2 Reyes 4 - La'qaatqa ñi qota'olec Qota'olec & Qota'olec Novita Na Qomyipi

So Eliseo chaqai aso 'aalo na'ñi yi Sunem

⁸ Ca 'uo' so na'xa'a quiyim so Eliseo quejlec yi Sunem, ca 'uo' aso 'aalo nesallaxana na'ñi yi Sunem ỹaatqajam 'xoic da lepagaxallic quiyim lqui'ỹaaqa' yi la'a'. Ca co'quena' que'tegueyi so Eliseo, ca lotqai lqui'ỹaaqa' yi la'a' aso'maxare.

⁹ Ca aso'maxare 'naaco' queso loua: —'Ajñi', ỹim sa'den quiyim sotaq ỹale noviretapego' quen quena qara'a', so'maxare só'maq ỹaatqajam co'teeta letaxaỹaxaqui ñi qota'olec.

¹⁰ 'Maxaraic quiyim so'ueetaq ca liỹa 'imec pa'aashiguim quena qouo'. Ca ma'le, ca sahoqe ca sellaqaugui nomala', nqui'ỹaxala', qa'xanaxaqui chaqai ncoỹeraxanaxaqui, qaiyi ma' ỹovi' ca na'xa'a quiyim liỹa novi' na'piichalo qomi', ca naugui nqaishinaq.

¹¹ Ca 'uo' so na'xa'a quiyim sojo ỹale ỹovita quiyim la'qaugui so 'imec.

¹² Ca' so Eliseo 'naaco' queso lelaatec leenaxat Giezi: —Ñaqai ỹaxañire'oga aca 'aalo la'a' najo. Ca' so lelaatec roỹaxane'oga aso 'aalo. Ca co'na' ỹoviro aso'maxare, ca' so Eliseo 'naaco' queso lelaatec:

¹³ —Mo'e', quirepegue' ada 'aalo, ma' ada'maxare ỹaatqajam qouagaxanqachaqai coqomi', quiyim no'm 'ue ca shinqa'tegue quiyim sotauanaq, no'm ỹa'maxarenta qarqouaca'gue quiyim setaxaỹaxalec quiñi nashi loqo'm quiñi nouaataxanaq lashi. —Ỹim ya'maqachiguiñi quená'maq chi iuo' laseripi —'naaco' aso'maxare.

¹⁴ —Qam nagui ¿nega'ỹo' cá'maq so'ueetaq caso'maxare? —'Taque' —'naaco' so Giezi—. Ma' so'maxare qaica llaalec, chaqai ñí'maq loua mashic qo'xoỹom.

¹⁵ —Oỹaxañira'pegue' —'naaco' so Eliseo. Ca' so lelaatec roỹaxana'pegue' aso'maxare, qam aso'maxare na' ỹovita ñi lasom, ca' hua'e.

¹⁶ Ca co'na'le, ca' so Eliseo 'naaco' caso'maxare: —Quena liỹa ñaaxa, ca' 'ue ca qachaalqui' ma' ỹovire'oga najo na'xa'a. Ca aso'maxare 'naaco': —'E', qami' ỹa'gaxala', se yayiñi', ma' qami' nale ñi qota'olec.

¹⁷ Qam quedá'maq 'naac so Eliseo ỹaatqajam ipaquichigui. Ca' aso'maxare 'man, ca' queso liỹa ñaaxa, ca' ne'qaañi so llaalec.

¹⁸ Ca' so noctoqui' noquiiquetashiguim da llaxataxac. Qam 'uo' so na'xa'a, ca eec ra'ajnaxane'oga so leta'a hueeta'oga so naqataxanyipi.

¹⁹ Ca so'maxare ỹaualqatac, 'naaco': —¡'Agai, ỹaatqajam sevichigui na iqahic! Ca co'na'le, ca' so leta'a 'naaco' queso lelaatec: —Viquira'a aca late'e.

²⁰ Ca só'maq lelaatec ỹauega'a ca neeta'ñi aca late'e, ca' nqa'xanlgoto nqai'en naua loteletari, chi ỹovireta'a so na'xa'a lavinñi. Ca co'na'le, ca' so noctoqui' ileu.

²¹ Qam aso'maxare taashi'ma so pa'aashiguim lauo' so qota'olec letaxaỹaxaqui, ca illaalec so lomala', ca' inoxonec, pootagui nqai'en ca lasom.

²² Ca na' ime roỹaxane'oga so loua, ca 'naaco': —Nelachiro ca relaachiqui' quiyim nauego aca 'ashina, qaiyi shicpegue' ca qota'olec letaxaỹaxaqui. Ime, ca' yapil.

²³ —¿Chi'negue ma' quirepegue' nagui? —renataxano' so loua—. Ma' sqai dalaxaic ñi shiraigo chaqai se co'mataxaqui najo na'xa'a. —Qaica huapigui qavilli' —'naaco' aso'maxare.

²⁴ Ca' relaataxanlec quiyim qaỹo'uejlec aso 'ashina, ca 'naaco' queso lelaatec: —Qolaq, qolqata, sqai vire'e toco' ma' ỹovita quiyim 'ue ca shinac caqami', 'neeto' 'viichi' quiyim seu'e.

