1 Tesalonicenses 2 - La'qaatqa ñi qota'olec Qota'olec & Qota'olec Novita Na Qomyipi

Da lo'ueenataxanaxac so Pablo na' neeta'ñi yi Tesalónica

¹ Ma' qamiri qarqaỹa', ỹaatqajam 'yiiñita dá'maq 'neeta da qaroviraxac caqamiri mesqaida quet quiyim qaica ca 'negue.

² 'Nesa ma' na' seuqata'ñi yi na'a' Filipos ỹaatqajam 'xoic da qanishiuenaxac, chaqai qaỹouaxanta'pe qomi', qam da'maxare mashic shi'gue 'yiiñita. Qam na' ñovitaxalo qamiri, ca' ñi qota'a qarotauan quiyim ra'ñiiguilo nqai'ne' naua qovilli' quiyim sa'xatqatapeguema qamiri dá'maq na'qaatec chicqaugui da nca'laxa chicqo'ot ñi qota'a. 'Eno'm seuqataugui ná'maq 'xoic qanpa'guenaxac.

³ Ma' qomi' sa'deenqata quiyim se so'maqatac quecá'maq sa'xatqatac, chaqai quiyim se ỹa'maxañi ca shinqata'pegue quiyim setaxaiqatac, chaqai se sahoqotaque quiyim sayinaxaitac.

⁴ Ta'ta'a quiyim ñi qota'a ichoxote' quiyim ỹa'maxarente' qomi', ca' pataxalgoto qomi' quiyim sa'xataq da na'qaatec chicqaugui da nca'laxa. Ca' chaqaida dá'maq sa'xatqatac. Se sahoqotaque quiyim imaqachinta'pe qomi' na qomyipi. Ta'ta'a quiyim sahoqotaque quiyim imaqachinta'pe qomi' ñi qota'a, ma' ỹa'ajanta'pe naua qare'taxanata.

⁵ Qam mashic qamiri 'yiiñita quiyim se ỹauanapega llo'daqainqata'pe qamiri quecaua lo'yaxanqa qara'qaatqa, chaqai se ñañoxotqatañi quiyim sahoqotaque ñauegaq aca plata. Ca' ñi qota'a ỹaatqajam ỹa'deenta dajo.

⁶ Se ỹauanapega sahoqotaque quiyim qaimaqachine' qomi' quena qomyipi, caqamiri loqo'm quecanchaqaica liỹa, ma' qomi' lelaatqa so Cristo. Qam qaiyiita sqai shicqateguelec dajo quiyim sahoqotaque qaidaañiguita qomi'.

⁷ Ta'ta'a quiyim seneequesenqate' sichirqa'teguelo qamiri, 'ec aca 'aalo quiyim iỹaxatetac chaqai cochiitapega ca llaalqaipioqui'.

⁸ Qomi' ỹaatqajam 'xoic da qarauochaxa caqamiri. Vichiguiño' sqaidaata queto' da na'qaatec chicqo'ot ñi qota'a saanqaema qamiri, qam vire'ta dá'maq chi qanachaalataxac, ma' paguec da qarqo'iichi.

⁹ Qamiri qarqaỹa', no'viñita'gue quiyim ỹaatqajam 'ue da qaro'ueenataxanaxac chaqai ña'ñaxataq, ma' sahoqotaque quiyim ñauegaq ca qarepetaxanaxat. So'ueenataxanqatac quenaua na'xatari chaqai naua piri, ma' sahoqotaque quiyim qaica ca nesallaxantegueto qomi' na' senqatauguilo qamiri sa'xatqatac da la'qaatec ñi qota'a.

¹⁰ Ca' ỹaatqajam 'yiiñita chaqai ñi qota'a qai'neeta, queda qanachaalataxac ỹaatqajam co'teeta chaqai no'uen na' salecqatauguilo qamiri mashic coñiguit da na'qaatec. Mese sahoqai lligo ca qana'qaataxac se ỹa'maxañi.

