Suencuek 5 - Matu Bible

Seth kah a Rhuirhong

¹ Hekah he Pathen loh hlang a suen tue vaengkah Pathen amah mueiloh la a saii Adam kah rhuirhong cabu ni.

² tongpa neh huta a suen phoeiah amih rhoi te yoethen a paek tih amih rhoi a suen khohnin ah amih kah ming te hlang a sui.

³ Adam tah kum yakhat phoeiah sawmthum hing. Te vaengah amah muei la, amah mueiloh a sak tih a ming te Seth a sui.

⁴ Seth te a sak phoeiah Adam kah a tue khaw kum ya rhet lo coeng dae ca tongpa rhoek neh canu rhoek te a sak.

⁵ Te dongah Adam kah a hing tue te a pum la kum ya ko neh kum sawmthum a lo phoeiah duek.

⁶ Seth khaw kum ya neh kum nga a lo vaengah Enosh te a sak.

⁷ Enosh te a sak phoeiah Seth khaw kum ya rhet neh kum rhih hing tih a canu a capa rhoek te a sak.

⁸ Seth tah a khohnin boeih kum ya ko neh kum hlai nit a lo phoeiah duek.

⁹ Enosh khaw kum sawmko a lo vaengah Kenan te a sak.

¹⁰ Enosh khaw Kenan te a sak phoeiah kum ya rhet neh kum hlai nga hing tih capa rhoek neh canu rhoek te a sak.

¹¹ Te dongah Enosh kah a tue boeih he kum ya ko neh kum nga a lo phoeiah duek.

¹² Kenan kum sawmrhih a lo vaengah Mahalalel te a sak.

¹³ Kenan loh Mahalalel te a sak phoeiah kum ya rhet neh kum likip a lo phoeiah capa rhoek neh canu rhoek te a sak.

¹⁴ Te dongah Kenan kah a tue boeih he kum ya ko neh kum rha a lo phoeiah duek.

¹⁵ Mahalalel kum sawmrhuk neh kum nga a lo vaengah Jared te a sak.

¹⁶ Mahalalel loh Jared a sak phoeikah kum ya rhet neh kum sawmthum a lo vaengah canu rhoek neh capa rhoek te a sak.

¹⁷ Te dongah Mahalalel kah a hing tue boeih tah kum ya rhet neh kum sawmko panga a lo phoeiah duek.

¹⁸ Jared te kum ya neh kum sawmrhuk neh kum hnih a lo vaengah Enok te a sak.

¹⁹ Jared loh Enok a sak phoeikah kum ya rhet a lo vaengah canu rhoek neh capa rhoek te a sak.

²⁰ Te dongah Jared kah khohnin tah a pum boeih la kum ya ko neh kum sawmrhuk neh kum hnih a lo phoeiah duek.

²¹ Enok te kum sawmrhuk neh kum nga a lo vaengah Methuselah te a sak.

²² Enok loh Methuselah te a sak phoeiah Pathen neh kum ya thum hmaih a pongpa rhoi phoeiah capa rhoek neh canu rhoek te a sak.

²³ Enok kah khohnin tah a pum boeih la kum ya thum neh kum sawmrhuk neh kum nga lo.

²⁴ Enok tah Pathen neh a pongpa dongah Pathen loh a loh tih vik om pawh.

²⁵ Methuselah kum ya neh kum sawmrhet kum rhih a lo vaengah Lamek te a sak.

²⁶ Methuselah loh Lamek a sak phoeikah kum ya rhih neh kum sawmrhet kum nit a lo vaengah capa rhoek neh canu rhoek te a sak.

²⁷ Te dongah Methuselah kah khohnin tah a pum la kum ya ko neh kum sawmrhuk neh kum ko a lo phoeiah duek.

²⁸ Lamek khaw kum ya neh kum sawmrhet neh kum nit a lo vaengah capa pakhat a sak.

²⁹ Anih ming te Noah la a khue. Anih he tah BOEIPA loh thae a phoei thil diklai ah mamih kut kah thatlohnah neh bibi dongah mamih aka hloep ham ni,” a ti.

³⁰ Lamek khaw Noah a sak phoeikah kum ya nga neh kum sawmko kum nga a lo vaengah capa rhoek neh canu rhoek te a sak.

³¹ Te dongah Lamek kah khohnin he a pum la kum ya rhih neh kum sawmrhih neh kum rhih a lo phoeiah duek.

³² A capa Noah khaw kum ya nga a lo vaengah, Noah loh Shem, Hem, neh Japheth te a sak.