Tingtoeng 149 - Matu Bible

Caemthang Pathen Thangthen Uh

¹ BOEIPA te thangthen uh. Hlangcim hlangping khuiah amah koehnah laa thai te BOEIPA taengah sa uh.

² Israel loh amah aka saii dongah a kohoe saeh. Zion ca rhoek loh a manghai dongah omngaih uh saeh.

³ A ming te lamnah neh, kamrhing neh thangthen uh saeh lamtah, amah te rhotoeng neh tingtoeng saeh.

⁴ BOEIPA tah a pilnam soah a ngaingaih tih kodo rhoek te khangnah neh a cam.

⁵ Hlangcim rhoek thangpomnah dongah sundaep uh saeh lamtah a thingkong dongah tamhoe uh saeh.

⁶ A olrhong dongah Pathen koehnah neh a kut dongah cunghang ha pom uh saeh.

⁷ Namtom soah tawnlohnah, namtu pawt te toelthamnah saii saeh.

⁸ A manghai rhoek te hmaipom neh a thangpom rhoek te thi hlong neh khoh uh saeh.

⁹ A taengah laitloeknah saii hamla a hlangcim boeih kah a rhuepomnah he daek pah. BOEIPA te thangthen uh.