1 Juan 2 - La'qaatqa ñi qota'olec Qota'olec & Qota'olec Novita Na Qomyipi

So Cristo chaqaiso só'maq retaqalgoto qomi'

¹ Qamiri ỹaalqolqa, ỹim shiriñi dajo, ca' selatalo qamiri, qaiyi qaica ca ỹo'uet ca lasauaxaset. Chaqai no'm 'ue ca 'ue ca lasauaxaset, qam 'ue só'maq ishit retaqalgoto qomi' quiñi qota'olec. So'maxare chaqaiso so Jesucristo só'maq ishit ỹo'uet ca ỹa'maqachiguiñi.

² So Jesucristo chaqaiso só'maq chicqochigui quiyim qaỹapalaxate' naua qarasauaxasete', chaqai mesqoqometa, ma' qai'neeta quená'ogue na qomyipi hueetalec na 'laua.

³ No'm ña'xaỹaxanqa'ta na lelaataxanaxaquipi ñi qota'a, ca' sa'deenaq quiyim seuanaxa ñi'maxare.

⁴ Qam no'm 'ue ca 'naac: “Ỹim seuana ñi qota'a”, qam se na'xaỹaxanalo naua lelaataxanaxaco, ca' ca'maxare 'maatqaic chaqai da lliqueta sqaica queca'maxare.

⁵ Qam cá'maq ỹo'uet da lelaataxanaxac ñi'maxare, ca' ỹovira'a quiyim ỹaatqajam nqo'ta ñi qota'a. Ca' chaqaida dá'maq 'neeta, ca' sa'deenaq quiyim ña'daqata'guit ñi'maxare.

⁶ Cá'maq 'naac na'deeta'guit ñi qota'a, ca' da nachaalataxac 'nejem dá'maq 'neetari' na'le so Jesucristo.

Dá'maq dalaxaic nelaataxanaxac

⁷ Qamiri ỹaqaỹa', dá'maq seretegueñi quiyim selatalo qamiri, mesqai dalaxaic nelaataxanaxac. Chaqaidaata dá'maq nelaataxanaxac coñiguit na' ñaqai chita'gue coñiguit da na'qaatec. Dajo ñauapec nelaataxanaxac chaqaida dá'maq na'qaatec 'xahichigui na'le.

⁸ Qam qaiyiita dá'maq shiriñi 'ec cá'maq dalaxaic nelaataxanaxac, ma' ỹaatqajam da lliqueta re'oq na'le queso Cristo chaqai qai'neeta caqamiri. Ma' so napalaxa sham ỹoxe'uegue, chaqai mashic re'oq na lauaq ñí'maq ỹaatqajam re'xolec nqai'en ná'ogue.

⁹ No'm 'ue ca 'naac hueeta'ñi ca qaica ca lapalqa', qam ñaq noquiaatapega ca lqaỹa, ca'maxare ñaqai hueetaugui na napalaxa.

¹⁰ Cá'maq i'xoren ca lqaỹa, ca re'qojlec ca hueeta'ñi, ca' qaica quet cá'maq ishit ỹo'uet ca lasauaxaset.

¹¹ Qam cá'maq ñaq noquiaatapega ca lqaỹa, hueetaugui chaqai ñaqai queetaugui na napalaxa, chaqai se ỹa'den cá'maq taigue, ma' na napalaxa se neuanñi nqai'en ca'maxare.

¹² Qamiri ỹaalqolqa, selatalo qamiri ana ỹerecse, ma' ñi qota'a mashic ỹapalaxate' caua rasauaxashichiri, quedá'maq ỹo'uet so Jesucristo.

¹³ Chaqai qamiri qo'xoiquipi, shiriñi dajo caqamiri, ma' viriỹau'a quiyim huañiỹa só'maq shi'co' 'ue na' saqa'leca na 'laua. Chaqai qamiri ne'naqaipi, shiriñi dajo caqamiri, ma' mashic qadoxoñiguii so na'ỹaapec. Shiriñi dajo caqamiri, ỹaalqolqa, ma' mashic viriỹau'a quiyim huañiỹa ñi qota'olec.

¹⁴ Shiriñi dajo caqamiri qo'xoiqa, ma' viriỹau'a quiyim huañiỹa só'maq shi'co' 'ue na' saqa'leca na 'laua. Chaqai qai'neeta shiriñi dajo caqamiri ne'naqa, ma' qamiri quesaxanaxaqa, chaqai mashic coñiguit da la'qaatec ñi qota'a cañi re'taxanatahi, chaqai mashic qadoxoñiguii so na'ỹaapec.

¹⁵ 'Neeto' rqo'chiỹa na 'laua chaqai ná'maq 'ueenataxaquipi se no'uen hueetalec na'maxare. No'm 'ue cá'maq nqo'ta na 'laua, ca' se nqo'ta ñí'maq qota'olec.

