1 Reyes 21 - La'qaatqa ñi qota'olec Qota'olec & Qota'olec Novita Na Qomyipi

So Acab ỹahotaque icona so 'uva loma' lanec so Nabot

¹ Ca co'na' shi'gom, ca 'uo' so ỹale, le'ec yi Jezreel, leenaxat Nabot. Ca 'uo' so lanaxanqa' 'uva loma' quiyijo na'a', leseeque'ta so lauo' lodegaxat so Acab, só'maq nashi quiyi Samaria.

² Ca 'uo' so na'xa'a, ca' so Acab 'naaco' queso Nabot: —Nañaañi' quet yi qadanaxanqachi' 'uva loma', qaiyi sa'ue sanñi cana peue na'ic, ma' sqo ỹoxe'oga quena iuo' lodegaxat. Saañiguit yi ỹanaxanqa' 'uva loma' paguec loyac, loqo'm vi'saque seshiuetenta qaican ỹapaguec.

³ Qam so Nabot 'naaco' queso Acab: —Dajo peeta'a se ỹa'maxaren ñi qota'olec quiyim saanem qami', ma' na'maxare chi ño'ueenaxaua na' ileue' yaua ita'al.

⁴ Ca' so Acab queuo queca la'a' rachicotam chaqai se ỹa'maxagui na lauel sauaxat dá'maq 'naac so Nabot, ma' so'maxare 'naac quiyim sqai ỹaan só'maq qano'ueenaqta'guit quesaua leta'al. Ca co'na' ỹoviro, ca' nenanñi, reloqoto'ot ca 'imec lahi, chaqai se que'e.

⁵ Ca co'na'le, ca' aso loua Jezabel quepegue', ca inat, 'naaco': —¿Chi'neco' ma' chicoite' chaqai se qui'i'?

⁶ Ca' so Acab 'naaco': —Setaqata'pegue' so Nabot só'maq na'ñi yi Jezreel. Ca' sahotaque imeenot aỹim yi lanaxanqa' 'uva loma', loqo'm quiyim saañiguit ca liỹa nanaxanqa'. Qam ñi'maxare se nañaañim.

⁷ Qam aso loua Jezabel 'naaco' queso'maxare: —¡Qam qami' ná'maq qami' nashi quena Israel! Ca vichiguiño' ne'laxachirishiguim, qui'i', qaica ca huapigui qavilli'. Ỹim seshit ma'le quiyim ta'iraxauot yi lanaxanqa' so Nabot.

⁸ Ime, ca chaqa'ma' ỹo'ueete' saua lerecse lerel hueetalgoto nqai'en da leenaxat so Acab. Ime, ca' ỹotogoxoñi aso letanaxanqate. Ime, ca ilata so qo'xoiquipi nashillipi na'ñi yi na'a' na'ñi so Nabot.

⁹ Ca' da hueesalec saua lerel 'neetasa': O'viichiñi quiyim nqopaaqachit na qomyipi, ca' nqa'xanñi nqai'ñii ca Nabot, ca' chaxañiugui na qomyipi.

¹⁰ Ime, ca nqa'xañiñi nqai'ñii' caua dos ỹale' reloqoso'ot nqai'ñii. Ca' caua'maxare chaqai 'nerac nqai'ñii quiyim so Nabot noquiaatapega na'le ñi qota'olec chaqai ñi nashi Acab. Ime, ca viguiuec, ca lauachii, naxaita, dohita'a na qa'.

¹¹ Ca' so ỹalliripi na'ñi yi na'a' naugui so Nabot chaqai so qo'xoiquipi chaqai so nashillipi, ỹo'uet dá'maq 'naaco' aso Jezabel, dá'maq hueesalec saua ilate' lelaata ilatalo so qomyipi.

¹² Ca' ỹo'viichiñi quiyim nqopaaqachit so qomyipi, ca' qanqa'xanaxanñi so Nabot, reloqotougui nqohin so qomyipi.

¹³ Ime, ca ỹovirero nqohine' saua dos ỹale' quiyim chi ỹo'ueete' ca ỹa'xate' se no'uen queso Nabot, 'qaatac nqohin sá'ogue so qomyipi, quiyim so Nabot noquiaatapega na'le ñi qota'olec chaqai so nashi Acab. Ime, ca' qaỹauegue'uegue da lahi yi na'a', ca qainaqatac quena qa' chi qaỹalauatetañi.

¹⁴ Ime, ca' qaỹa'ue la'xaỹaxac aso Jezabel quiyim so Nabot qaỹalauat, qainaqata, qaỹodoota'a na qa'.

