1 Samuel 11 - La'qaatqa ñi qota'olec Qota'olec & Qota'olec Novita Na Qomyipi

So Saúl loxonec so Amón llaalqaipi

¹ Ca' so Nahas só'maq lashi so Amón llaalqaipi quepegue' yi na'a' Jabes huaugui yi 'laua Galaad. Ca na'maxajñi nqai'en so nalliripi, ma' ỹahotaque nalauate'e' yi'maxare. Qam so na'ñi yi Jabes 'naaco' queso'maxare: —'Maxaraic quiyim 'ue ca qana'maqataxac, ma' qomi' ñañaanqot qami' ma'le.

² Ca' so Nahas amonita le'ec 'naaco': —Ajá'a, ña'maxachiguita qamiri, qam no'm 'maxariñita quiyim ñaqat añi nqote loicse quiñi 'óna caqamiri, qaiyi so'uet quiyim ỹaatqajam qai'neetac na llaalqaipi so Israel.

³ Co'na'le, ca' so qo'xoiquipi nashillipi na'ñi yi Jabes 'naaco': —Ñaqai 'ỹaañitema qomi' caua siete na'xata' ma' sahoqe ca qarelaatqaipi quiyim ỹa'ue la'xaỹaxac ná'ogue ná'maq neeta'ñi na llaalqaipi so Israel. Ca no'm sqaica ca qarotauan, ca' ñañaanaxaguit qami' ma'le.

⁴ Ca' saua nelaatqa ỹovirera'a yi Gabaa yí'maq na'ño' so Saúl, ca qara'qaataxanem so qomyipi, ca sá'ogue so qomyipi noỹen naualqategueñi.

⁵ Ca noviro' so Saúl, chicqauec quena no'ueenaxa, no'deeta so lalo ñii'lolaipi. Ca renataxano': —¿Negue' ca 'neeta na qomyipi? ¿Chi'negue ma' noỹentagui? Ca' qara'qaataxanem so'maxare queda na'xaỹaxac nodo so qomyipi chicqa'gue da Jabes.

⁶ Ca' so Saúl co'na' 'xaỹa dajo, ca' so ne'espíritu ñi qota'olec na'ñaxat nqai'en so'maxare. Ca' ỹaatqajam chalego lauel.

⁷ Ca' ỹacona'alo saua dos laloo ñii'lola, ca ỹouaxana'que, ca' ỹa'ue so lelaatqaipi quiyim ỹoda'a na neeta'ñi na llaalqaipi so Israel. Ca' saua nelaatqaipi 'naaco' quena' 'ue na ỹovira'a: —'Eda qohine'tegue ca laloipi cá'maq se lapo'guita yaua Saúl chaqai ñi Samuel, chaqai quiyim queguelo. Ca' ỹaatqajam chalego lqolonaxa so qomyipi, ca chaqa'ma' eec lapoỹata', 'ec 'oonoqui' qom lapooguita saua'maxare.

⁸ Ca' so Saúl co'na' naloqochin so nalliripi quiyi Bezec, ca' ỹovi' trescientos mil so ỹalliripi chicqaugui na llaalqaipi so Israel, chaqai ỹovi' treinta mil na chicqaugui na llaalqaipi so Judá.

⁹ Ca co'na' ime, ca 'naaco' queso nelaatqaipi chicqa'gue da Jabes: —'Ñiỹapega ná'maq qomyipi quiyi Jabes nete'e ma' na'xa'a lavinñi, ca ñca'laxataxauec. Ca' so nelaatqaipi pil, ỹa'xat dajo quená'maq na'ñi yi Jabes, ca' ỹaatqajam netoontagui so qomyipi.

¹⁰ Ca' so qomyipi 'naaco' queso Nahas: —Ma' nete'e, ca' ñañaanaxaguit qami', qaiyi qaratoiquiñi'sac.

¹¹ Ca' queso liỹa na'xa'a, ca' so Saúl naloqojñi nqai'en so nalliripi tres nqai'ne' saua lomaate'. Ca co'na' saqa' richiguiñi, ca inoxonaugui na lavinñi ca nco'matqa' ca npa'guenaxauaripi. Ca' ỹaatqajam qanalauajñi so Amón llaalqaipi, chi ỹovireta'a so na'xa'a lavinñi. Ca ná'maq ca'laaxaiquipi ỹaatqajam neuagaxatetac, qaicaua caua nauequetecta'.

¹² Ca co'na' ime dajo, ca 'uo' so qomyipi 'naapega so Samuel: —¿Nega'ỹo' cá'maq sqai huelec quiyim nashi ñi Saúl? Ca 'ỹaañitema qomi' cajo qomyipi, qaiyi salauataq.

¹³ Qam so Saúl 'naaco': —Qaica ca qaỹalauat quenajo na'xa'a, ma' ñi qara'gaxala' mashic nca'laxatec na Israel llaalqaipi.

¹⁴ Ca' so Samuel 'naaco' quesá'ogue so qomyipi: —Qolaq, qolaxapegue' yi Gilgal, qaiyi sa'maqtaxañi ca lo'ueenataxanaxac da Saúl quiyim nashi.

¹⁵ Ca sá'ogue so qomyipi quepegue' yi Gilgal. Ca co'na' qaỹovita yi'maxare, ca' ỹauanchigui nqohin ñi qara'gaxala', ca' qoỹanshiguim quiyim nashi so Saúl. Ime, ca' qoỹaanot ñi qara'gaxala' aso nachitaxanataxanqate, qaiyi 'ue ca neuagaxa. Ca' so Saúl chaqai sá'ogue so liỹa llaalqaipi so Israel ỹaatqajam 'xoic da netoonaxac. (12.1—14.52 So Samuel poyicnataxan, ca' ỹaanem quiyim nashi so Saúl. Qanalauate'e' so filisteoipi. Da lco'ỹaxaric so Jonatán. Qanauec so filisteoipi. Da 'neeta na' nashi so Saúl chaqai so llaalqaipi.)