²⁵ Ca' quedajo, ca so'maxare eec. Ca' chi ỹovireta'a ada qa' ladocai leenaxat Carmelo yí'maq neeta'ño' so letaxaỹaxaqui ñi qota'olec. Ca co'na' ñaq qoỹoqo'chiguit, ca so Eliseo iuañi'chiguit, ca' 'naaco' queso lelaatec Giezi: —'Ajñi', chaqana ana 'aalo na'ñi yi Sunem.

²⁶ Ni'guiñite' quira'guit, ca' nachi' negue' cá'maq 'neetari', chaqai negue' cá'maq 'neetari' ca loua chaqai ca llaalec. Ca' so nelaatec eec, ca aso'maxare 'naaco' quiyim ỹa'maqachiguiñi.

²⁷ Ca co'na' ime, ca ỹovita aso qa' ladocai yí'maq neeta'ño' so Eliseo, ca' qa'aalouguilo naua lichil. Ca nqo'neuo' so Giezi, ma' ỹahotaque ỹoỹootec. Qam so Eliseo 'naaco' queso'maxare: —'Xañirac, 'anta, 'xoic da le'xoric, qam nagui saqa'leca ca 'naac ñi qara'gaxala' caỹim, negue' cá'maq 'neeta dajo.

²⁸ Ca co'na'le, ca' asó'maq 'aalo 'naaco': —Qami' ỹa'gaxala', ca' ¿ỹimo' ná'maq sashiila'e' na'le quiyim 'ue ca ỹaalec? ¿Mesqai sashiila'e' na'le qami' quiyim se yayiñi'?

²⁹ Ca co'na'le, ca' so Eliseo 'naaco' queso Giezi: —Na'maxachiriñi, coñichiguit ana ỹashilete, ca' 'itegue da'maxare. Ca no'm 'ue ca nachiñira'guit, totaxan quiñi'o'. Chaqai no'm 'ue ca riquiñi', totaxan saachichiguito'. Ime, ca' ana ỹashilete lli'relec na lashic ca noctoqui'.

³⁰ Qam asó'maq late'e so noctoqui' 'naaco' queso Eliseo: —Saanot da ỹa'qaatec ñi qara'gaxala' chaqai qami', quiyim sqa shique'e najo, no'm sqo qui'. Ca co'na'le, ca' so Eliseo quegue aso 'aalo.

³¹ Ca só'maq Giezi 'aueta quesaua'maxare. Ca co'na' ỹovi', ca' illilec na lashic so noctoqui' aso nashilete. Qam so'maxare qaica quet cá'maq netanec quiyim liỹa quet nca'leuec. Ca' so Giezi pilliguit so Eliseo. Ca co'na' ỹovichiguit, ca 'naaco': —Yí'maq noctoqui' tot liỹa nca'leuec.

³² Ca co'na' so Eliseo inoxonougui ca 'imec, ca' so noctoqui' shi'co' ileu, hueetalec so nomala'.

³³ Ca co'na' inoxono, ca ỹapogui so lasom, ca' nqouagaxainot ñi qara'gaxala'. Qaisootam nodajlec so noctoqui' ileu pa'aataho.

³⁴ Ca co'na' ime, ca so Eliseo taalec so nomala', ca' nenanlec so noctoqui'. Ca naloqojnejlec so lap, naua nqote', naua lqai'laqate', ca' pataxaguit na loshicmaxa so noctoqui'. Co'na'le, ca' npa'eeuec so noctoqui'.

³⁵ Ime, ca' so Eliseo ne'laxashiguim, ca' chaqai taaguilo quiñi 'imec lauel, ca' lotqai nqa'paxanegue so noctoqui', qa'aalegue. Ca' so noctoqui' siete raqashin, ca' chi naviqueterec naua nqote'.

³⁶ Ca' so Eliseo roỹaxana so Giezi. Ca 'naaco' queso'maxare: —Ỹaxañire'oga ada 'aalo. Ca' so Giezi roỹaxane'oga aso 'aalo. Ca co'na' ỹoviro aso'maxare quiyí'maq hueeta'ñi so Eliseo, ca 'naaco' caso'maxare: —'Ena ná'maq qachaalqui'.

³⁷ Ca' aso 'aalo nqo'neuo, ca' qa'aalouguilo naua lichil so Eliseo. Ime, ca iconot so llaalec, ca' inoxonec queso 'imec. (4.38-41 Qaica ca idon so na'ic redoonataxan.)

Ñi qota'olec nqo'naxatec so na'ic

⁴² Ca co'na' ime dajo, ca' ỹoviro' so ỹale na'gue da Baal-salisa, nodou'alo so Eliseo saua veinte paañi' chicqaugui ana cebada chita'gue nqatelecse', chaqai so trigo hueetagui aso ñoxoqui. Ca' so Eliseo ila'o' so lelaatec 'naaco': —'Ỹaañitem na qomyipi ñaq que'o'.

⁴³ Qam so lelaatec 'naaco': —¿Negue' cá'maq shinta'co' quiyim saanec quena cien qomyipi? Ca' so Eliseo 'naaco': —'Ỹaañirec quena qomyipi ñaq que'o', ma' ñi qara'gaxala' 'naac quiyim ná'ogue ma'le que'e, qam ñaqa 'ue ma'le ca naauec.

⁴⁴ Ca' so lelaatec chaqaida 'ne'tegue, ca sá'ogue que'e. Qam ñaqa 'ue so naauec, ma' chaqaido' dá'maq 'naac ñi qara'gaxala'.