1 Reyes 10 - La'qaatqa ñi qota'olec Qota'olec & Qota'olec Novita Na Qomyipi

Aso lashi ná'maq na'ñi yi Sabá quepegue' so Salomón

^1-2 Ca' aso lashi ná'maq na'ñi yi Sabá co'na' 'xaiguelec da lichoxoric ỹovirau'a so Salomón, qaiyi qaimaqachin ñi qara'gaxala', ca' taigue da Jerusalén, ma' ỹahotaque i'guen, ca' ỹa'vii naua lenataxanaxaco 'xoic da lqalaigue'. Ca ỹaatqajam 'xoic da lemaqachic na' novi'. Chaqai ana lalo nauaanaxanaxa late'e 'xoic nqai'en na li'ỹaac quena coraxat lo'daxaraic lahita, chaqai 'xoic na li'ỹaac 'oro chaqai na qa' qashilgaxaraic. Ca co'na' ỹovira'a so Salomón, ca chaqa'ma' inat quená'ogue ná'maq hueetapigui lauel.

³ Ca' so Salomón ichoxot da leloxoỹaxac ná'ogue ná'maq nenataxaquipi, ca' qaica quet ca nenataxac quiyim se ỹa'den quet ca leloxoỹaxac.

⁴ Ca co'na' aso nashi quiyi Sabá ỹa'den da la'deenec so Salomón chaqai só'maq 'imec no'xonshiguim,

⁵ chaqai ná'maq loyac na loq, chaqai naua la'aate' so lotauaripi, chaqai da na'maqataxac chaqai da no'ueetaxac na lelaatqaipi, chaqai ná'maq ne'taxaqui lo'ollipi, chaqai na lachitaxanataxanqateripi ỹaantapego caso no'ueenaxanaxaqui, ca' aso'maxare ỹaatqajam 'xoic da le'laxa.

⁶ Ca 'naaco' queso nashi: —Dá'maq ỹa'xaỹaxac na'le queda ỹa'a' quená'ogue ná'maq shi'gue 'viichi' chaqai quedá'maq ra'yiinqui', ỹaatqajam lliqueta;

⁷ qam qainaquita ỹaatqajam seuelec nagui, ma' ñovi', ca' seuanchigui quenaua ñqote'. Qam mesqai ỹaatqajam ná'ogue qaỹa'xat, vire'ta ñaq lavinñi quet ca qaỹa'xat quená'ogue ná'maq rovinqui', ma' paguec na'maxare quená'maq ỹa'xaỹaxac quen.

⁸ Ca' ¡ỹaatqajam ỹa'maqachiguiñi na rouachi'ipi chaqai netoontac ná'maq relaataxai'ipi, ma' na'maxare naua'que naua na'xata' hueetau'e na rahi'i' na'xaỹaxantapegalo naua la'maqa' naua ra'qaataxahi'!

⁹ ¡Ỹaatqajam qaimaqachin ñi qara'gaxala' qota'olec ñí'maq vi'relec ñí'maq nqo'to' qami', ca' ỹo'uet quiyim qami' lashi na llaalqaipi so Israel! ¡Quedá'maq se neme lqo'iichi ñi qara'gaxala' quena llaalqaipi so Israel, ca ñi'maxare ỹo'uet quiyim qami' nashi, ca loqoira'a, qaiyi ỹa'maxañi chaqai no'uen ca llicyaxac!

¹⁰ Ime, ca' aso'maxare ỹaanem so nashi so tres mil novecientos sesenta kilos quena 'oro, chaqai ỹaatqajam 'xoic na coraxat lo'daxaraic lahita chaqai na qa' qashilgaxaraic. Ỹaatqajam se ỹauanapega qanoda'a yi Israel yi ỹorete' so coraxat, 'nejem só'maq nodo aso nashi quiyi Sabá, ỹaanem so nashi Salomón.

¹¹ Chaqai qai'neeta aná'maq qom lahi' huaxaỹaqse lemeenec lahi' so Hiram, 'uo' na nodo 'oro, ỹachigoxota'a yi Ofir, chaqai qai'neeta qaiyiita ỹachigoxota'ñi ana qo'paq lo'daxaraic lahita leenaxat sándalo chaqai na qa' qashilgaxaraic.

¹² Ca' na qo'paq leenaxat sándalo, ca' so nashi ỹachigoxotaugui quiyim ỹo'uet so lahiseripi añi no'ueenaxanaxaqui quiyim qanqouagaxainot ñi qara'gaxala', chaqai ñí'maq chi lauo' lodegaxat, chaqai ana ỹoreta'oguit niviiguellipi 'ue na lequet quiyim liviigue nqai'en na niviigaxanyipi. Chaqai se ỹauanapega quiyim paguec quet 'xoic ana qo'paq leenaxat sándalo, vire'ta nagui.

¹³ Ca' so nashi Salomón ỹaanem cá'ogue cá'maq ỹahotaque aso nashi quiyi Sabá, ca ỹoqa'oga só'maq chi lame so'maxare. Ime, ca' aso'maxare pil queca la'a', liỹaatac só'maq ỹalliripi lotauaripi.

