Tingtoeng 11 - Matu Bible

BOEIPA dongah Yingnah

[Aka mawt ham David kah]

¹ BOEIPA dongah ka ying coeng. Metlamlae ka hinglu te vaa bangla na tlang dongah rhaehba khaw rhaehba mai na ti?

² Halang rhoek loh lungbuei aka thuem rhoek te a hmuep lamloh kah ham, lirhui dongah thaltang a mop uh tih lii a phuk uh thil ke.

³ A yung a paa te a koengloeng uh vaengah aka dueng loh balae a saii thai?

⁴ BOEIPA tah amah kah bawkim cim ah om. BOEIPA kah a ngolkhoel tah vaan ah om. Hlang capa rhoek te a mik neh a dawn tih a mikkhu neh a noem.

⁵ BOEIPA loh aka dueng neh aka halang te a noem vaengah kuthlahnah aka lungnah te BOEIPA kah a hinglu loh a hmuhuet.

⁶ Halang tah hmai pael neh kat a tlan thil vetih yilh ling boengloeng te a buham nah ni.

⁷ Duengnah BOEIPA tah a dueng dongah a thuem aka lungnah rhoek long ni a maelhmai a hmuh uh eh.