2 Reyes 6 - La'qaatqa ñi qota'olec Qota'olec & Qota'olec Novita Na Qomyipi

Aso qai'pe naỹoxonshiguim queso huaxaỹaq

¹ Ca 'uo' so na'xa'a so letaxaỹaxaquiripi ñi qota'olec 'naaco' queso Eliseo: —'Ajñi', ná'maq qouo' senqataugui ỹaatqajam cocho'qui' coqomi'.

² 'Maxariñite' quiyim qolaxapegue' aso lachiugue Jordán quiyim souaxanaq ana qo'paq loỹo, ca' sa'daxañi, ca so'ueetaq ca qouo' quiyi'maxare. —Mohi, quii —'naaco' so Eliseo.

³ Ca 'uo' so 'naac quesaua'maxare: —Qouaquiroxoric, qami' qariỹaatac. —Hua', cha'regue chaqaida qamiri iỹareta'pe —'naaco' so Eliseo.

⁴ Ca' so Eliseo liỹareta'pe saua'maxare, chi ỹoviretaxaso'ma aso lachiugue Jordán. Ca co'na'le, ca' qaỹouaxan ana qo'paq.

⁵ Qam 'uo' so 'óna co'na' ỹouaxanteguelec aso qo'paq, ca' naco' aso nqai'pe, ca taañigui ca huaxaỹaq. Ca' ỹaualqo': —¡'Agai, qami' qanapaxaguinatqo'! ¡Ỹa'uale aso qai'pe!

⁶ Ca' so Eliseo renataxano', 'naaco': —¿Nega'ỹo' cá'maq taachi'ñi aca'maxare? Ca' so 'óna quesaua'maxare ỹachaxan cá'maq taachi'ñi aso'maxare. Ca' so Eliseo ỹouaxanlec so qo'paq, ca' inaxa'ñi yi'maxare, ca' aso qai'pe naỹoxonshiguim.

⁷ —'Ayi, coñita —'naaco' so Eliseo. Ca so'maxare iconaxaso'ma aso qai'pe.

So Eliseo naqajñi so nouaataxanyipi na'ñi yi Siria

⁸ Ca' so nashi quiyi Siria nalauateta'pegue' so nashi quiyi Israel. Ca co'na' ỹomat quiyim retaqata'pegue' so lashillipi so nalliripi, ca 'uo' ca ỹicapi'ñi quiyim nco'matqa'.

⁹ Ca co'na'le, ca' so Eliseo ila'o' so la'qaatec queso nashi quiyi Israel quiyim sqai quepegue' yijo 'laua, ma' so Siria laseripi quepegue' yi'maxare.

¹⁰ Ca' so nashi quiyi Israel ilategue so nalliripi dá'maq ỹica'pegue so qota'olec letaxaỹaxaqui ma' qaỹoden, ca chaqaida 'neetari', ca 'xoico' quen quiyim nañit so nalliripi.

¹¹ Ca' quedajo, ca' so nashi quiyi Siria tot ỹa'den ca 'neeta. Ca roỹaxanalo' saua lashil so nalliripi, ca 'naaco': —¡Ñigo' ñaqai 'qaataxañim peeta'a 'ue ca caqamiri ca qoshiita'guit ñi nashi quiyi Israel!

¹² Ca 'uo' so 'óna queso nashillipi 'naaco': —Qaica, qami' qarashi. Qam ñi qota'olec letaxaỹaxaqui, leenaxat Eliseo, neeta'ñi yi Israel, ñiga'ỹo' ñí'maq ỹa'xatem ñi lashi ná'ogue ná'maq 'xachi', vire'ta quena' vi'saugui ñi relaxasoxogui'i'.

¹³ Ca co'na'le, ca' so nashi quiyi Siria relaataxan, 'naaco': —Nataxañiỹaque negue' cá'maq neeta'gue ca'maxare, qaiyi ma'le, ca' 'ue ca sela' ñalliripi quiyim iconlec. Co'na'le, ca' qohinaco' neeta'ñi yi Dotán.

