Amós 2 - La'qaatqa ñi qota'olec Qota'olec & Qota'olec Novita Na Qomyipi

Qaro'ỹa yi Moab

¹ Ca 'neetasa' da la'qaatec ñi qara'gaxala': Yi qomyipi na'ñi yi 'laua Moab ỹaatqajam 'xoic na ỹo'ueetetac se no'uen, ca' sqaica ma' se sa'ue quet ca nouaxanaxaset; ma' copata'alo saua lpi'naqa so nashi quiyi Edom, paguec da lauel, ca vire'ta quiyim nodaachiguiñi lo nqai'ne'.

² Vichiguiño' scopata'a ma'le yi 'laua Moab, ca' sojo norec nopoxoỹaxajñi ma'le na nashi lauootoripi quiyi na'a' Queriot; ỹalequetapougui so naualaxaquipi queso lauataq chaqai da lelamaxa ana npe'te, ca nilliviñi ma'le so qomyipi na'ñi yi Moab.

³ ¡Secona'a ma'le ñi lashi quena lavinñi so qomyipi; ca' salauat ma'le, queeta'ñi' nqaishin so lotauaripi nalliripi! Dajo 'naac ñi qara'gaxala'.

Qaro'ỹa yi Judá

⁴ Ca 'neetasa' da la'qaatec ñi qara'gaxala': Yi qomyipi naalec yi 'laua Judá ỹaatqajam 'xoic na ỹo'ueetetac se no'uen, ca' sqaica ma' se so'uet quet ca nouaxanaxaset; ma' liỹoqa'piguita naua lapaxaguinataxanaxaco ñi qara'gaxala', chaqai se na'xaỹaxanalo naua laqataxaco, ta'ta'a quiyim queetalec nqouagaxaintacot na lashiilqaipi lqolaquipi so 'auaxaic leta'allipi na'le.

⁵ Vichiguiño' scopata'a ma'le yi 'laua Judá, ca' sojo norec nopoxoỹaxajñi yi nashi lauootoripi quiyi na'a' Jerusalén.

Da nouaxanaxaset yi Israel

⁶ Ca 'neetasa' da la'qaatec ñi qara'gaxala': Na qomyipi quena 'laua Israel ỹaatqajam 'xoic na ỹo'ueetetac se no'uen, ca' sqaica ma' se so'uet quet ca nouaxanaxaset; ma' imeenta ná'maq sqaica ca lasauaxaset canchi lesega'a nqai'en aca laseuete, chaqai ca 'xoraic qoỹañiguita caua nepelate'.

⁷ Pataxañi chaqai nemanachit nqai'en na 'xoraiquipi, chaqai se na'xaỹaxana quena' 'ue ca ỹahotaque. Ca leta'a chaqai ca llaalec nouansagui lapaasapi'ñi' aca 'aalo nequetegaxai, ca' queda, ca' iualaxainsac dá'maq chalego lco'taxa da ỹeenaxat.

⁸ Na'maxare ipiguinñi na ỹoqa'a nooỹac nillicseripi, ca' nenanlec, ỹalequetau'a na nqui'ỹaxaquipi quena' qaimaqachin na nashiilec nqolaquipi; rishiuetenaxana quena lataxa ana lam lachoxonataxanqate, ca' ne'et quena lataxa quenaua lauooto' na lashiilqaipi nqolaquipi.

⁹ Qam ná'maq ỹim ma' sahotaque sa'ue ca qayiguii qamiri, ca ñopoxoỹaxajñi so amorreoipi; ỹaatqajam sá'ogue ñomachichiguiñi, 'eno'm ladocaiquipi 'ec ana qo'paq cedro, chaqai ra'ñii 'ec ana qo'paq roble.

¹⁰ Qam qamiri ñaqata'alo na'le quiyi Egipto, ca sashaxanta'pe qamiri quesaua cuarenta ñaxari quiyi 'laua qaica qom, ma' sahotaque saanema qamiri yí'maq na'laua so qomyipi.

¹¹ Ca' mesqai qollictaxañii, qamiri Israel llaalqaipi, ma' caqamiri sachigoxotaugui na'le na' sa'ue ca itaxaỹaxaqui chaqai ca nazareo cá'maq nomatalta' quiyim ro'ueenataxanot aỹim. Ỹim na'gaxala', se'taxajñi dajo.

¹² Qam qamiri 'xoic da repagaxalliguii quiyim ne'taxañigui na lataxa na nazareo ná'maq nallitalta' quiyim se ne'et, chaqai sqai 'maxariñii quiyim na itaxaỹaxaquiripi ỹa'xate' naua ỹa'qaatqa.

¹³ Hua' cha'regue, ỹim roqopi'ñot nqaishin na 'laua quena pa'aañi caqamiri, 'ec quena' roqopita'pegue' aca nahoglena quena' no'qaachigui quena trigo.

¹⁴ Ca 'eno'm shi'gom ni'guiñita 'iichitac, qam qaica ca qohit; cá'maq paguec quesaxanaxaic caqamiri, ca' qaica ma'le ca lquesaxanaxa, ca 'eno'm 'ue ca paguec 'ñaaxaic, qam se nca'leuec.

¹⁵ Ca no'xoshic lo'o nañan ma'le, vire'ta cá'maq yaqaic quena' ne'guen, chaqai vire'ta cá'maq 'eet neetashiguim, se nca'leuec ma'le.

¹⁶ Ca' quecajo na'xa'a vire'ta cá'maq paguec 'ñaaxaic quena nalauataxairipi inaxarec caua lo'goxonqate', qaiyi paguec liyic quiyim 'eet. Ñi qara'gaxala' i'taxajñi dajo.