Amós 5 - La'qaatqa ñi qota'olec Qota'olec & Qota'olec Novita Na Qomyipi

Qaroỹaxantapega yi Israel quiyim pilot ñi qota'olec

⁴ Ca 'neetasa' da la'qaatec ñi qara'gaxala' na' retaqaugui so Israel llaalqaipi: Naguipegue' aỹim, qaiyi rca'lliiuec.

⁵ Sqai quiipegue' yi Betel quiyim nqouagaxaiñii, chaqai sqai 'iigue da Gilgal, chaqai sqai quiipegue' yi Beerseba, ma' yi Gilgal qaica ca nañitqa' quiyim ỹoqa'a ca 'laua qainaxague, chaqai yi Betel qanopoxoỹaxajñi ma'le.

⁶ 'Guiñiỹot ñi qara'gaxala', qaiyi rca'lliiuec; ma' no'me', ñi'maxare nela' ma'le ca norec, taalec nqai'en ma'le ná'ogue ná'maq Israel, ca' qaica ca ishit ỹo'mat ma'le quena Betel. (7-13 So Amós rashiilaxantac quiyim netogot so qomyipi.)

¹⁴ Daañiỹaque ca no'uen, mesqai ca se no'uen, qaiyi rca'lliiuec; qaiyi llic dá'maq 'ñiỹaiquen qamiri quiyim ỹalequetauguilo qamiri ñi qara'gaxala', ñí'maq qota'olec sqaica lqalanec.

¹⁵ ¡Se rqo'chiỹa na se no'uen! ¡Ca rqo'chiỹa ná'maq no'uen! 'Chiichiguiñi nqai'ñii quiyim ỹo'uet na ỹa'maqachiguiñi ná'maq leraxanaxaqui na nimiitaxanaq quena nasauaxaset; ca' sqoue quiyim ñi qara'gaxala' ñí'maq qota'olec sqaica lqalanec 'ue ca lqouagaxa quená'maq ca'laaxaiquipi quena Israel. (16-20 So Amós rashiilaxantac quiyim netogot so qomyipi.)

²¹ Ñi qota'olec 'naac: Yoquii'a chaqai se yqo'talo naua remaqachigohi 'viichita'pe quena' nqouagaxaiñii; se semaqachine' naua rapoxogohi.

²² Se sa'maxaren ná'maq 'ỹaañiuo quiyim qaicopata'a quiyim yimaqachiñii, vire'ta ana 'ỹaañiuo nanecsec ala; se secoñiguit ná'maq huaqui llaalec 'uegaxasaq rachitaxanataxanaxachii quiyim pilliỹot aỹim.

²³ ¡Ỹoxe'oga nqai'ñii caỹim da lelamaxa na ro'viiñigui! ¡Se yqo'ta sa'xaỹa na riviiguillipi!

²⁴ Qam sahotaque quiyim 'ec huaxaỹaq ne'paxanec dá'maq no'uen caqamiri, chaqai da na'maqataxanaxac 'ec ca se imeuo ne'paxantashiguim huaxaỹaq. (25-27 So Amós rashiilaxantac quiyim netogot so qomyipi.)