2 Reyes 24 - La'qaatqa ñi qota'olec Qota'olec & Qota'olec Novita Na Qomyipi

¹ Ca co'na' ñaqai neetaho quiyim nashi so Joacim, ca' so Nabucodonosor, só'maq nashi quiyi Babilonia, inoxona'a yi 'laua, ca' loxonec. Ca' so Joacim qailaretac queso'maxare quesaua tres ñaxari. Ca na' ime, ca' ỹoỹoota'a da la'deenataxanaxac, ca' npa'guene'e' so'maxare.

² Qam ñi qara'gaxala' ilata so Joacim so cuataxai qomyipi quena caldeoipi, sirioipi, moabitaipi chaqai na amonitaipi, ilata yi Judá, ma' ỹahotaque nopoxoỹaxajñi. Ca' ipacqajanchigui dá'maq 'naaco' na'le ñi qara'gaxala' na' retaqaugui so letaxaỹaxaquiripi.

³ Dajo 'neeto' na'le quiyi Judá, ma' chaqaida ỹahotaco' ñi qara'gaxala', ma' ỹahotaco' ỹo'daauec sauaxat so Manasés 'xoico' na lasauaxaset,

⁴ chaqai sauaxat so lalauatqaipi qaica ca ỹasauaxat, ỹocoraxata'pe saua leuo' quiyi Jerusalén. Ca vichiguiño' ñi qara'gaxala' tot ishit quiyim se ỹa'ue ca nouaxanaxaset.

⁵ Ca' ná'ogue na liỹa na'qaataxac so Joacim chaqai ná'ogue ná'maq ỹo'uet, qoỹeretalec aso lomalate na nashillipi quiyi Judá.

⁶ Ca co'na' ileu so'maxare, ca' qoỹano quiyim nashi so llaalec Joaquín.

⁷ Ca queco'na'le, ca' so nashi quiyi Egipto tot inoxonec quiyim ca'e so na'laua, ma' so nashi quiyi Babilonia ỹomata'ta' loxonec ná'maq loxonqaipi so'maxare, chicqochi'ñi so ñaachi quiyi Egipto, ỹovira'a aso lachiugue Eufrates.

So nashi Joaquín noxonec, ca' qaỹaueguegue da Babilonia

⁸ So Joaquín dieciocho niñaxari co'na' inoxono quiyim nashi, ca' tres shiriguiri nashi quiyi Jerusalén. Ca' aso late'e leenaxat Nehusta, llaale so Elnatán, na'ñi yi Jerusalén.

⁹ Qam ñi qara'gaxala' se nqo'ta ná'ogue ná'maq ỹo'uet so'maxare, ma' 'nejem dá'maq lo'ueenataxanaxac na'le so leta'a.

¹⁰ Ca' quesaua ñaxari, ca' so nalliripi so Nabucodonosor, nashi quiyi Babilonia, quepegue' nahiquinchiguiñi yi Jerusalén, ca nalauate'e'.

¹¹ Ca co'na' ñaqai qanalauateta'pegue' so Jerusalén, ca novi' so nashi Nabucodonosor.

¹² Ca co'na'le, ca' so Joaquín, só'maq nashi quiyi Judá, chaqai aso late'e, chaqai so la'gaxala' so nalliripi, chaqai na ỹalliripi npe'eeteripi, nañaanot so nashi quiyi Babilonia, ca noxonqaipi so'maxare. Ca' sojo hueetougui na' ỹovi' ocho ñaxari quiyim nashi so Nabucodonosor.

¹³ Na' ime, ca' so Nabucodonosor naqata'a ná'ogue ná'maq no'uen louenec aso no'ueenaxanaxaqui chaqai queso 'imec lodegaxat, lauo' so Joaquín. Ca' ỹaatqajam ipaquichigui da la'qaatec ñi qara'gaxala' na' ỹopoxoỹaxachigui ná'ogue na nouenec 'oro ná'maq ỹo'ueeto' na'le so Salomón, na' nashi quiyi Israel, ỹauaaque louenec añi no'ueenaxanaxaqui quiñi qara'gaxala'.

¹⁴ Ime, ca' i'xat coñi' sá'ogue so qomyipi quiyi Jerusalén, chaqai sá'ogue so nashillipi lotauaripi, chaqai só'maq 'ñaaxaic nalliripi, chaqai sá'ogue so no'xona lo'ollipi, toco' ma' ỹovi' diez mil na lcoñiiteguesec. Ca' qaica ca no'ueenañi queso 'laua, qainaata na 'xoraiquipi.

¹⁵ Ca' so Nabucodonosor i'xat coñi' so Joaquín chaqai aso late'e, chaqai saua loua', so lotauaripi nashillipi, chaqai so qomyipi paguec qaimaqachin quiyi 'laua. Chicqochi'ñi yi Jerusalén, ca i'xat coñi' ỹaueguegue da Babilonia.

¹⁶ So nashi quiyi Babilonia ỹovi' siete mil so lcoñiitegueseripi quená'maq choxoraic qomyipi, chaqai mil só'maq 'ue na ỹa'den ỹoreta'oguit, chaqai 'ue na lecat lo'ollipi, chaqai na qomyipi 'ñaaxaiquipi.

¹⁷ Ime, ca' so nashi quiyi Babilonia ỹano quiyim nashi so Matanías, ỹana'ñi yi loma' so leteesec Joaquín. Ca qaỹadalaxat da leenaxat, qoỹanegue leenaxat Sedequías.

Da lo'ueenataxanaxac na' nashi so Sedequías

¹⁸ Ca' so Sedequías ỹovite' yaua veintiuno niñaxari na' nashi, ca' ỹovi' once ñaxari quiyim nashi, neeta'ñi yi Jerusalén. Ca' aso late'e leenaxat Hamutal, llaale so Jeremías, só'maq na'ñi yi na'a' Libna.

¹⁹ Qam ñi qara'gaxala' se nqo'ta ná'maq ỹo'uet so'maxare, ma' 'nejem dá'maq 'ne'tegue na'le so Joacim.

²⁰ Ca' ñi qara'gaxala' ỹaatqajam ro'ỹa yi Jerusalén chaqai yi Judá, ca' ỹaatqajam ỹo'derauec. Ime, ca' so Sedequías npa'guene'e' so nashi quiyi Babilonia.