¹⁵ Ca co'na' ỹa'den dajo aso Jezabel, ca ra'qaataxanem so Acab, 'naaco': —Mo'e', ñi'ralec nagui yi 'uva loma' lanec so Nabot só'maq na'ñi yi Jezreel, yí'maq se imeenot qami' na'le. Ma' so Nabot tot qaica, shi'gue ileu.

¹⁶ Ca' so Acab co'na' 'ue da la'xaỹaxac quiyim shi'gue tot qaica so Nabot, ca' so Acab eec, ca icona yi lanaxanqa' na'le so Nabot.

¹⁷ Ca' ñi qota'olec lotqai 'naaco' queso Elías só'maq na'ñi yi Tisbe:

¹⁸ —Mese naỹaloxoñi' quiyim quirepegue' ñi Acab ñí'maq nashi quena Israel na'ñi yi Samaria, ma' da'maxare hueetaugui yi 'uva loma' yí'maq lanaxanqa' na'le so Nabot, ỹahotaque quiyim icona, ca' lalamaxaret la'a'.

¹⁹ Ca ma' vichita, ca 'ñiraco': Da la'qaatec ñi qara'gaxala' 'neetasa': Ma' qami' lauachi' yi Nabot, ca' coñita na lalamaxaret, ca' chaqaina ná'maq hua'ñi na' qancolliisecshiguim saua leuo' quena pioxoripi, ca' chaqaina hua'ñi ma' qancolli'ishiguim caua reuochi'.

²⁰ Ca' so Acab 'naaco' queso Elías: —¿Ca' nachiriua', qami' ñpa'guenaxaua? —Ajá'a, sanata qami' —'naaco' so Elías—. Ma' qainaata na se no'uen 'viichi'sac quiñi qara'gaxala'.

²¹ Ca' ñi'maxare 'naac caqami': Ỹim taalec nqaishin qami' ma'le ca se no'uen. Ca' sa'ue ma'le ca lqodoc na qachaalaxai'ipi, ñalauajñi ma'le ná'ogue na qachaalaxai'ipi neeta'ñi na Israel.

²² Chaqai quena qachaalaxai'ipi shi'ntegue ma'le da shine'tegue na'le so llaalqaipi so Jeroboam só'maq llaalec so Nabat, chaqai queso Baasa, llaalec so Ahías, sauaxat ma' quiisapegueu'a da ỹonogoxonaxac, ma' 'viichi' quiyim 'ue ca lasauaxaset na llaalqaipi so Israel.

²³ Ca' cañi Jezabel, ca' da la'qaatec ñi qara'gaxala' 'neetasa': Na pioxoripi ỹa'ic na la'at ma'le añi Jezabel quiyi no'ueenaxa quiyi Jezreel.

²⁴ Qam quecá'maq ileuaugui na na'a' quena qauochi' laseripi, ca qaỹa'ic ma'le quena pioxoripi, chaqai cá'maq ileu quena no'ueenaxa, ca' qaỹa'ic quena qaqare.

²⁵ (Qaica ca 'nejem malam so Acab quiyim chi nachicsec caso loua Jezabel, ca so'maxare ỹaatqajam 'xoic la'aaxa na ỹo'ueetetac quiñi qara'gaxala'.

²⁶ Chaqai so'maxare ỹaatqajam chalego la'aaxa ná'maq ỹo'uet, ma' vire'ta nqouagaxainot na nashiilqaipi nqolaquipi, 'nejem dá'maq 'neetari' na'le sá'ogue so amorreoipi só'maq ỹo'daauec na'le ñi qara'gaxala', ca se ỹa'maxaren quiyim lapoota'guit na llaalqaipi so Israel.)

²⁷ Ca' so Acab co'na' 'qaachigui dá'ogue dajo, ca nasectaqta'ahi saua loho, ca' ỹañiñi saua noho nachicoxoqui' chaqai nqopaaqachit. Chaqai quena' laq, ca' queeta'anto saua loho ỹansañi, chaqai rachicotam.

²⁸ Ca' ñi qara'gaxala' 'naaco' queso Elías:

²⁹ —Ca' ¿huañichirigui ñi Acab quiyim neneequesene'tot aỹim? Qam nagui, ma' neneequesene'tot aỹim, ca' se sa'ue ca nouaxanaxaset na llaalqaipi nagui ma' ñaq nca'leetauec ñi'maxare. Qam dajo so'uet ma'le ma' ñaq nca'leetauec ca llaalec.