1 Pedro 5 - La'qaatqa ñi qota'olec Qota'olec & Qota'olec Novita Na Qomyipi

Da naqataxac quená'maq mashic icoñiguit da na'qaatec

¹ Nagui sa'ue da ỹaqataxac quená'maq la'gaxala' ná'maq mashic icoñiguit da na'qaatec, ma' ỹim qai'neeta ỹim na'gaxala' shintam aqamiri, chaqai sauanchigui dá'ogue dá'maq le'xoric so Cristo, chaqai qai'neeta shinta ma'le saua'maxare ñouanau'a ca lauaq qaỹachaxan ma'le.

² Ỹaatqajam quelolliỹa 'maxachii'tegue ná'maq mashic icoñiguit da na'qaatec ná'maq mashic qaỹauaaque reloxoiqachicshii quiñi qota'a, 'ñiitari' ca neloxoỹaq cana qagreta. Ỹaatqajam rasapchii'ta, 'viichitac dá'maq ỹahotaque ñi qota'a. Mese repaguitaque quiyim qanetenteguelgoto qamiri qarelaritac chaqai se naquichite'e aca plata. Ta'ta'a quiyim rasapchii'ta ca ro'ueenataxanaxaguii.

³ Mesqai 'ñiita'gue quiyim 'ec ralamaxarichii acá'maq loxoita'a. Ta'ta'a quiyim viitaque qaỹadenaxachichigui dá'maq 'ñiitari' quecá'maq loxoita'a,

⁴ qaiyi ma' ỹovita quiyim novi' só'maq reloqota'a ná'ogue na la'gaxalateripi ná'maq mashic icoñiguit da na'qaatec, ca' coñiguit cá'maq nishivichii 'ue lauaq, sqai 'nejem aca lishiuetenaxanqate ca chaqai qom, ma' ishit ỹaso 'nejem aca qo'paq laue.

⁵ Ca' chaqai 'neete'm, qamiri ne'naqa, ỹaatqajam na'xaỹaxañii'ta meca 'naac na qo'xoiquipi. Chaqai quená'ogue na qom qaica ca napacqajan queca liỹa. Ta'ta'a quiyim neneequesentecta', ma' naua naneresañi na'qaatqa 'neracsa': Ñi qota'a quepaxat ca nemaqajnaxai, qam nqouaguegue ỹotauan ca neneequesenaxai.

⁶ Ca niñiiquishiñii, 'guiñiỹoto naua laua' ñi qota'olec maq sqaica lqalanec, qaiyi ñi'maxare ỹalamaxachiñi qamiri ma' ỹovita ca laloqo'.

⁷ Chaqai ná'ogue ná'maq 'yiiñitapega 'ỹaañiỹot ñi qota'a, ma' ñi'maxare ỹaatqajam 'ue da 'neeta caqamiri.

⁸ Chaqai ỹaatqajam na'deenaxanqachiñii chaqai nelohitec, ma' so npa'guenaxauahi na'ỹaapec ronoqota'pegue', 'neetari' meca sauaxaic leta'a idaantaque quiyim 'ue ca loxonec.

⁹ Qam quepaxachii, ỹaatqajam na'ñaxachilec da rpi'ỹaxaguii, ma' 'yiiñita quiyim na rqaỹairipi quenaua'que naua lahil na 'laua qaidaata dajo ne'xoric da hueetaugui.

¹⁰ Qam ma' ime quiyim cocho'qui' viriỹa'guit dajo ne'xoric, ca' ñi qota'a nachiñiñi nqai'ne' qamiri, ra'ñichiriñi, quesaxanaxaqa, qaica ỹayogote' qamiri. Chaqaiñi ñi qota'a ñí'maq ỹaanema qomi' dá'ogue da lqouagaxa chaqai roỹaxanalo qomi' quiyim ñouanqau'a da lauaq sqaica lqodoc quiyim ña'daqatau'a so Jesucristo.

¹¹ Ca' chaqai ñi'maxare ñí'maq lalamaxaret da lauaq chaqai da lquesaxanaxa se neme. Ajá'a, ca' chaqaida 'neeta dajo.

Dá'maq pa'aatec niquinaxanaxac

¹² Najo ilaata ỹiriñi nqaishin ñi Silvano ñí'maq ỹaatqajam qamaxaraic ỹaqaỹa. Sqo vito'olqai' naua ỹa'qaatqa, qam saqatalo qamiri chaqai se'taxatetegueñi da nqouagaxahi mashic coñiguit, ca' queda'maxare, ca' ỹaatqajam 'chiñi nqai'en da le'xorenataxanaxa ñi qota'a. Ca' ỹaatqajam quiitalec ma'le dajo.

¹³ Na mashic icoñiguit da na'qaatec neeta'ñi na Babilonia ná'maq qai'neeta mashic lca'acseripi ñi qota'a, ilatalo qamiri da liquinaxanaxac, chaqai qai'neeta ñi Marcos ñí'maq shinta'gue meca ỹaalec.

¹⁴ Ca' quiyim niquiñiỹata', ca nqo'goxoỹata' chaqai ỹaatqajam ne'xoriñiỹata'. Chaqai quiyim qamiá'ogue 'ue da ra'maxahi mashic qamiri lalamaxarete' so Jesucristo. Ajá'a, chaqaida 'neeta dajo.