Tingtoeng 111 - Matu Bible

BOEIPA Khoboe Thangthen lah

¹ BOEIPA te thangthen lah. Aka thuem rhoek kah tingtunnah neh rhaengpuei lakliah thinko boeih neh BOEIPA ka uem ni.

² BOEIPA kah bibi a len rhoek te aka huem rhoek boeih loh a tlap uh.

³ A bisai dongah mueithennah neh rhuepomnah om tih a duengnah khaw a yoeyah la cak.

⁴ Lungvatnah neh thinphoei BOEIPA te poekkoepnah ham ni amah kah khobaerhambae khaw a saii.

⁵ Amah aka rhih rhoek te maeh a paek tih a paipi te a kumhal duela a thoelh.

⁶ Namtom rhoek kah rho te a pilnam taengah paek ham ni a bibi neh a thadueng khaw a doek.

⁷ A kut dongkah a bibi he oltak neh tiktamnah om tih a olrhi rhoek khaw boeih cak.

⁸ Oltak neh a thuem la aka saii rhoek tah kumhal duela pai yoeyah.

⁹ A pilnam taengah tlannah a thak pah. A paipi cim kumhal duela a uen dongah a ming khaw a rhih om pai.

¹⁰ BOEIPA hinyahnah he tah cueihnah a tongnah la om tih a olkhueng aka vai rhoek boeih taengah lungmingnah then om. Amah koehnah a yoeyah la pai.