Tingtoeng 52 - Matu Bible

Hoemdam Soah Laitloeknah

[Edom Doeg loh cet tih Saul la, “David te Ahimelek im la cet coeng,” a ti nah tih a puen vaengkah, aka mawt ham David kah hlohlai.]

¹ Hlangrhalh nang loh boethae neh bahamlae na thangthen uh. Pathen kah sitlohnah he hnin takuem ah cak.

² Na lai loh a talnah a moeh. Palyal neh paihat bangla haat tih a hlueng.

³ Hnothen lakah boethae na lungnah. Duengnah lakah a honghi te na thui. Selah

⁴ Hlangthai palat kah a lai loh dolhnah ol boeih te a lungnah.

⁵ Te cakhaw Pathen loh nang te a yoeyah la m'voeih vetih, nang te m'poep ni. Te vaengah dap khui lamkah nang te m'phuk vetih, mulhing rhoek kah khohmuen lamloh nang m'phuk ni. Selah

⁶ Tedae aka dueng rhoek loh a hmuh uh vaengah a rhih uh vetih anih te,

⁷ “Hlang khaw ke, Pathen vik amah kah lunghim la khueh pawt tih, a khuehtawn cangpai dongah pangtung tih a talnah neh tanglue,” tila a nueih thil uh.

⁸ Tedae kai tah Pathen im kah olive thinghing bangla kumhal ah Pathen kah sitlohnah te ka pangtung yoeyah.

⁹ Namah loh na saii coeng dongah kumhal ah nang kan uem vetih na then dongah na ming te na hlangcim rhoek hmuh ah ka lamtawn ni.