¹⁴ Ca 'uo' so ila' queso nalliripi neetashiguim quena shipgaq, chaqai nahoglenaipi lauataxaqui, chaqai 'xoic so co'ỹaaxaiquipi. Pe co'na' ỹovita yi Dotán, ca nahiquinchiguiñi yi na'a'.

¹⁵ Ca na' richiguiñi queso nete'etam, ca na' ne'laxashiguim so lelaatec so Eliseo. Ca co'na' nenoxonec, ca iuane'to' so nouaataxanaq nalauataxairipi nahiquinchiguiñi yi na'a'. 'Ue na neetashiguim chaqai ana nahoglena lauataxaqui. Co'na'le, ca eec, ỹa'ue la'xaỹaxac so Eliseo. —Qam nagui, qami' napaxaguinataxanaq, ¿negue' cá'maq shinqato'?

¹⁶ Ca' so Eliseo 'naaco': —Qaica ro'chi'raque, ma' paguec 'xoic ná'maq reloqota'alo qomi' quená'maq qomyipi.

¹⁷ Ca' so Eliseo nqouagaxainot ñi qara'gaxala' quiyim ỹauachiguilo naua nqote', qaiyi reuanaxan. Ca' ñi qara'gaxala' naviguerec nqai'en naua nqote' so lelaatec. Ca so'maxare iuana quiyim aso quemaralec qa' ladocai no'qajlec quena shipiguiripi qoyintalec chaqai ana nahoglena ỹaviquetaugui nahiquinchiguiñi yi hueeta'ñi so Eliseo.

¹⁸ Ca co'na' so Siria laseripi co'na' sham queu'a nalauate'e' yi na'a', ca' so Eliseo nqouagaxainot ñi qara'gaxala', 'naaco': —Sashiila'e' quiyim se neuanñi nqai'ñi' najo qomyipi. Ca' ñi qara'gaxala' se neuanñi nqai'en so qomyipi dá'maq ỹahotaque so Eliseo.

¹⁹ Ca co'na'le, ca' so Eliseo 'naaco' queso qomyipi: —Najo mesqaina ná'maq nayic, chaqai mesqaina najo ná'maq na'a' michitaque. Oquiigue aỹim, ca' ỹim saviguiiỹa ma'le cá'maq ỹale michitaque. Ca' ỹauega yi Samaria.

²⁰ Ca co'na' ỹoviro quiyi'maxare, ca' so Eliseo nqouagaxain, 'naaco': Nagui, qami' ỹa'gaxala', naviguerec nqai'ñi' naua nqote', ca co'na' liỹa reuanaxan so qomyipi. Ca' ỹa'den quiyim hueetaugui yi Samaria.

²¹ Ca co'na' so nashi quiyi Israel iuana so qomyipi, ca' inato' so Eliseo, 'naaco': —Qami' ita'a, ¿salauat najo qomyipi?

²² Qam so Eliseo 'naaco' queso'maxare: —'E', sqai lauachi'. ¿Loqo'm chaqai'en lauachi' quena' 'ue ñi qadoxonqui', do'isa'a ca lecat loqo'm ca roviqui'? Qui'ỹaxañi' chaqai ne'taxañi' ma'le najo qomyipi. Ime, ca pilaxachita ca lashi na'maxare.

²³ Ca co'na'le, ca' qaỹo'uet so lqui'ỹaxac lodegaxat chaqai qane'taxan so qomyipi. Ime, ca' so nashi, ca niquine'e', ca' ỹopilaxat so qomyipi. Ca' so qomyipi pila so lashi. Ca queco'na'le, ca' so Siria laseripi ỹaxanñi quiyim queetapegueu'a quiyi na'laua so llaalqaipi so Israel. (6.24—16.20 So Eliseo ỹa'xat quiyim rauegaxan yi 'laua Samaria. 'Ue da leloxoỹaxac so nashillipi quiyi Israel chaqai yi Judá. So co'uaataxanaxaic na'qaatec chaqai na' ileu so Eliseo. Chaqai 'vii saua liỹa' 'neeta so nashillipi quiyi Israel chaqai yi Judá.)