Apocalipsis 10 - La'qaatqa ñi qota'olec Qota'olec & Qota'olec Novita Na Qomyipi

So nelaatec piguim le'ec chaqai aso lliyo'lli'

¹ Ca na'le, ca' seuane'ta so liỹa nelaatec piguim le'ec ỹaatqajam quesaxanaxaic, chicqotashiguim queda piguim, hueetaugui so naueguelec, chaqai na lqahic hueetalec so qoñi'gue. Chaqai na lashic 'nejem na ra'aasa lauaq, chaqai naua lichil 'ec na norec lauaq.

² Lo'qoota'a aso lliyo'lli' nauatetagui. Ca' da lichi loic co'uelec nqai'en ana huaaxai, chaqai da nemaq co'uelec nqai'en na 'laua.

³ Ca na'le, ca' ỹaatqajam netenegue da laualaxac. Qam da lavillaxac 'nejem na sauaxaic leta'a quena' ronoqo. Ca na' ỹaualaq, ca' siete saua soxonaxal ỹaxandec quiyim qara'xaỹa da la'qaategue'.

⁴ Ca na' ime retaxahi' saua siete soxonaxal, ca' ỹim mashic sham shiriñi dá'maq 'nerac. Qam 'ue so na'qaatec sa'xaỹaque 'maxashiguim quena piguim, 'naacsa': —Totaxan 'chiriñi dá'maq 'nerac saua siete soxonaxal, qaiyi sqaica ca ỹa'den.

⁵ Ca na' ime, ca so nelaatec piguim le'ec só'maq co'ueetalec ana huaaxai chaqai na 'laua ỹachaxanshiguim da lqai'laxat loic quena piguim.

⁶ Ca' ỹaanot da la'qaatec ñí'maq chaqai 'neetari' nca'leetauec, ñí'maq ỹo'uet na piguim, na 'laua, ana huaaxai, chaqai ná'ogue ná'maq hueetañigui na'maxare, 'naacsa': —Tot qaica quet cá'maq qanaỹaloqnaque.

⁷ Ca ma' ỹovita ca laloqo' quiyim pi'chigui aca lpe'te so co'uaataxanaxaic quesaua siete nelaatqa piguim lase', ca' ỹovita ca laloqo' quiyim imigui da se re'xogui lo'ueenataxanaxac ñi qota'a, dá'maq shi'gue ỹa'xatem na'le so lelaatqaipi letaxaỹaxanqajanqaipi.

⁸ Ca só'maq na'qaatec sa'qaataque na'le queda piguim, ca lotqai pilac liỹa retaqa caỹim, ca 'naacsa': —Mo'e', coñita ada lere nauatetagui lo'qoota'a da nelaatec piguim le'ec co'ueetalec ana huaaxai chaqai na 'laua.

⁹ Ca na'le, ca shicpegue' so nelaatec. Ca' shinapega quiyim nañan aso lliyo'lli'. Ca so'maxare 'naac na'le caỹim: —'A. A'qui' ná'ogue. Ca' quena qadapi' chalego ma'le ca lo'daxa, 'ec na rapic li'i. Qam cana racoomi' ma'le, ca' chim.

¹⁰ Ca na'le, ca' secona aso lliyo'lli' lo'qoota'a so nelaatec, ca' sa'ic. Ca' quena ỹap chalego lo'daxa 'ec na rapic li'i. Qam na' ỹoviriñi, ca' chimigui nqai'en ana yacoom.

¹¹ Ca na' ime, ca' lotqai qohinapiguiỹa': —Qami' lotqai liỹa pilliralec 'xachi' dá'maq 'naac ñi qota'a taỹaugui na ỹoreta'oguit qomyipi ỹoreta'oguit na la'qaatec, chaqai ná'ogue na ỹoreta'oguit nashillipi.