¹¹ Chaqai qai'neeta 'yiiñii da qara'ñaaqataxanaxac chaqai quiyim lo'yigui lauel nqaishinaq quiñi 'óna caqamiri, 'nejem da 'neeta'gue ca neta'a queca llaalqaipi.

¹² Chaqai saqataxalo qamiri quiyim ỹaatqajam quiijlec da leloxoỹaxac ná'maq mashic queeta'pegue' ñi qota'a, ma' roỹaxanalo qamiri, qaiyi viriỹau'a nqai'en da lo'ueenataxanaxac ma' ỹoiquentac ná'ogue najo chaqai da lichoxoric.

¹³ Ca' chaqaida dá'maq 'em quiyim saanqatacot da qana'aachic ñi qota'a, ma' na' na'xaỹaxañiỹa da sa'xatqatac la'qaatec ñi qota'a, ca' coñiguit, qam mesqai 'ñiita'gue ca chi la'qaatec ca qom, 'ñiita'gue quiyim qota'a la'qaatec. Qam lliqueta quiyim ỹaatqajam qota'a la'qaatec da'maxare, ma' re'oq da lo'ueenataxanaxac caqamiri na' viilec.

¹⁴ Qamiri ỹaqaỹa', na' qaỹocanta'pe chaqai se qaỹa'maxata'que qamiri quená'maq chi qauori laseripi, dá'maq qohine'tegue qamiri chaqaida dá'maq qohine'tegue ná'maq queeta'pegue' ñi qota'a na'ñi yi Judea ná'maq huelec so Cristo Jesús. Ca na'maxare qai'neeta 'xoic da nocanaxac, qam dajo nocanaxac chicqaugui na chi lauo' laseripi judioipi.

¹⁵ Chaqaina najo judioipi ná'maq ỹalauat na'le so qara'gaxala' Jesús, 'ne'tegue so 'auaxaic leta'allipi quiyim ỹalauat so letaxaỹaxanqajanqaipi ñi qota'a. Ca' chaqaina ná'maq ỹo'derauec qomi' na'le. Ỹaatqajam se nqo'ta ñi qota'a na'maxare, chaqai se ỹaqamaxat ná'ogue na qomyipi.

¹⁶ Ma' quena' sahoqotaque quiyim sa'xataq da la'qaatec ñi qota'a quená'maq sqai judioipi, qaiyi ỹovira'oga da nca'laxa qai'neeta, ca lotqai se ỹa'maxaren quiyim sa'xataq da'maxare. Ca' quedajo, ca paguec noquigaxatec na lasauaxaset. Qam nagui, ca' ỹovita quiyim taalec dá'maq chalego lecaic nouaxanaxaset chicqo'ot ñi qota'a.

So Pablo ỹahotaque quiyim liỹa ra'piicha so Tesalónica laseripi

¹⁷ Qamiri qarqaỹa', na' cocho'qui' qolqa'ahi qamiri, 'eno'm se seuanaxalo qamiri, qam qaiyiita viitagui nqaishinaq añi qare'taxanata, chaqai 'xoic na qarishoxo quiyim qolaq, ca liỹa seuanaxalo qamiri.

¹⁸ Ca' sahoqotaque saxaquena. Quená'maq ỹim, Pablo, 'xoic sahotaque saiquena, qam quena'le lotqai qaranaxat so na'ỹaapec.

¹⁹ Ma' ¿negue' queto' ca ỹo'uet ca qanaquitaxac, chaqai ca qanetoonaxac? ¿Negue' queto' ca ỹo'uet ca la'maxa qouel queda ñitoonqata'pegue? Chaqaqamiri ma'le, ma' novi' so qara'gaxala' Jesucristo.

²⁰ Ajá'a, chaqaqamiri nauá'maq 'viichii ca la'maxa qouel chaqai ca qanetoonaxac.