Tingtoeng 113 - Matu Bible

Rhennah Pathen Thangthen Lah

¹ BOEIPA te thangthen uh. BOEIPA kah a sal rhoek loh thangthen uh. BOEIPA ming te thangthen uh.

² BOEIPA ming he tahae lamkah kumhal due khaw om saeh lamtah a yoethen pai saeh.

³ Khocuk lamkah a khotlak duela BOEIPA ming tah thangthen pai saeh.

⁴ BOEIPA tah namtom boeih soah, a thangpomnah khaw vaan rhoek soah a pomsang pai.

⁵ Mamih kah Pathen BOEIPA bangla unim a sang la aka ngol?

⁶ Vaan neh diklai sawt hamla aka buluk tih,

⁷ tattloel te laipi lamkah aka thoh tih natva lamkah khodaeng khaw,

⁸ a pilnam kah hlangcong rhoek taengah hlangcong rhoek neh ngol sak ham a pomsang.

⁹ Caya khaw imkhui ah camoe rhoek kah a manu la kho aka sa taengah a kohoe pai saeh. BOEIPA tah thangthen uh.