2 Pedro 1 - La'qaatqa ñi qota'olec Qota'olec & Qota'olec Novita Na Qomyipi

Aso lelaata so Pedro ilata só'maq mashic icoñiguit da na'qaatec

¹ Aỹim ỹeenaxat Simón Pedro, ỹim la'ac chaqai aỹim lelaatec so Jesucristo. Shiriñi ana ilaata tai'alo nqaishine' qamiri quiyim mashic viriỹau'a dá'maq chalego loyac rpi'ỹaxaguii 'nejem dá'maq npi'ỹaxac hueeto'oto qomi', ma' so qota'olec Jesucristo, só'maq qarca'laxaqui, so'maxare ishit ỹo'uet ca ỹa'maqachiguiñi.

² Sahotaque quiyim coñiguit da chalego lecaic qouagaxa chaqai da na'maxa chicqochigui quiyim mashic 'ue da 'yiiñii quiñi qota'a chaqai quesó'maq qara'gaxala' Jesús.

Dá'maq 'neetari' cá'maq queeta'pegue' so Cristo

³ Ñi qota'a ỹachigoxochichigui dá'maq chi lquesaxanaxa quiyim ỹaanema qomi' ná'ogue ná'maq souenqataque queda qanachaalataxac chaqai quiyim ỹaatqajam ñañaanqot ñi'maxare, ma' ỹo'uet quiyim sa'deenaq so Cristo só'maq roỹaxanalo qomi', ỹahote'e da chalego lecaic lquesaxanaxa chaqai da chalego loyac lo'ueenataxanaxac.

⁴ Ca' ỹachigoxochichiguilo nauajo nauá'maq 'em quiyim ñi qota'a 'ue da ỹachaxantac coqomi' chalego lecaigue' chaqai chalego lecaic ca lashivichaxac, qaiyi chicqochigui dá'maq qaỹachaxantac, ca' qamiri viriỹau'a quiyim nouañiỹau'a da no'ueenataxac ñi qota'a chaqai rayichii sqa lliguiguit ná'maq se no'uen namaanaxanaxa qanodolec na 'laua.

⁵ Ca' vichiguiño' quedajo, ca' na'ñaxachii qotqajñiguit da rpi'ỹaxaguii dá'maq quiyim na'maxachita; chaqai queda na'maqataxaguii, ca ra'deenataxanaxaguii;

⁶ chaqai queda ra'deenataxanaxaguii, ca' nichiñiỹalta'; chaqai quiyim nichiñiỹalta', ca' da reualaxaviguii; chaqai queda reualaxaviguii, ca' nañaañiỹot ñi qota'a;

⁷ ca' queda nañaanaxaguii quiñi qota'a, ca' rqo'chiỹata' quiyim qamiri nqaỹa'; ca' queda nqo'iichi, da ne'xorenataxanaxa.

⁸ Qam no'm 'vii dauajo caqamiri chaqai quiyim noquigaxachiuec, ca' ỹaatqajam 'ue ca 'negue da nachaalataxaguii chaqai ỹaatqajam 'ue ca 'negue quiyim huañiỹa so qara'gaxala' Jesucristo.

⁹ Qam quecá'maq sqaicaua dauajo, ca 'neetari' ca qai'laq, loqo'm 'ec sqailligueme' neuanñi. Coua'e quiyim qanco'taxajñi ca 'auaxaic lasauaxaseteripi.

¹⁰ Vichiguiño' qamiri ỹaqaỹa', mashic ime quiyim roỹaxanalo chaqai nca'au'alo qamiri ñi qota'a, ca nquipichiỹa'pegue' quiyim dajo ỹaatqajam 'chichiguiñi nqai'ñii caqamiri. Ca no'm 'ñii'tegue dajo, ca' tot qaica ma'le ca huaañi.

¹¹ Qaiyi ỹaatqajam qaica ca quepaqchiguita qamiri quiyim noxoñiu'a da sqaica lqodoc lo'ueenataxanaxac so qara'gaxala' chaqai qarca'laxaqui Jesucristo ma' ỹoiquentac ná'ogue najo.

¹² Vichiguiño' shiquetalec quiyim ño'uenaxanta'peguelo qamiri, 'eno'm shi'gue 'yiiñii' nauajo chaqai sqai 'xañiuec dá'maq lliqueta mashic hueeto'oto qamiri nagui.

¹³ Ma' sa'den quiyim ỹa'maqachiguiñi nqaishin da'maxare, quiyim ñaqaỹim yca'leetauec, se yime saqatetapegalo qamiri quedajo naqataxac.

¹⁴ Ma' so qara'gaxala' Jesucristo mashic ya'deenaxanaxanegue quiyim sqaỹaloq shique'e dá'maq re'qoochigui ñachaalataxac.

¹⁵ Qam ỹaatqajam yiuogoq, qaiyi ma' ime quiyim yileu, qai'neete' qamiri se neme o'lliinchitapigui nauajo.

Sauá'maq iuanchiriquio' na'le da lecaic so Cristo

¹⁶ Da napaxaguinataxanaxac saanqaema qamiri na'le na' sa'xatqatac da lquesaxanaxa chaqai liỹa rapil so qara'gaxala' Jesucristo, da'maxare sqa chicqaugui nqaishinaq cá'maq chi no'ueenatec na'qaataxanaxac. Ta'ta'a quiyim quenauá'maq qanqote' seuanqachigui na'le da lecaic so qara'gaxala'.

¹⁷ Seuanqachigui na' ñi qota'olec ỹaanem quiyim qaimaqachin chaqai da lauaq. Chaqai so lavillaxac ñi qota'a na' 'ue da ỹa'xat chalego loyac na' 'naac: “Najo ná'maq ỹaalec ỹaatqajam ỹoqo'itaxat, chaqaida dá'maq 'em 'xoic da ñitoonaxac.”

¹⁸ Ca' qomi' ỹaatqajam sa'xaiqa'ta so na'qaatec chicqo'ot na piguim, ma' qomi' qariỹaatac so qara'gaxala' na' qanetaxaỹa'ña quiñi qota'a, seuqatalec ada quemaralec ladocai.

¹⁹ Qam qai'neeta 'ue da liỹa paguec 'chichiguiñi, ca' dajo chaqaida dá'maq la'qaataxanaxague' saua letaxaỹaxanqajanqa ñi qota'a mashic qoỹeretañi. Ca' qamiri 'maxaraic quiyim ỹaatqajam na'xaỹaxañii'ta dajo na'qaatec, ma' 'neetari' aca ncoỹeraxanaxaqui naviguec queca lapalqa', ỹovireta'a quiyim mashic richi'guit ca na'xa'a chaqai aca huaqajñi nete'ese nenoxonshiguim, ca' coỹarelgoto naua re'taxanatahi.

²⁰ Qam 'neeto' lotqai couahitaque dajo, quiyim qaica quet ca la'qaatec ñi qota'a quená'maq naneretañi, qaica quet cá'maq chi nodajlec quiyim ichoxot ca leloxoỹaxac.

²¹ Ma' ná'maq letaxaỹaxanqajanqaipi ñi qota'a se ỹauana quiyim nodajlec quet ca ỹa'xat. Ta'ta'a quiyim saua'maxare ỹaatqajam nañaantetot ñi qota'a, chaqai quiyim ỹa'xate' ca la'qaatec ñi'maxare, ca' so Espíritu Santo retaxahi' nqai'ne' saua'maxare.