1 Juan 4 - La'qaatqa ñi qota'olec Qota'olec & Qota'olec Novita Na Qomyipi

So ne'Espíritu ñi qota'a chaqai naua no'ueenataxaco so npa'guenaxaua so Cristo

¹ Qamiri ỹaqaỹarolqa, 'neeto' viilec ná'ogue ná'maq 'naac mashic qaretaqaugui quiñi qota'a, ta'ta'a quiyim 'guiñii, no'm chaqaiño' ñí'maq ne'Espíritu ñi qota'a ñí'maq neetagui, loqo'm 'e'. Ma' na 'laua mashic sham no'xalec quena 'maatqaiquipi quená'maq 'naac mashic qaretaqaugui quiñi qota'a.

² Ca' dajo dá'maq 'neeta ma'le quiyim 'yiiñii cá'maq neetagui ñi ne'Espíritu ñi qota'a: ná'ogue ná'maq llic nqai'en quiyim so Jesucristo ỹaatqajam qom, ca' chaqaina ná'maq neetagui so ne'Espíritu ñi qota'a.

³ Qam cá'maq sqai 'neeta dajo nqai'en so Jesús, ca' sqai hueeto'ot so Espíritu chicqo'ot ñi qota'a. Ta'ta'a quiyim hueeto'oto naua no'ueenataxaco so npa'guenaxaua so Cristo. Qamiri mashic 'yiiñii naate' cauajo 'ueenataxaco. Hua', qam nagui mashic hueesalec ana 'laua.

⁴ Qamiri ỹaalqolqa, qamiri lalamaxarete' ñi qota'a, chaqai mashic qadoxoñiguii na 'maatqaiquipi. Ma' ñi qota'a ñí'maq neetaguilo qamiri paguec lquesaxanaxa quesó'maq na'ỹaapec ỹoiquentac na qom hueetalec ana 'laua.

⁵ Najo 'maatqaiquipi lalamaxaret na 'laua, ca vichiguiño' ỹa'xateta'pe nauá'maq huerelec ana 'laua. Ca' qana'xaỹaxana quena qomyipi ỹoiquenta'pe naua se no'viiñi huerelec na 'laua.

⁶ Qam qomi', qomi' lalamaxarete' ñi qota'a. Ca cá'maq iuana ñi'maxare, ca' na'xaỹaxanalo qomi'. Qam cá'maq se lalamaxaret ñi qota'a, ca' se na'xaỹaxanoxoua'. Ca' queda, ca' seshitaq sa'deenaq cá'maq hueetagui cá'maq llic no'uen 'ueenataxac chaqai cá'maq hueetagui ca 'ueenataxac 'maatqaic.

Ñi qota'a 'xorenataxanaxai

⁷ Qamiri ỹaqaỹa', no'uen quiyim ñi'xoresenaqta', ma' da ne'xorenataxanaxa chicqo'ot ñi qota'a. Ná'ogue ná'maq 'ue ca le'xorenataxanaxa ỹaatqajam llaalec ñi qota'a, chaqai iuana ñi'maxare.

⁸ Cá'maq sqaica ca le'xorenataxanaxa, ca' se iuana ñi qota'a, ma' ñi'maxare 'xorenataxanaxai.

⁹ Ñi qota'a ichoxot da le'xorenataxanaxa coqomi' na' nela' so 'oonoqui' llaalec quena 'laua, qaiyi 'ue ca qarca'laxa chicqochigui nqai'en so'maxare.

¹⁰ Dá'maq 'neeta da ne'xorenataxanaxa 'neetasa': quiyim mesqai qomi' ná'maq se'xorenaq ñi qota'a, ta'ta'a quiyim ñi'maxare ñí'maq qare'xoren. Ca' nela' so llaalec, ca' chaqaiso só'maq chicqochigui nqai'en quiyim qaỹapalaxate' naua qarasauaxasete'.

¹¹ Qamiri ỹaqaỹa', no'm chaqaida 'ne'tegue ñi qota'a quiyim qare'xoren, ca' qomi' qai'neeta ñi'xoresenaqta'.

¹² Ñi qota'a qaica ma' 'ue quet ca iuana. Qam no'm ñi'xoresenaqta', ca' ñi'maxare ỹalequetauguilo qomi', ca' da le'xorenataxanaxa ỹaatqajam nachinchiguiñi coqomi'.

¹³ Dá'maq 'neeta quiyim sa'deenaq quiyim ña'daqatau'a ñi qota'a chaqai quiyim qomi' neetauguilo ñi'maxare 'neetasa': Quiyim ñi'maxare ỹaanema qomi' so ne'Espíritu Santo.

¹⁴ Chaqai qomi' ỹaatqajam seuanqachigui, ca' sa'xatqatac, quiyim ñi qota'olec nela' so llaalec, ma' ỹahotaque nca'laxatec na qomyipi hueetalec ana 'laua.

¹⁵ Canchaqaica quiyim ỹaatqajam llic nqai'en quiyim so Jesús chaqaiso so llaalec ñi qota'a, ca' da nachaalataxac hueeto'ot ñi qota'a, chaqai ñi qota'a hueetagui da nachaalataxac ca'maxare.

¹⁶ Ca' quiyi, ca ỹovita quiyim sa'deenaq chaqai seuaqlec quiyim ñi qota'a qare'xoren. Ma' ñi qota'a 'xorenataxanaxai. Ca cá'maq hueetagui da nachaalataxac ca ne'xorenataxanaxa, ca' da nachaalataxac hueeto'ot ñi qota'a chaqai ñi qota'a hueeto'ot ca'maxare.

¹⁷ Ca' sovitaxa quiyim nachinchiguiñi da qare'xorenataxanaxa, qaiyi ma' ỹovita ca na'xa'a quiyim qaimit ná'ogue na qomyipi queca lasauaxaset, ca' qomi' qaica ca huapigui qouel. Ma' qomi' nagui ñaqai seuqatalec ana 'laua, qam da qanachaalataxac 'nejem da nachaalataxac so Jesucristo.

¹⁸ Cá'maq hueeta'ñi ca ne'xorenataxanaxa, ca' qaica ca nqolonaxa. Ta'ta'a quiyim dá'maq ỹaatqajam ne'xorenataxanaxa ỹo'da'oguiyi ca nqolonaxa. Ma' dá'maq nqolonaxa chaqa'ma' tai'a da nouaxanaxaset. Ca' vichiguiño' cá'maq ñaqa 'ue ca lqolonaxa, ca' saqa' nachinñi ca le'xorenataxanaxa.

¹⁹ Qomi' se'xorenaq ñi qota'a, ma' ñi'maxare 'au qare'xoren.

²⁰ Qam no'm 'ue ca 'naac: “Ỹim se'xoren ñi qota'a”, qam ñaq noquiaatapega ca lqaỹa, ca' ca'maxare 'maatqaic. Ma' no'm se i'xoren ca lqaỹa quiyim ra'iito'ot, ca ¿huose'quet i'xoren ñi qota'a ma' se iuana?

²¹ Ca ñi'maxare ỹaanema qomi' da lelaataxanaxac: Quiyim cá'maq i'xoren ñi qota'a, ca' i'xoren qai'neeta ca lqaỹa.