¹⁶ Ma' qaica quet cá'maq hueetalec ana 'laua quená'maq nanatqaipi se no'uen chicqo'ot quet ñi qota'olec, ta'ta'a quiyim chaqaina ná'maq 'laua hueetalec. Na se no'uen lamaanaxanqachic na qaroshicmaxa, ná'maq qarishoxo quiyim hueeto'oto qomi' ná'maq qarqo'ta quenaua qanqote', chaqai da maqajnaxac quenanchaqaina queda qanachaalataxac, ná'ogue najo ná'maq seuanaxa qaỹachaxantac, qam chaqai hueetalec najo 'laua.

¹⁷ Qam na 'laua tai'a quiyim imeho, chaqai ná'ogue ná'maq namaanaxanqachic se no'uen hueetalec ana'maxare. Qam cá'maq ỹo'uet dá'maq ỹahotaque ñi qota'a, ca se neme queeta da nachaalataxac.

Dá'maq lliqueta chaqai dá'maq na'maachic

¹⁸ Qamiri ỹaalqolqa, nagui mashic ỹovire'ogalo naua pa'aaterec na'xata'. Ma' qamiri shi'gue 'xahita'guit quiyim naata cá'maq npa'guene'e' ma'le so Cristo. Qam nagui mashic re'oq quiyim 'xoic ná'maq npa'guente'e' so'maxare, ca vichiguiño' sa'deenaq quiyim mashic seuqatauguilo naua pa'aaterec na'xata'.

¹⁹ Saua'maxare inoxondec chicqotouguilo qomi', qam llic quiyim mesqai ỹaatqajam qariỹa'. Ma' quetqai ỹaatqajam qariỹa', ca' se noỹooterec quet coqomi'. Qam dajo 'neeta, qaiyi ỹaatqajam re'qoota quiyim ná'ogue mesqai qariỹaripi.

²⁰ Qam so Cristo ỹaanema qamiri so Espíritu Santo, ca' qamiá'ogue mashic 'ue ná'maq ra'yiiñiguii.

²¹ Shiriñi dajo caqamiri, ma' mashic 'yiiñii dá'maq lliqueta, mesqai dá'maq quiyim sqa 'yiiñii. Chaqai 'yiiñita quiyim qaica ca na'maachic chicqau'a quet da lliqueta.

²² ¿Nega'ỹo' cá'maq 'maatqaic? Cajo chaqaica cá'maq 'naac quiyim so Jesús mesqaiso só'maq nashi nca'laxaqui. Ca' chaqaica cá'maq npa'guenaxaua so'maxare, ma' ỹoqolliguit ñi qota'olec chaqai qai'neeta só'maq llaalec.

²³ Ná'ogue ná'maq ỹoqolliguit so llaalec ñi qota'a, qai'neeta sqai hueeto'ot ñi'maxare. Qam ná'maq se ỹoqolliguit so llaalec ñi qota'a, na'maxare qai'neeta neeto'ot ñi'maxare.

²⁴ Vichiguiño' 'maxachii cañi re'taxanatahi dá'maq na'xaỹaxanaxaguii na' ñaqai chita'gue coñiguit da na'qaatec. Ca no'm dá'maq shi'gue na'xaỹaxanaxaguii hueetagui añi re'taxanatahi, ca' qamiri qai'neeta na'yiita'guit ñi qota'olec chaqai so llaalec.

²⁵ Ca' chaqaida dá'maq ỹachaxantac na'le so Jesucristo quiyim ỹaanema qomi' da nca'laxa sqaica lqodoc.

²⁶ Shiriñi dajo, ma' mashic 'ue ná'maq ỹayinta'pe qamiri.

²⁷ Qam mashic coñiguit so Espíritu Santo só'maq ỹaanema qamiri so Jesucristo. Ca' tot repaguitaque quiyim 'ue ca ỹapaxaguine' qamiri, ma' chaqaiso só'maq Espíritu só'maq ỹapaxaguinque qamiri ná'ogue nanchaqaina, qam naua lapaxaguinataxanaxaco ỹaatqajam lliquete', mese na'maachic. Ca' chaqaida 'neetari' da nachaalataxaguii na'deetau'a nqai'ñii so Cristo, ma' chaqaida dá'maq lapaxaguinataxanaxac so Espíritu.

²⁸ Ca' nagui qamiri ỹaalqolqa, quiitalec quiyim na'yiitau'a so Cristo, qaiyi 'ue ca qarpe'e ma' ỹovita quiyim nachaxan, chaqai qaica ca qarayiloxo ma' novi' so'maxare.

²⁹ Ma' mashic 'yiiñii quiyim so Jesucristo ỹo'uet ca ỹa'maqachiguiñi, chaqai qai'neeta 'yiiñii quiyim ná'ogue ná'maq ỹo'ueetetac na ỹa'maqachiguiñi ỹaatqajam llaalqaipi ñi qota'a.