Tingtoeng 26 - Matu Bible

Tang sak Ham Thangthuinah

[David kah]

¹ Aw BOEIPA, kai he lai han tloek lah. Thincaknah neh ka cet tih BOEIPA te ka pangtung dongah ka dinghae pawh.

² Aw BOEIPA kai he n'loepdak lamtah kai he n'noemcai lah. Ka kuel neh lungbuei he picai la picai mai.

³ Ka mik dongah na sitlohnah ka hmaitang tih na oltak dongah ka cet.

⁴ Hlang taengah a poeyoek la ka ngol pawt tih aka thuhrhawk neh ka yok pawh.

⁵ Thaehuet rhoek kah a hlangping te ka thinah tih halang rhoek taengah ka ngol pawh.

⁶ Ka kut he cimnah neh ka silh tih, BOEIPA nang kah hmueihtuk te ka hil he,

⁷ Uemonah ol te ka doek tih namah kah khobaerhambae boeih te ka tae.

⁸ Aw BOEIPA, na lum-im khuirhung neh na thangpomnah dungtlungim hmuen te ka lungnah.

⁹ Ka hinglu he hlangtholh rhoek neh, ka hingnah he thii aka hal hlang rhoek taengla coi boeh.

¹⁰ Amih kut dongah khonuen rhamtat om tih a bantang kut ah kapbaih a poem uh.

¹¹ Tedae kai tah kamah thincaknah neh ka cet. Kai n'lat lamtah kai n'rhen lah.

¹² Ka kho he tlangkol ah pai tih khangkhung lakli ah BOEIPA te a yoethen pai ni.