá'ogue yi na'a'. Ca siete mil só'maq qom ileuo' na'le na' i'loxol na 'laua. Ca ná'maq no'ueenañi qom paguelec da lqolonaxa, ca imaqachintac ñi qota'a neetashiguim queda piguim.

¹⁴ Ca' ỹoxogue na'le so co'uaataxanaxaic ne'xoric, qam qaỹaloq novi' ca liỹa.

Asó'maq pa'aatec quesaua siete npe'tel

¹⁵ Ca' so pa'aatec quesaua siete nelaatqa piguim lase' pi'chigui aso lpe'te. Ca qara'xaỹaque so chalego lecaic nivillaxac queda piguim, 'naacsa': Da lo'ueenataxanaxac ná'ogue ná'maq ỹoiquentac na 'laua, chi ỹovireta'a quiyim lalamaxaret ñi qara'gaxala', chaqai so nela' nashi nca'laxaqui; ñi'maxare qaica lqodoc quiyim ỹoiquentac na'maxare.

¹⁶ Ca na'le saua veinticuatro qo'xoiquipi nqa'xantañigui ana nqa'xanaxaqui queda reloqota'gue ñi qota'a, ỹa'chi'iñi na le'cootal, ỹoviraqtera'guit na 'laua naua lataapi'. Ca' imaqachinsac ñi qota'a.

¹⁷ 'Neracsa': Saanqaem qami' da qana'aachic, qami' qara'gaxala' sqaica ca qalañirac, ma' chaqai'en 'ue qami', ñí'maq chaqai'eno' quen, chaqai ñí'maq naata'quena ma'le. Ma' mashic coñito' dá'maq chalego lecaic rquesaxanaxa'e' quiyim 'viiquiñi'sac ná'ogue najo.

¹⁸ Ca na ỹoreta'oguit qomyipi ro'o, qam ỹovita ca laloqo' quiyim vite ca nouaxanaxaset. Chaqai qai'neeta ỹovita ca laloqo' quiyim michi' na leuaxaiquipi, chaqai quiyim 'ỹaañitem ca nishiue' ná'maq relaataxai'pi ỹa'xatesac da ra'qaachiqui', ná'maq ỹaatqajam nañaanot aqami' quiyim imaqachintac da qadeenaxachi', lodegaxat, loqo'm cocho'qui'. Chaqai ỹovita ca laloqo' quiyim lauachi' ná'maq ralauataxantac quena 'laua.

¹⁹ Ca na'le, ca qaỹauatougui ñi lo'ueenaxanaxaqui ñi qota'a neeta'gue da piguim. Ca' ỹaatqajam re'qoota aso lahite' saua diez laqataxaco ñi qota'a. Ca' 'ue so nqai'legaxa, nalataxa, soxonaxallipi, so le'loxolaxa na 'laua, chaqai aso late'ogue' qalachi.