2 Reyes 20 - La'qaatqa ñi qota'olec Qota'olec & Qota'olec Novita Na Qomyipi

Da ralolaxa chaqai da natarenataxac so Ezequías

¹ Ca' quesaua ñaxari, ca' so Ezequías ỹaatqajam chalego lecaic da ralolaxa, ca' so letaxaỹaxaqui ñi qota'olec, Isaías, só'maq llaalec so Amoz, quepegue' ra'ỹa'a, ca 'naapego': —Ñi qara'gaxala' 'naacsa': 'Ỹaañirec ca pa'aatec raqataxaqui' quena qachaalaxai'ipi, ma' ma'le, ca rillivi', ma' qaica ca ratachi'.

² Ca' so Ezequías reloqo'ojta queso 'imec lahi, ca 'ne'teco'yi da nqouagaxainaxac quiñi qara'gaxala':

³ —Ỹim sashiila'e' qami' ỹa'gaxala', quiyim o'lliinchira'a quiyim ỹim qamaxaraic quena' so'uet cá'maq 'maxariñite'. Ca' ỹaatqajam noỹen.

⁴ Ca co'na' so Isaías saqa' ca'e yi nasoxoc so lauo' lodegaxat so nashi, ca' ñi qara'gaxala' 'naaco' queso Isaías:

⁵ —Pilliro, ca 'ñirapega ñi Ezequías ñí'maq la'gaxala' na ỹalamaxareteripi, ca 'ñiraco': Ñi qara'gaxala', ñí'maq qota'olec queso 'auaxaic qareta'a David 'naacsa': Ỹim ña'xaỹaxana so nqouagaxainaxaqui' chaqai seuanalo saua rachichi', ca ỹim somachirec. Ca quenauajo tres na'xata', ca' shichi' quirepegue' ñi no'ueenaxanaxaqui quiyim qanqouagaxainot aỹim.

⁶ Ca' sa'vii caua liỹa' quince ñaxari quiyim rca'lli'sauec. Qami' chaqai yi Jerusalén so'ootaxanlec ma'le quiñi nashi quiyi Asiria. Ỹim so'ootaxanlec najo na'a', ma' sa'deena'a so ilaatec David chaqai ña'deenalta'.

⁷ Ca' so Isaías relaataxanlec quiyim qaỹonaxajta' aso higo la, ca qaỹo'uet ca qaỹa'meenlec aso le'neete so nashi. Ca' so nashi imeuec.

⁸ Ca co'na'le, ca' so Ezequías inato' so Isaías, 'naaco': —¿Nega'ỹo' ca itanec quiyim sa'den quiyim ñi qara'gaxala' yomatec, chaqai quiyim quenauajo tres na'xata', ca' seshit quiyim shicpegue' añi no'ueenaxanaxaqui quiñi qara'gaxala'?

⁹ Ca' so Isaías 'naaco' queso'maxare: —Dajo dá'maq retanqui' quiyim ñi qara'gaxala' imigui nqai'en da la'qaatec: ¿Peeta'a vi'saque quiyim nqo'in diez na la'al añi netana cañi ra'aasa, loqo'm pil na la'al?

¹⁰ Ca' so Ezequías 'naaco' queso'maxare: —Quiyim nqo'in na la'al, ca' qaica ca lqalaic, qam dá'maq 'xoic lqalaic quiyim pil na la'al.

¹¹ Ca' so qota'olec letaxaỹaxaqui Isaías nqouagaxainot ñi qara'gaxala', ca' ñi qara'gaxala' ỹo'uet quiyim pil diez lqo'naqate' na la'al caso ra'aasa lo'o looỹac so Acaz.

So Ezequías quelolliguit so nelaatqaipi chicqa'gue da Babilonia

¹² Ca' quesauajo ñaxari, ca' so nashi Merodac-Baladán, llaalec so Baladán, só'maq lashi na Babilonia laseripi, so'maxare 'uo' da la'xaỹaxac quiyim so Ezequías ralolaxaic. Ca ỹa'ue so ila' qomyipi, ilata aso lere, chaqai ỹo'uet aso lachitaxanataxanqate.

¹³ Ca' so Ezequías quelola so qomyipi, chaqai ỹachaxanem so louenqaipi plata chaqai na 'oro, na nocoraxat, chaqai ná'maq no'uen aceite, chaqai ñi lapoonaxanaxaqui quena lo'goxonaxat, chaqai ná'ogue ná'maq lquepoc. Chaqai ỹachaxana ná'ogue ná'maq hueetaugui ñi lauo' chaqai quiyí'maq na'laua.

¹⁴ Ca so qota'olec letaxaỹaxaqui Isaías eec, quepegue' so nashi Ezequías, ca inato', 'naaco': —¿Negue' cá'maq chicqa'gue so ỹalliripi chaqai negue' cá'maq 'naac caqami'? Ca' so Ezequías 'naaco': —Ỹaatqajam qoỹoqo'ta ca 'laua chicqa'a, leenaxat Babilonia.

¹⁵ Ca' so Isaías renataxano', 'naaco': —¿Negue' ca iuana quena qauochi' lodegaxat? Ca' so Ezequías 'naaco': —Ná'ogue ná'maq hueetaugui ỹa'ajantac, chaqai ná'ogue ná'maq hueetaugui na ỹa'maqataxanaxaquiripi, ná'ogue sachaxanem.

¹⁶ Ca' so Isaías 'naaco' na'le queso Ezequías: —Na'xaỹaxañita da la'qaatec ñi qara'gaxala', 'neetasa':

¹⁷ 'Uo' ma'le ca na'xa'a quiyim ná'ogue na hueetaugui na qauochi' lodegaxat chaqai ná'ogue ná'maq lapoonecsec so 'auaxaic qata'alli'ipi ỹovira'a najo na'xa'a qai'xategue da Babilonia. Ca' qaica ca no'ueenañi ma'le.

¹⁸ Chaqai vire'ta quena ralamaxarichi' qachaalaxai'ipi 'ue ca qai'xategue ma'le da Babilonia, ca qanaqate' ma'le ñaua lolaa, ca na'ñi ma'le yi la'a', ca lelaatqaipi ma'le ñi nashi.

¹⁹ Ca ra'deenataxantac so Ezequías quiyim ma' ñaq nca'leetauec, ca' 'ue da neuagaxa chaqai qaicanqaida, ca 'naaco' queso Isaías: —Da la'qaatec ñi qara'gaxala' 'ñirac, da'maxare ỹa'maqachiguiñi.

Da lelauaxa so Ezequías

²⁰ Ca ná'ogue na liỹa na'qaataxaquipi so Ezequías chaqai 'ñaaxaic quena' nalauat chaqai dá'maq 'neeta na' ỹo'uet aso huaxaỹaq lahi' chaqai só'maq lligo nqai'en na huaxaỹaq quiyi Jerusalén, qoỹeretalec aso lere lomalate da na'qaataxac so nashillipi quiyi Judá.

²¹ Ca co'na' ileu so Ezequías, ca' qoỹano quiyim nashi so llaalec Manasés.