2 Reyes 2 - La'qaatqa ñi qota'olec Qota'olec & Qota'olec Novita Na Qomyipi

So Elías taashiguim queda piguim

¹ Ca co'na' ỹovita ca laloqo' quiyim ñi qara'gaxala' ỹahotaque i'xategue da piguim so Elías queetougui nqai'en aso la'taxanaxa. Ca' so Elías chaqai so Eliseo que', quere'e yi Gilgal.

² Ca' so Elías 'naaco' queso Eliseo: —Qovire'e quenajo, ma' ñi qara'gaxala' yilategue da Betel. Qam so Eliseo 'naaco' queso'maxare: —Saanot da ỹa'qaatec ñi qara'gaxala' chaqai qami' quiyim se ñodaqajñiterec qaqamite'. Ca que', niỹareta'pe taategue da Betel.

³ Qam só'maq netaxaỹaxaquiripi na'ñi yi Betel naxata'guit so Eliseo, ca qohinapego': —¿Mashic 'yiiñi'o' quiyim ñi qara'gaxala' quiyim nagui quena na'xa'a ỹahotaque ỹaconsop so napaxaguinatqochi'? —Ajá'a, shi'gue sa'den —'naaco' so Eliseo—, qam qamiri qaico' ca 'ñiỹac.

⁴ Ime, ca' so Elías lotqai 'naaco' queso Eliseo: —Qovire'e najo, ma' ñi qara'gaxala' yilategue da Jericó. Qam so Eliseo 'naaco': —Aỹim saanem ñi qara'gaxala' da ỹa'qaatec chaqai qami' quiyim se ñodaqajñiterec qaqamite'. Ca co'na'le, ca lotqai que' nauequetecta' taategue da Jericó.

⁵ Qam so netaxaỹaxaquiripi na'ñi yi Jericó naxata'guit so Eliseo. Ca qohinaco' queso'maxare: —¿Mashic 'yiiñi'o' quiyim ñi qara'gaxala' quena na'xa'a ỹahotaque ỹaconsop so napaxaguinatqochi'? —Ajá'a, shi'gue sa'den —'naaco' so Eliseo—, qam qamiri qaico' ca 'ñiỹac.

⁶ Ime, ca lotqai 'naaco' so Elías queso Eliseo: —Qovire'e quenajo, ma' ñi qara'gaxala' yilata aso lachiugue Jordán. Qam so Eliseo 'naaco' queso'maxare: —Saanec da ỹa'qaatec quiñi qara'gaxala' chaqai caqami' quiyim se ñodaqajñiterec qaqamite'. Ca co'na'le, ca que', niỹareta'pe.

⁷ Qam cincuenta so netaxaỹaxaquiripi eec, co'uajlgoto saua'maxare. Qam ñaqai ỹoxalom saua'maxare, ca' hua'e so qomyipi quiyi nalootere'oga. Ca' so Elías chaqai so Eliseo huere'e, hueeso'ot na lqodoc aso lachiugue Jordán.

⁸ Ca co'na'le, ca' so Elías icona so lapo', inanta', ca' ỹouaxanñigui so huaxaỹaq. Ca' so huaxaỹaq shicchigui. Ca saua'maxare paquera'ta aso lachiugue, rashivichigui.

⁹ Ca co'na' ime paquera'ta, na' ỹovirereta, ca' so Elías 'naaco' queso Eliseo: —Nagui sahotaque 'ñirapiguiỹa' negue' cá'maq vi'saque quiyim so'uet caqami', tomaq saqa' qaỹoỹoote'oga ỹim caqami'. Ca' so Eliseo 'naaco': —Ỹim sahotaque quiyim nañaañirim dá'ogue da rquesaxanaxa'e' quiyim aỹim letaxaỹaxaqui ñi qota'olec.

¹⁰ Ca' so Elías 'naaco': —Ỹaatqajam sqai cocho'qui' da shiilaxañisaque. Qam no'm huañitetegue aỹim ma' qaỹoỹoote'oga aỹim caqami', ca' qoỹaañiraxorom. Qam no'm sqai huañitegue aỹim, ca' se qoỹaañiraxorom.

¹¹ Ca saua'maxare ñaqai queete', retaqatecta'. Ca' chi re'laqataxanta quiyim qaiuañi'chiguit aso nahoglena ỹaviquetaugui, ca' saua lo'ol shipga' qai'neeta ỹaviquetauguilo, ca iuagaxachiguilo saua ỹale'. Ca' so Elías taashiguim queda piguim, queetougui aso la'taxanaxa.

¹² Ca co'na' iuanchigui dajo so Eliseo, ca ỹaualqo', 'naaco': —Qami' ita'a, qami' ita'a. 'Ñiisari' quen ca 'ñaaxaic nalauataxairipi quena llaalqaipi so Israel. Ca co'na' ime dajo, ca' tot iuanegue so Elías. Ca' so Eliseo ỹaatqajam nasectaqta'ahi saua loho queda le'xoric.

So Eliseo qoỹanagui da lo'ueenataxanaxac so Elías

¹³ Co'na'le, ca' so Eliseo ỹacono' so lapo' so Elías najño' na' taashiguim, ca pilaxaso'ma aso lachiugue. Ca na' ỹovitot na lahi, ca' hua'e.

¹⁴ Ca co'na'le, ca so'maxare ỹouaxanñigui so huaxaỹaq queso nepo'. Ca' netenegue da la'qaatec, 'naaco': —¿Hueeta'gue ca qara'gaxala', cá'maq qota'olec queso Elías? Ca na' chi ỹouaxanñigui so huaxaỹaq queso nepo', ca' shicchigui so huaxaỹaq. Ca' so Eliseo liỹa paca'ta aso lachiugue.

¹⁵ Ca' so netaxaỹaxaquiripi na'ñi yi Jericó ñaqai hueeta'ta'gue da liỹa lemanaxa. Co'na' ỹauanchigui dajo, ca 'naaco': —¡Ñaqai 'ajñii da lquesaxanaxa so Elías ta'ñigui so Eliseo! Ca co'na'le, ca so qomyipi ca'guit, ca' ỹa'dooto naua le'cootal.

¹⁶ Ca' qohinaco' queso'maxare: —'Ajñi', qomi' nallichi'ipi, qomi' cincuenta 'ñaaxaiquipi. 'Maxariñite' quiyim sedaanqaque ca napaxaguinqochi', ma' sqoue quiyim so ne'espíritu ñi qota'olec i'xajshiguim, ca 'ue ca inaxalec cana quemaralec qa' ladocai, loqo'm ca no'ueenaxa. Qam so'maxare 'naaco': —'E', qaico' ca larii.

¹⁷ Qam ỹaatqajam 'xoic da nepagaxallic, ca vire'to' na' qaila' so cincuenta ỹalliripi. Ca' so qomyipi idaantaque so Elías quesaua tres na'xata', qam se qoỹanata.

¹⁸ Ca' pila yi Jericó yí'maq hueeta'ñi so Eliseo. Ca so'maxare 'naaco' queso qomyipi: —Cha'ma' shi'gue shinac caqamiri quiyim sqo quii. (2.19—4.7 So Eliseo netaxaỹaxaqui na' ỹoxogue so Elías. Yi na'ñi yi Moab nalauate'e' so nashillipi quiyi Israel, Judá chaqai yi Edom.)