Tingtoeng 49 - Matu Bible

Khuehtawn Pangtung Tholh

[Aka mawt ham Korah ca rhoek kah tingtoenglung]

¹ Pilnam boeih loh hekah he ya uh lah. Khosaknah dongkah khosa boeih loh hnatun uh.

² Hlang capa rhoek long khaw, hlang tongpa rhoek long khaw, hlanglen neh khodaeng long khaw thikat la hnatun uh.

³ Ka ka loh cueihnah a thui vetih ka lungbuei poeknah loh a lungcuei om bitni.

⁴ Ka hna he thuidoeknah taengla ka kaeng vetih, ka olkael he rhotoeng neh ka thuicaih ni.

⁵ Yoethaenah hnin ah ka khodil kah thaesainah loh kai m'vael dae ba ham lae ka rhih eh?

⁶ A thadueng dongah pangtung uh tih a khuehtawn a yet neh thangthen uh dae,

⁷ hlang loh a manuca te a lat khaw a lat thai moenih. A tlansum te Pathen taengah a paek thai moenih.

⁸ A hinglu kah tlansum tah kuelka tih kumhal a toeng.

⁹ Te koinih a yoeyah la hing pueng sui tih hlan khaw hmuh pawt sue.

¹⁰ Aka cueih rhoek long tah a duek te a hmuh. Aka ang neh kotalh khaw a milh vaengah a khuehtawn te hlang tloe ham a caehtak.

¹¹ Amih kah poeknah nen tah a im te kumhal ah, a pohmuen te thawnpuei lamkah cadilcahma duela, om ni a ti uh tih tolhmuen te amih ming neh a khue uh.

¹² Tedae hlang he umponah khaw a rhaerhong moenih, rhamsa banglam ni a thuidoek tih a hmata.

¹³ Tetla amamih khosing te a uepnah tih amih kah olthui te a hnukbang rhoek loh a pom uh. Selah

¹⁴ Amih te saelkhui kah boiva la tael uh vetih, dueknah loh a luem puei ni. Tedae mincang ah amih te aka thuem rhoek loh a taemrhai uh ni. A muei neh a lungpang a imhmuen lamloh saelkhui la hmawn ni.

¹⁵ Tedae Pathen loh ka hinglu he saelkhui kut lamkah n'lat dongah kai he n'loh bit ni. Selah

¹⁶ Hlang pakhat loh boei tih a im kah thangpomnah loh pungtai cakhaw rhih boeh.

¹⁷ A duek vaengah pakhat khaw khuen mahpawh. A thangpomnah loh anih te suntlak puei mahpawh.

¹⁸ A hing vaengah a hinglu te yoethen a paek tih namah te na hoeikhang vaengah nang uem uh dae,

¹⁹ A napa rhoek kah cadilcahma la cet vetih yoeyah la vangnah hmu uh mahpawh.

²⁰ Hlang he umponah neh om dae a yakming pawt atah rhamsa aka hmata rhoek bangla om.