Amós 6 - La'qaatqa ñi qota'olec Qota'olec & Qota'olec Novita Na Qomyipi

Qanopoxoỹaxajñi yi Israel

¹ ¡'Xoraicolec ná'maq chaqai 'na'guesa' da nachaalataxac quiyi Sión! ¡'Xoraicolec ná'maq 'neetapigui lauel qaica ca qohinegue yi Samaria, ná'maq lashillipi yí'maq 'laua paguec da lemaqachic, ná'maq i'guena na llaalqaipi so Israel!

² Quiipegue' yi na'a' Calne, ca 'ajñii, ca' quiyi, ca 'iỹa'oga yi na'a' lodegaxat Hamat, ca' naiỹalec yi na'a' Gat na'ñi yi filisteoipi. ¿Peeta'a 'ñiitapega quiyim paguec remaqachiguii qamiri quiyauajo 'lauari? Ná'maq 'laua ñiitalec qamiri ¿'ñiitapega paguec loyac quiyaua'maxare?

³ Qamiri sqai 'maxariñii 'yiiñitaque ca na'xa'a se no'uen, qam naviguiho dá'maq quiyim se qaỹa'maxata'guelo qamiri.

⁴ Saxaitalec ná'maq chalego loyac qa'xanaxala' no'ueetaxat ana loue ana ladoco loue, 'ec npaloochitac quenaua remaqachigohi, qui'iitac quena qagreta llaalec chaqai na huaqui llaalec 'uegaxasaq.

⁵ Pi'chiigui ana npe'te sqa ỹaataxa'uegue ca liviigaxanaxac, denaxachitac so David chi lo'ueenatec na liviiguellipi.

⁶ Late'ogue' ana ne'taxaguii quena' ni'chi quena lataxa, viñitac ná'maq no'uen coraxat lo'daxaraic lahita, ¡chaqai 'ec qaica nqai'negue nqai'ñii dá'maq qohinta'gue quiyim qanopoxoỹaxajñi na na'lauahi!

⁷ Qamiri nauá'maq 'avita qaraviguigue ma'le ca ỹoqa'a 'laua, ca ma'le, ca' ime na naỹaac quena rqui'ỹaxaguipi. (6.8-14 Da lcoñiitaxanaxac ñi qara'gaxala' queso llaalqaipi so Israel.)