1 Samuel 18 - La'qaatqa ñi qota'olec Qota'olec & Qota'olec Novita Na Qomyipi

So Jonatán chaqai so David na'deenta' quiyim ỹaatqajam 'ec nqaỹa'

¹ Ca co'na' ime quiyim so David retaqata'pegue' so Saúl. Ca' so Jonatán 'ec ỹaatqajam lqaỹa so David chaqai ỹaatqajam ỹauotegue, chi ỹovireta'a quiyim 'ec chaqaiso nauotalta'.

² Qam so Saúl, ca' chaqaiso sojo na'xa'a, ca' icona quiyim lelaatec, ca' sqai ỹaxanec quiyim pil queca la'a' ca leta'a.

³ Ca' so Jonatán chaqai so David ỹaandec da la'qaategue' quiyim se neme quiyim ỹaatqajam nauochaxaua', ma' so Jonatán ỹaatqajam lauochaxat so David 'ec nqai'en dá'maq chi nachaalataxac.

⁴ Chaqai so Jonatán naqate'e so napoxoqui chaqai so lachiimec ỹantañi, ca' ỹaanem so David, chaqai so lecat, chaqai aso lo'xoshic, chaqai so nosaataxaqui.

⁵ Ca' quiyi, ca' re'oq quiyim so David qaica ca lqalanec quená'ogue ná'maq qailarelec queso Saúl, vichiguiño' so Saúl ỹano quiyim la'gaxala' so liỹa nalliripi nalauataxairipi. Ca' dajo ỹaatqajam qaỹa'maxarenta queso nalauataxairipi chaqai so nashillipi queso Saúl.

So Saúl ỹaatqajam pa'guen da lichoxoric so David

⁶ Qam co'na' rapil so nalauataxairipi co'na' ime quiyim so David ỹalauat so filisteo, ca so 'aallipi quena na'aateripi quiyi Israel ca'guit so nashi Saúl, ro'ueenaxantagui chaqai rasotetac, ỹaatqajam 'ue da netoonaxac, ỹahote'e ana lasaquinata chaqai ana latoina.

⁷ Ca co'na' ro'ueenaxantagui chaqai rasotetac so 'aallipi, ỹopilaxateta'gue da la'qaatec, 'naaco' quen: Mil qomyipi so ỹalauat so Saúl, chaqai diez mil so ỹalauat so David.

⁸ Ca' quedajo, ca' se ỹa'maxagui lauel nqai'en so Saúl. Ca co'na' ro'o, ca 'naaco': —So David imaalec nqohin quiyim ỹalauat so diez mil qomyipi, qam caỹim, ca qaisauate' saua mil. Ca ¡saqa'leca cocho'qui', ca' qoỹano nashi!

⁹ Ca queco'na'le, ca' so Saúl 'ue da na'xaỹaxa queso David.

¹⁰ Ca' queso liỹa nete'e, ca' so ne'ec lecmaxaic chicqo'ot ñi qota'olec ỹoiquentac so Saúl. Ca' so'maxare mashic 'ec lecmaxaic neetaugui so lauo'. Ca' so David iviiquetapigui aso liviigue, ma' chaqai 'neetari'o' quen, qam so Saúl lo'qoota'a aso laqui.

¹¹ Ca nanorec aso laqui so Saúl, ma' ỹahotaque ỹa'dac so David, liỹaho nqai'en ñi 'imec lahi. Qam so David dos ỹaho'te llic aso laqui so Saúl.

¹² Ca' so Saúl no'cha'a so David, ma' ñi qara'gaxala' ỹotauantac so David, qam ñi qara'gaxala' tot ỹotauan so Saúl.

¹³ Vichiguiño' noỹootec nqai'en, ca' ỹanagui quiyim la'gaxala' so mil nalliripi. Ca quena' reloqouec chaqai quena' rapil, so'maxare 'auetauec.

¹⁴ Ca ma' qaỹotauantac so David quiñi qara'gaxala', ca' ỹaatqajam 'ue nqai 'negue quená'ogue ná'maq ỹo'uet.

¹⁵ Vichiguiño' so Saúl no'cha'a so'maxare, ma' ỹa'ajantac quiyim noquiiquetashiguim.

¹⁶ Qam quiyi Israel chaqai quiyi Judá ỹaatqajam nqo'ta so David, ma' chaqaiso só'maq lashi quena' taauec chaqai quena' rapilo quena' nalauat. (18.17—19.24 So Saúl ỹo'naxañiguit so David aso llaale, ma' ỹahotaque ỹocanac.)