Tingtoeng 6 - Matu Bible

Rhennah Ham Thangthuinah

[Rhotoeng aka mawt ham a lung rhet dongkah David Tingtoenglung]

¹ Aw BOEIPA, na thintoek neh nan tluung pawt tih, na kosi neh kai nan toel moenih.

² Aw BOEIPA, Kai ka thana sut dongah kai n'rhen mai. Ka rhuh a hlinghlawk dongah kai n'hoeih sak lah BOEIPA.

³ Te dongah ka hinglu loh mat let coeng. Tedae BOEIPA nang me hil nim na koe ve?

⁴ Aw BOEIPA, ha mael laeh. Ka hinglu he pumcum sak lamtah, na sitlohnah neh kai he n'khang lah.

⁵ Dueknah khuiah nang aka poek te a om moenih. Nang te saelkhui lamkah ulong n'uem eh?

⁶ Ka hueinah nen khaw ka kohnue coeng tih, khoyin takuem ka baiphaih dongah puet ka yoka. Te dongah ka mikphi neh ka soengca ka sulpuem sak.

⁷ Ka mik khaw konoinah neh hmaang tih ka puencak cungkuem dongah haimo coeng.

⁸ Ka rhah ol he BOEIPA loh a yaak coeng dongah boethae aka saii boeih kai taeng lamkah nong uh laeh.

⁹ BOEIPA loh ka lungmacil a yaak tih, BOEIPA loh ka thangthuinah a doe.

¹⁰ Ka thunkha boeih loh yak uh saeh lamtah darhek let uh saeh. Mikhamtok ah mael uh saeh lamtah yak uh saeh.