Tingtoeng 7 - Matu Bible

Tiktamnah Ham Thangthuinah

[Benjamin capa Kusah kah olka kongah BOEIPA taengah a hlai David kah Omdamlaa]

¹ Ka BOEIPA Pathen, namah dongah ka ying. Kai aka hloem rhoek boeih taeng lamkah kai n'khang lamtah kai n'huul dae.

² Sathueng bangla ka hinglu he pat a ngaeh vetih, aka huul om pawt ve.

³ Ka BOEIPA Pathen, hekah he ka saii mai tih, ka kut ah dumlai a om mai ni,

⁴ Kai aka thuung te a thae la ka thuung tih, lunglilungla la kai aka daengdaeh te ka rheth atah,

⁵ Ka hinglu he thunkha thunhling loh han hloem tih n'kae vaengah, ka hingnah he diklai ah taelh uh saeh lamtah, kai kah thangpomnah khaw, laipi khuila khueh saeh. Selah

⁶ Thoo lah BOEIPA kai taengah aka daengdaeh thinpom rhoek he, na thintoek neh pai thil lah. Haenghang lamtah, kai ham tiktamnah uen lah.

⁷ Te dongah namtu rhaengpuei loh, namah m'vael saeh lamtah, amih te hmuen sang lamkah ngol thil.

⁸ BOEIPA loh pilnam rhoek ke laitloek pah saeh. Ka duengnah neh ka thincaknah vanbangla, ka lai han tloek lah BOEIPA.

⁹ Halang rhoek kah boethae tah paltham suidae aka dueng te na cak sak. Te dongah duengnah Pathen loh lungbuei neh kuel ni a loepdak.

¹⁰ Lungbuei aka thuem kah khangkung Pathen tah kai kah photling ni.

¹¹ Pathen he a dueng la lai a tloek neh khohnin takuem ah kosi aka sah Pathen ni.

¹² Yut pawt koinih a cunghang khaw a tah vetih, a lii khaw a phuk vetih a nuen ni.

¹³ Te dongah amah ham dueknah tubael a tawn tih thaltang aka alh te a saii.

¹⁴ Boethae te a yom tih thakthaenah la a vawn dongah a hong a hi ni a cun coeng ke.

¹⁵ Vaam te a vueh tih a too dae amah loh a saii vaam khuiah amah cungku.

¹⁶ A thakthaenah te a lu dongla mael vetih a kuthlahnah khaw a luki ah suntla ni.

¹⁷ BOEIPA kah a duengnah te ka uem vetih Khohni BOEIPA ming te ka tingtoeng ni.