Amós 3 - La'qaatqa ñi qota'olec Qota'olec & Qota'olec Novita Na Qomyipi

Dá'maq lo'ueenatec na letaxaỹaxaquiripi ñi qota'olec

¹ Qamiri llaalqaipi so Israel, ñaq na'xaỹaxañiỹa da la'qaatec ñi qara'gaxala' quenajo qomyipi naqata'a na'le quiyi Egipto, ñi'maxare 'naac:

² Qaqamita qamiri ñca'au'alo quená'ogue na qomyipi quena 'laua. Vichiguiño' sa'ue da nouaxanaxashichii quená'ogue ná'maq 'viichitac se no'uen.

³ Ca lotqai 'naac so Amós: No'm 'vii caua dos nauequetecta', ca' caua'maxare na'deene'ejta';

⁴ no'm ca sauaxaic leta'a ronoqo queca 'oochi, ca re'oq quiyim mashic doxonaxan; chaqai no'm ronoqo ca llaalec queca lauac, ca re'oq quiyim 'ue ca loxonec;

⁵ no'm 'ue ca qo'oolec najñi quena 'laua, ca' 'ue aca noqoina; no'm aca noqoina nenojshiguim quena 'laua, ca re'oq quiyim 'ue ca loxonec;

⁶ no'm ilamigui aca npe'te queca na'a' lodegaxat, ca' no'chata' na qom; no'm 'ue ca se no'uen taalec cajo na'a' lodegaxat, ca' chaqaiñi ñi qara'gaxala' taalec nqai'en.

⁷ Ñi qara'gaxala' se ỹauana quiyim 'ue ca ỹo'uet quiyim se ỹa'deenaxanaxanegue na lelaatqaipi letaxaỹaxaquiripi.

⁸ ¿Negue' ca se i'loxol quena lqolonaxa quiyim 'xaỹaque ronoqo ca sauaxaic leta'a? ¿Negue' ca se ỹa'xat da la'qaatec ñi qara'gaxala', no'm qailarelec quiñi'maxare?

Qanopoxoỹaxajñi yi Samaria

⁹ Vii da la'xaỹaxac na nashillipi quena 'imqaipi leta'allipi quiyi na'a' Asdod chaqai quena 'imqaipi quiyi 'laua Egipto, 'ñiỹac: Naguipegue' ana qa' ladocaipi quena Samaria; ñaqai 'ajñii ná'maq se no'uen 'ue quiyi'maxare chaqai da nqa'viic 'ue quiyi'maxare.

¹⁰ Ñi qara'gaxala' i'taxajñi da la'qaatec: Yi'maxare se ỹa'den ỹa'maxate'tegue da lo'ueenataxanaxac; ỹa'maxatetac quenaua lauooto' ná'maq locataxat queda lqa'viic.

¹¹ Vichiguiño', 'neetasa' da la'qaatec ñi qota'olec ñí'maq qara'gaxala': Na npa'guenaxauahi nahiquinchiguiñi ma'le na na'lauahi, nopoxoỹaxajñi ma'le na rquepaqataxanaxachii chaqai icona na hueetaugui naua qauootori.

¹² 'Neetasa' da la'qaatec ñi qara'gaxala': Dá'maq 'neeta na neloxoỹaq quena' louootaxanqate' caua dos lapiaate' ca lalo qagreta loqo'm ca lo'lo aca lque'la, quena' sham qaiqo'oc queca sauaxaic leta'a, ca' chaqaida 'neeta quiyim nañit ma'le na llaalqaipi so Israel neeta'ñi na Samaria, ná'maq saqatalec ná'maq no'uen qa'xanaxala' ỹachigoxota'gue da Damasco. (3.13-15 Ñi qota'olec ỹa'xat quiyim nomachichiguiñi ná'ogue ma'le.)