Da lichoxoric chaqai da lesallaxa so Salomón

¹⁴ Ca ná'maq 'oro iconta'piguit so Salomón quena' ỹovirec yi ñaaxa, ỹovi' veintidos mil kilos.

¹⁵ Qam se qanaloqojna'oga añí'maq qaishiuetentac quená'maq liỹa nemeenaxaquipi chaqai ná'ogue na nashillipi quiyi Arabia chaqai ná'maq reloqota'alo naua liỹa' 'lauari quiyi Israel.

¹⁶ Ca' so nashi Salomón relaataxanlec quiyim qaỹo'uet aso doscientos nquepaqataxanqate lauataxaqui nodaachiguiñi late'ogue' qaỹa'meenalec quena 'oro. Ca' cañi 'óna ỹovi' seis kilos na 'oro taalec.

¹⁷ Chaqai relaataxanlec qai'neeta so trescientos nquepaqataxanqate lauataxaqui paguec cocho'lli', ca' caso'maxare, ca napaquejlec 'un kilo quena 'oro qaỹa'meenlec. Ime, ca illaugui ñi lauo' lodegaxat ỹamata'gue leenaxat Líbano no'oochi.

¹⁸ Chaqai relaataxanlec qai'neeta aso nashi nqa'xanaxaqui late'ogue', ỹachigoxotaugui na loue ana ladocoloue. Ca' relaataxanlec quiyim qaỹa'meenlec quena 'oro.

¹⁹ Aso qa'xanaxaqui seis saua nco'ỹaxalate' tairashi'ma, chaqai so neuaxaỹoxosoxola' lepajlec, chaqai saua ỹa'irauec 'ec laua' quenaua lahil, chaqai naua naloochi'ñalo naua 'ec laua', ca' neesa'ñi saua sauaxaic leta'al nachaatesañi.

²⁰ Ca' ỹovi' doce so sauaxaic leta'allipi nachaatetañi, neetau'alo na lahil saua seis nco'ỹaxalate'. Chaqai ¡se ỹauanapega quiyim qaỹo'uet quet ca nashi nqa'xanqa' 'nejem so'maxare!

²¹ Chaqai qai'neeta quiñi lauo' lodegaxat so nashi ñí'maq ỹamata'gue Líbano no'oochi, sá'ogue so ne'taxaquiripi chaqai sá'ogue so lqui'ỹaxaquiripi nodaachiguiñi na 'oro. Ca' na lecat leenaxat plata, qam se qaỹouen, ma' na' ỹovita quiyim nashi so Salomón, ca' najo lecat qaca aca laseuete.

²² Ma' ná'maq qom lahi' huaxaỹaqse ỹachigoxota'gue da Tarsis so nashi, 'oonoqui' novi' quiyaua tres ñaxari, liỹaata ana qom lahi' huaxaỹaqse looỹac so Hiram, nodoota na 'oro, plata, loue ana ladocoloue, qoshiiquiaxaua chaqai na paurial.

²³ Ca' so Salomón ỹaatqajam napacalec na liỹa nashillipi quena 'laua queda lesallaxa chaqai queda la'deenec so'maxare.

²⁴ Ca ná'ogue ỹahotaque iuana chaqai quiyim na'xaỹaxana da la'deenec so'maxare dá'maq qoỹaanem quiñi qota'olec.

²⁵ Chaqai quena' ỹovirec yi ñaaxa, ca ná'ogue nodouo na lame queso'maxare: 'ue na nodouo na lecat leenaxat plata chaqai na 'oro, napoxoqui, no'goxonaxat chaqai na lo'daxaraic lahita, shipiguiripi chaqai na que'lahipi.

So Salomón rishiujnaxanaque nahoglenaipi chaqai shipiguiripi

²⁶ Ca' so Salomón lapoonta' so nahoglenaipi chaqai so nalliripi. Ca' ỹovi' mil cuatrocientos aso nahoglena chaqai doce mil so nalliripi neetashiguim quena shipgaq. Ca' so'maxare ỹo'uet na ilari'ñi aso nahoglenaipi lauataxaquiripi chaqai ná'maq neloxoỹaripi queso nashi quiyi Jerusalén.

²⁷ Ca' so nashi ỹo'uet quiyim 'xoic na lecat plata, 'ec na qa' quiyi Jerusalén, chaqai quiyim 'xoic na qo'paq cedro, 'ec ana higo neuec quena no'ueenaxa.

²⁸ Ca' so shipiguiripi qaỹauaaque laloipi so Salomón qaỹachigoxota'gue da Muzri chaqai da Cilicia, ma' so lemeenaxanqajanqaipi so nashi, chaqaida ỹachigoxota'gue quena' rishiujnaxana.

²⁹ Ca' cañi 'óna nahoglena, quena' qaimen qaỹachigoxota'gue da Egipto, añi laseuete ỹovi' seiscientas ana chiróla chicqaugui na plata, chaqai quiñi 'oonoqui' shipgaq ỹovi' ciento cincuenta añi laseuete. Ca ná'ogue na lashi na hititaipi chaqai na Siria laseripi nemeenta'pegue' na lemeenaxanqajanqaipi so Salomón.