Tingtoeng 95 - Matu Bible

Bawknah neh Thuituennah

¹ Halo uh lah. BOEIPA taengah tamhoe uh sih lamtah mamih kah daemnah lungpang ham yuhui uh sih.

² Amah mikhmuh ah uemonah neh kun uh sih lamtah laa neh amah taengah yuhui uh sih.

³ BOEIPA tah boeilen Pathen neh pathen boeih sokah boeilen Manghai la om.

⁴ Diklai kah a dungnah te a kut ah om tih tlang som rhoek khaw amah hut ni.

⁵ Tuitunli te amah hut tih amah ham ni a saii. Laikoeng khaw amah kut loh a hlinsai.

⁶ Halo uh lah bakop uh sih lamtah bawk uh lah sih. Mamih aka saii BOEIPA hmai ah yoethen uem uh sih.

⁷ Tihnin a ol te na ya uh atah amah te mamih kah Pathen la om coeng tih mamih khaw a rhamtlim kah pilnam neh a kut khuikah boiva la n'om uh.

⁸ Khosoek kah Meribah neh Massah tue vaengkah bangla na thinko te mangkhak sak boeh.

⁹ Teah te na pa rhoek loh kai n'noemcai uh tih ka bisai a hmuh uh lalah kai n'loepdak uh.

¹⁰ Thawnpuei taengah kum likip ka ko-oek tih, “Pilnam he a thinko kho a hmang tih ka longpuei ming uh pawh,” ka ti coeng.

¹¹ Te dongah kai kah duemnah khuila a kun uh pawt ham ka thintoek neh ka toemngam thil.