Tingtoeng 112 - Matu Bible

Aka dueng kah mueimae

¹ BOEIPA te thangthen uh. BOEIPA aka rhih tih a olpaek dongah bahoeng aka hmae hlang tah a yoethen.

² A tiingan te diklai ah hlangrhalh la om vetih, aka thuem kah cadilcahma tah a yoethen ni.

³ A im ah boeinah neh khuehtawn soep tih a duengnah a yoeyah la cak.

⁴ Aka thuem ham tah a hmuep khuiah khaw thinphoei lungvatnah neh duengnah khosae te a thoeng pah.

⁵ Hlang then loh a rhen tih a pu vaengah a ol te a tiktamnah neh a cangbam.

⁶ A dueng la aka om tah kumhal ah poekkoepnah a om coeng dongah anih ngawntah kumhal duela tuen mahpawh.

⁷ BOEIPA dongah aka pangtung tih a lungbuei aka cikngae loh olthang thae te rhih mahpawh.

⁸ A lungbuei a uep dongah a rhal rhoek te a hmuh vaengah rhih mahpawh.

⁹ Khodaeng rhoek ham a tael pah tih a paek. A duengnah he a yoeyah la cak dongah a ki khaw thangpomnah neh a pomsang ni.

¹⁰ Halang loh a hmuh vaengah hue a sak ni. A no tak cakhaw halang kah hoehhamnah ngawntah yip milh ni.