1 Samuel 31 - La'qaatqa ñi qota'olec Qota'olec & Qota'olec Novita Na Qomyipi

So Saúl chaqai saua llaalqa ileueraugui so lauataq

¹ Ca' so filisteoipi queu'a quiyim nalauate'e' so nalliripi so Israel. Ca' so nalliripi so Israel 'eet, ma' ỹaatqajam 'xoic so qaỹalauat hua'ñi aso quemaralec qa' ladocai leenaxat Gilboa.

² Ca' so filisteoipi ỹocantac so Saúl chaqai saua llaalqa, ca qaỹalauat so Jonatán, Abinadab chaqai so Malquisúa.

³ Ime, ca' qaỹalamaxalec quiyim qoyiguelec so Saúl, ca' so novic lo'ollipi ỹoviralec so'maxare, ca' latenec. Co'na'le, ca' so'maxare ỹaatqajam no'chi.

⁴ Ca 'naaco' na'le queso lo'goxonaxat lo'o: —No'viiquirishiguim na lecachi', ca' ya'yirac, qaiyi mesqaina najo ỹalliripi chi nqouagaxaintacot na nqolac ná'maq yalauat, ca' yiualaxaintac. Qam so lo'goxonaxat lo'o se na'xaỹaxana, ma' no'chi. Ca co'na'le, ca' so Saúl no'viicshiguim so chi lecat, ca' nqa'paxanlec, ca' chi nalauatalta'.

⁵ Ca só'maq lo'goxonaxat lo'o co'na' iuana quiyim ileu so Saúl, ca so'maxare qai'neeta nqa'paxanlec so chi lecat, ca' queeta'anta' ileue'.

⁶ Ca' chaqaida 'neeto' na' ileue' so Saúl chaqai saua tres llaalqa, so lo'goxonaxat lo'o chaqai sá'ogue so nalliripi.

⁷ Ca co'na' so Israel llaalqaipi neeta'ta'gue da lemanaxa so ca'megue chaqai so pa'aata'gue da lqodoigue quiyi Jordán iuanchigui quiyim so nalliripi yi Israel 'eet, chaqai quiyim so Saúl chaqai saua llaalqa qaỹalauate', ca ỹalat na la'aateripi, ca 'eet qai'neeta. Ca co'na' ỹovi' so filisteoipi, ca' nauguilo naua lauootori so'maxare.

⁸ Ca co'na' queso liỹa na'xa'a co'na' so filisteoipi naqat na louenec na leuaxaiquipi, ca qaiuanejlec so Saúl chaqai saua tres llaalqa ileue' hueesa'ñi aso quemaralec qa' ladocai leenaxat Gilboa.

⁹ Co'na'le, ca' qaichaxauec na lqahic chaqai qaiconalo saua lo'goxonqate'. Ime, ca qaila' na na'qaataxanqajanqaipi quiyá'ogue yi na'laua na filisteoipi quiyim ỹa'ue la'xaỹaxac na qomyipi quiñi nqouagaxainaxaqui quena' nqouagaxainot cá'maq nashiilec nqolac.

¹⁰ Co'na' ime, ca iconalo saua lo'goxonqate' so Saúl, ca qailliraugui so qouagaxainaxaqui quiyim qanqouagaxainot aso nashiila Astarté. Ca sauá'maq leuaxaqa qoỹandashiguim queso lquepaqataxanaxat qa' yi na'a' Bet-sán.

¹¹ Ca co'na' so qomyipi quiyi Jabes huaugui yi 'laua Galaad ỹa'den dá'maq 'ne'tegue so filisteoipi queso Saúl,

¹² ca na'deenta' sá'ogue so ỹalliripi 'ñaaxaiquipi. Ca queetagui sá'ogue so pe, chi ỹovireta'a co'na' naqachiñi saua leuaxaqa Saúl chaqai saua llaalqa qailliralec so lquepaqataxanaxat yi na'a' Bet-sán. Ca co'na' ime, ca' so qomyipi pila yi Jabes. Ca quiyo' na'le, ca' qaicopata'alo.

¹³ Ime, ca' qaishinñi so lpi'naqaipi quiyi Jabes, qaishino'oto aca qo'paq. Ca co'na' ime dajo, ca' ỹovi' siete na'xata' quiyim so qomyipi nqopaaqachit.